Luk 3
3
Tsə̀tsòhòNə̀ Jon Ŋgà Bàptɛsə̀ Bwìŋ
(Mat. 3:1-17, 14:3-12; Mak 1:1-11, 6:17-21; Jon 1:19-28)
1Bum yè'e à ye ŋga Tìberiyùu ŋkum mvwe' nze Rumà yi lùumŋgòŋ hum-ncòp-tàŋ. Poŋtiyòs Palè ye ye govənòmvwe' nze Jùdiyà, fana Heròye ye ŋgà sak nze Galìli. Moma Herònə̀ liŋ yee Filìp à sə sak ye nze Ìturiyà bə Tràkònitì. Lìsaniyà à sə sak ye nze Abilin. 2Anàs bə Kayofàs à ye yàwo ŋkum ŋgàa fa satikà' wèŋ. Ànə geŋ Nwì cèp bohòJon mo Sàkàriyà ŋga yi cu ŋgəà. 3Jon ànə yuk fana yi lokok nə gi kɛ' mvwe' lak sə̀ yà' kʉəp ŋgʉ ndzəp Jòridàŋ yà'a. Yi à sə tsòho fa bwìŋ dʉk də, <<Wèeŋ kupsə, nə bwi fa bʉp awèŋ ŋkwɛ̀ŋ, nə baptɛsə, ya Nwìi swi fa weŋ bʉp awèŋ.>>
4Ìzayà ŋgà tsòhòbum Nwì ànə com bum yè'sə ndzənə ŋwàk ye də,
<<Ŋgì ŋwə̀ nəmòk sə cèp torə və̀ sə ŋgəà, nə sə yuhu də,
<Gʉ tsə'rə fa Tà Nwì mandzə̀ ye, rəŋsə tsə'rə fa yi bwe cwèe mandzə̀ ŋgògì cà ca.> >>
5Wo rwisə tsə'rə ntòŋ pwe', nə fak laŋsə tsə'rə nda sə̀' pwe'.
Gʉ mandzə̀ə sə̀ yà'a gəgorə̀ pwe' yà'a ye rərəŋ, nə laŋsə cwèe mandzə̀ə sə̀ yà' ka làaŋ yeŋ.
6Fana bwìŋ pwe'fo' nə ye lù nə̀ Nwìi nə fa bwìŋ.
7Mandzə̀ ànə loho vɛ'ɛ bə bʉ̀ʉ sə̀ wo ànə sə və də Jon bàptɛsə wo. Fana Jon dʉk fa wo də, <<Wèŋ ŋgwì bʉ̀ no, tsə̀' weŋ ŋga'a ndà də wèeŋ caŋ, nə swirə ŋgə' nə̀ Nwìi nə̀ fa bwìŋ nə ɛ? 8Wèeŋ gʉ yusə̀ aco yà' ni tsok də wèŋ bwì fa bʉp awèŋ ŋkwɛ̀ŋ laŋ. Wèeŋ kà də wèeŋ sə tsərə də aco wèŋ swirə ŋga wèŋ sə dʉhʉ na də, <Tàcici àvès à ye Abràham> dʉk. Bʉsə̀ mʉ tsok fa weŋ də, aco Nwì jəŋ lìis yè'e, nə gʉ fa Abràham bwe bə zeŋ sə̀'. 9Yuk-a. Njàm nə nòsə kʉ̀k ŋgògwɛ̀' màk tʉ sə mbwè. Tʉ nə̀ fòpwe' nə̀ nà' ka-a nto'o sə̀ bə̀boŋ zəm, wo gwɛ' mak nà' sə nze, nə te' tɛŋ gesə nà' sə misə̀.>>
10Bʉ̀ʉ sə̀ wo ànə yuk ncèp ènə fek yi dʉk də, <<Aco vès gʉ ŋga'a yè'sə va?>> 11Jon tsok fa wo də, <<Ŋwə̀ nə̀ wù tse' cə̀ək nini ba, wù fa ŋwə̀ nə̀ yi ka mò'fis tse' mòk. Ŋwə̀ nə̀ wù tse' zʉzʉ, wù gapsə weŋ ŋwə̀ nə̀ yi ka tse'.>>
12Bʉ̀ʉ sə̀ wo à ye ŋgàa ko mbàam tas mok à və̀, dʉk də Jon bàptɛsə wo. Wo fek Jon nə də, <<Cicà, vèes gʉ va?>> 13Yi tsok fa yà'wèŋ də, <<Kà də wèeŋ jəŋ casə fe'lə mbàam ŋwə̀ nəmòk bə mfìp dʉk.>>
14Sojàa mok wèŋ à və̀ə, nə fek yi sə̀' dʉk də, <<Vès yàvès ɛ? Vèes nə gʉ va?>> Jon tsok fa yà'wèŋ dʉk də, <<Kà mbàm ŋwə̀ nəmòk bə ŋàŋ fep jə, nə kà ŋwə̀ nəmòk wà na'tse'. Mbàam ŋwʉ àwèeŋ kə̀kʉrə̀ bohòwèŋ>>
15Bwìŋ ànə sə kʉk Ŋkum ŋgà gèm bwìŋ nə̀ Nwì à kàk də yi nə tum nə, fana wo à yə Jon, wo ye ŋgòtsərə də kàmòk a yi nə àlɛ. 16Yi dʉk fa yà'wèŋ dʉk də, <<Mʉ̀ sə baptɛsə mègù weŋ yàm bə ndzəp, nə yeè nə də, ŋwə̀ nəmòk nə̀ yi yam càsə mʉ nə və, nə̀ mʉ̀ ka kə̀kʉrə̀ ŋgòfìrə fa yi kùuŋgùup ye yeŋ. Yi nə baptɛsə weŋ bə Yòŋsə̀ nə̀ Rərɛŋ, nə ye bə mis. 17Yi tse' wàam nzaŋ ye ndzə bohòyi ŋgòcìs nzaŋ bə zeŋ. Yi nə cis wes nzaŋ sə, nə nəmsə yà' mʉ tapə, nə tɛŋ dzə̀dzə̀ə sə sə mvwe' mis nə̀ nà'a kà liìgə̀.>>
18Jon à sə tip kɛ' bwìŋ bə mandzə̀ zəzok mʉmvə̀'nə̀ yi sə tsòho fa wo Ntirə̀ nə̀ Bə̀boŋ nə. 19Yi à cèp bohòŋkum Heròsə̀' də nà' gʉ̀ bʉp wùriŋ bʉ̀ʉsə̀ nà' ànə jəŋ Hèrodiyà nə̀ yi à ye ŋgwe moma ye Filìp. Herònə à gʉ̀ bum mok sə̀ yà' à bʉp sə̀'. 20Yi ànə gʉ fe'lə yumòk nə̀ nà' bʉp càsə cù sə̀'. Yu nə̀ yi ànə gʉ nə, à ye də yi à ko lok Jon mʉ ndapndzəmə̀.
21À ye ŋga Jon bàptɛsə mè bwìŋ pwe', fana Jisòs və, Jon baptɛsə yi sə̀'. Jisòs ànə sə gʉ pìriyà fana ntòbu muhu to. 22Fana Yòŋsə̀ nə̀ Rərɛŋ tsoŋ mʉbu co kəkəbʉ̀ŋ. Nwì cep vesə mʉbu dʉk də, <<Wù mo àm nə̀ mʉ̀ dzəm wu sə ntʉʉ̀ mʉ̀. Mʉ̀ kwa bohòwù wùriŋ.>>
Tàcicii Jisòs
(Mat. 1:1-17)
23Jisòs à yèto fàak ye ŋga yi co lùumŋgòŋ hum tɛ'. Tàcicii ye à ye mʉmvə̀' nè'e.#3:23 Wo-à be'lə ŋgo sə̀ 24 kə dzeŋ 38 yè'e mvwe' mò'fis bʉ̀ʉsə̀ yà' sə taŋsə tàcici wèŋ bə mandzə̀ nə̀ bʉ̀ Yamba wèŋ. Ghà nə̀ wo à còm to ŋwàk nè'e à ye ŋga bwìŋ sə taŋsə liŋ tàcicii awo nə sə yeto bə nə̀ yi cu ntòŋwʉm, nə sə taŋ foho lo maŋkwɛ̀ŋ tèè kə dzeŋ mʉ nì'ì tàcici nə̀ yi-à yèto. Bʉ̀ Yamba wèeŋ ta yètogə̀ yàwo bə nə̀ mantombì nə kə ləsə bə nə̀ yi cu ŋwʉm mvə̀'nə̀ vès a com yè'e.
24-38Adàm nə ye mo Nwì. Sɛt ye mo Adàm.
Enos ye mo Sɛt. Kàyinàn ye mo Enos.
Màhalalì ye mo Kàyinàn. Jarè ye mo Màhalalì.
Enòk ye mo Jarè. Mɛ̀tuselà ye mo Enòk.
Lamɛ̀k ye mo Mɛ̀tuselà. Nuà ye mo Lamɛ̀k.
Shem ye mo Nuà. Àrfasà ye mo Shem.
Kàyinàn ye mo Àrfasà. Shelà ye mo Kàyinàn.
Ebà ye mo Shelà. Pelɛ̀k ye mo Ebà.
Ru ye mo Pelɛ̀k. Serù ye mo Ru.
Nahòye mo Serù. Terà ye mo Nahò.
Abràham ye mo Terà. Azìk ye mo Abràham.
Jàkop ye mo Azìk. Judà ye mo Jàkop.
Perè ye mo Judà. Hɛsròŋ ye mo Perè.
Arnì ye mo Hɛsròŋ. Adimìn ye mo Arnì.
Àminadàp ye mo Adimìn. Nasòŋ ye mo Àminadàp.
Samòŋ ye mo Nasòŋ. Bowàs ye mo Samòŋ.
Obè ye mo Bowàs. Jesì ye mo Obè.
Devìd ye mo Jesì. Natàŋ ye mo Devìd.
Matatà ye mo Natàŋ. Menà ye mo Matatà.
Meleyà ye mo Menà. Èliyakìm ye mo Meleyà.
Jonàm ye mo Èliyakìm. Jòsep ye mo Jonàm.
Judà ye mo Jòsep. Simiyòŋ ye mo Judà.
Levì ye mo Simiyòŋ. Màtat ye mo Levì.
Jorìm ye mo Màtat. Èlìyezè ye mo Jorìm.
Josuwà ye mo Èlìyezè. Er ye mo Josuwà.
Èlmadàm ye mo Er. Kosàm ye mo Èlmadàm.
Adì ye mo Kasàm. Melkì ye mo Adì.
Nerì ye mo Melkì. Shèyatiyè ye mo Nerì.
Zèrubabè ye mo Shèyatiyè. Resà ye mo Zèrubabè.
Joanàŋ ye mo Resà. Jodà ye mo Joanàŋ.
Josèk ye mo Jodà. Semèŋ ye mo Josèk.
Màtàtiyà ye mo Semèŋ. Maàt ye mo Màtàtiyà.
Nagè ye mo Maàt. Eslì ye mo Nagè.
Nahùm ye mo Eslì. Emòs ye mo Nahùm.
Màtàtiyà ye mo Emòs. Jòsep ye mo Màtàtiyà.
Janè ye mo Jòsep. Melkì ye mo Janè.
Levì ye mo Melkì. Màtat ye mo Levì.
Helì ye mo Màtat. Jòsep nə̀ yi à ye mo Helì, yi à ye ŋwə̀ nə̀ bwìŋ sə tsərə də yi tɛ̀'ɛ Jisòs.
Currently Selected:
Luk 3: yam
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
