چیخیش 2
2
موسانین دوغولماسی
1لاوی قبئلهسئندن بئر کئشی لاوئلی بئر قیزلا اِولَندی. 2آرواد بویلو اولوب، بئر اوغلان دوغدو. آرواد اوشاغین گؤزل اولدوغونو گؤردوکده، اونو اوچ آی گئزلَتدی. 3آمّا بوندان آرتیق اونو گئزلی ساخلایا بئلمهدئیئندن، قامیشدان بئر سبد گؤتوروب قیر و قَطرانلا بورودو، کؤرپهنی سبدئن ائچئنه قویوب، نئل چایین قیراغینداکی قامیشلیغین آراسینا قویدو. 4کؤرپهنئن باجیسی اوزاقدا دوروب باخیردی کی، اونون باشینا نه گلهجَیئنی گؤرسون. 5فئرعونون قیزی یویونماق اوچون چایا گئردی. کنئزلری چایین قیراغیندا گزئردئلر. فئرعونون قیزی قامیشلارین آراسیندا سبدی گؤروب، کنئزئنی گؤندَردی کی، اونو گتئرسئن. 6سبدئن آغیزینی آچدیقدا کؤرپهنی گؤردو. اوشاق آغلاییردی. فئرعون قیزی اونا رحمی گلدئیئندن، ددی: «بو عئبرانی اوغلانلاریندان بئریدئر.» 7او واخت کؤرپهنئن باجیسی فئرعونون قیزیندان سوروشدو: «ائستهیئرسئنئز گدئم سئزئن اوچون عئبرانی آروادلاریندان بئر دایه چاغیریم کی، کؤرپهنی اَمئزدئرسئن؟» 8فئرعونون قیزی اونا ددی: «گت.» قیز دا گدئب کؤرپهنئن آناسینی چاغیردی. 9فئرعونون قیزی اونا ددی: «بو کؤرپهنی گؤتور و منئم اوچون اَمئزدئر، سنئن اوجرتئنی ورهرم.» آرواد کؤرپهنی گؤتوروب اَمئزدئردی. 10اوشاق بؤیودو و آرواد اونو فئرعون قیزینین یانینا آپاردی و اوشاق اونون اوغلو اولدو. و او، اوشاغین آدینی موسا#2:10 «موسا» - عئبرانی دئلئنده یعنی «چیخاردان» قویوب ددی: «چونکی اونو سودان چیخارتدیم.»
موسا مئصئرلئنی اؤلدورور
11موسا بؤیودوکدن سونرا، بئر دفه اؤز خالقینین یانینا گتدی و اونلارین آغیر زحمتئنی گؤردو. و بئر مئصئرلئیه راست گلدی کی، اونون خالقیندان اولان بئر عئبرانئنی دؤیوردو. 12موسا اطرافینا باخیب هچ کسئن اولمادیغینی گؤرنده، مئصئرلئنی اؤلدوروب قومدا گئزلَتدی. 13صاباحیسی گون گتدئیئنده گؤردو کی، ائکی عئبرانی بئر-بئری ائله ساواشیر. موسا حاقسیز اولانا ددی: «یولداشینی نئیه وورورسان؟» 14او آدام ددی: «سنی بئزئم اوستوموزه کئم باشچی، یا دا حاکئم قویوب؟ یوخسا مئصئرلئنی اؤلدوردویون کئمی، بو فئکئردهسن کی، منی ده اؤلدورهسن؟» او زامان موسا قورخوب اورهیئنده ددی: «یقئن کی، اتدئیئم ائش اوزه چیخیب.» 15فئرعون بو ائشدن خبردار اولاندا، ائستهدی کی، موسانی اؤلدورتسون. آمّا موسا فئرعونون اَلئندن قاچیب، مئدیان تورپاغینا چاتاراق، بئر قویونون یانیندا اوتوردو.
موسا مئدیاندا یاشاییر
16مئدیانلی بئر کاهئنئن یدّی قیزی وار ائدی. اونلار گلئب قویودان سو چکدئلر. آتالارینین سوروسونو سووارماق اوچون، سو تَکنهلرئنی دولدوردولار. 17آمّا چوبانلار گلئب اونلاری قوودولار؛ موسا اونلارین کؤمهیئنه قالخدی و سورولرئنی سوواردی. 18قیزلار آتالاری رِعواِلئن یانینا گلنده، رِعواِل سوروشدو: «نجه اولدو کی، بو گون تز گلدئنئز؟» 19اونلار جاواب وردئلر: «بئر مئصئرلی بئزی چوبانلارین الئندن قورتاردی، بوندان دا علاوه، حتّا قویودان بئزئم اوچون سو چکئب سورونو سوواردی.» 20رِعواِل قیزلاریندان سوروشدو: «بس او آدام هارادادیر؟ اونو نئیه بوراخدینیز؟ چاغیرین، گلئب بئر شی یسئن.»
21موسا راضی اولدو کی، او آدامین اِوئنده قالسین. او دا قیزی صئپّورانی موسا ائله اِولَندئردی. 22صئپّورا بئر اوغلان دوغدو. موسا اونون آدینی گِرشوم#2:22 «گِرشوم» - عئبرانی دئلئنده یعنی «اورادا قرئب» قویوب ددی: «من یاد بئر اؤلکهده قرئب اولموشام.»
تاری ائسرایئللیلرئن فریادلارینی اشئدئر
23چوخ ائل کچدی. بو آرادا مئصئر پادشاهی اؤلدو. ائسرایئل اؤولادلاری اسئرلئکلرئنده ناله چکئب فریاد اتدئلر، و بو اسئرلئک اوچون اونلارین کؤمک ائستهین باغیرتیسی تارینین حوضورونا چاتدی. 24تاری اونلارین باغیرتیسینی اشئتدی و ائبراهئم، ائسحاق و یعقوبلا اولان عهدئنی خاطیرلادی. 25تاری ائسرایئل اؤولادلارینی گؤردو و اونلارا نظر سالدی.
Currently Selected:
چیخیش 2: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.