Markus 10
10
Wagginol Yeesu Dow Warki Teegal
(Maatiyu 19.1‑12; Luka 16.18)
1Sey Yeesu ummii ali ɗon yahi leydi Yahuudiya e fongo Caangol Urdun. Yimɓe ɗuɗɓe fuɗɗiti kawriti to maako, o ekkitiniɓe no o woowi waɗuki.
2Sey woɓɓe Faarisanko'en ngari to maako ngam ɓe poondamo, ɓe ƴamimo ɓe mbi'i, “E yiiki maaɗa Attawra alii neɗɗo yoofa debbo muuɗum?”
3Yeesu nootii wi'i, “Ɗume Muusa wi'i'on ngaɗon?” 4Ɓe mbi'i, “Muusa wi'i neɗɗo waaway windana debbo muuɗum ɗerewol warki teegal wi'amo o dilla.”#TA 24.1‑4; Maat 5.31. 5Sey Yeesu wi'iɓe, “Ngam ɓerɗe mooɗon ɗe caatuɗe waɗi Muusa windani'on ɗu'um dooka. 6Ammaa daga fuɗɗoode taguki ‘Allah tagiiɓe gorko e debbo.’#Fuɗ 1.27; 5.2. 7‘Ngam non neɗɗo alay nyaako muuɗum e maduujo muuɗum takkanoo debbo muuɗum, 8kamɓe ɗiɗo ɓe ngarta go'o.’ Ngam non naa' ɓe ɗiɗo kadin, ammaa ɓe ngartii neɗɗo go'oto.#Fuɗ 2.24. 9Ngam maajum ko Allah hawti, to' neɗɗo sendaɗum.”
10E ɓe nder wuro kadin, tokkuɓemo ƴamimo dow haala kan. 11Sey o wi'iɓe, “Koo moye yoofi debbo muuɗum te'i goɗɗo, njeenu o waadata e maako. 12Ɗonmaa to debbo sendirii e gorko muuɗum teeri e goɗɗo, njeenu o waɗata.”#Maat 5.32; 1Kor 7.10,11.
Yeesu Barkiɗinii Sukahoy Pamaroy
(Maatiyu 19.13‑15; Luka 18.15‑17)
13Yimɓe e ngaddana Yeesu sukahoy pamaroy ngam o barkiɗinakoy, ammaa tokkuɓemo kaɓaniɓe. 14Nde Yeesu yi'i non, ɓernde muuɗum metti, o wi'iɓe, “Alee sukahoy pamaroy ngara to am. To' on kaɗukoy, ngam gooduɓe ɓerɗe iri ɗe maakoy njeyi Laamu Allah. 15E mi wi'a'on goonga, fuu mo jaɓaayi Laamu Allah bo sukayel pamarel, o nattataa laamu ɗum koo seɗɗa!”#Maat 18.3. 16Sey Yeesu wuundiikoy go'o‑go'o, o yowanikoy juuɗe maako ngam barkiɗinki.
Neɗɗo Gooduɗo Risku
(Maatiyu 19.16‑30; Luka 18.18‑30)
17Yeesu nangi laawol won ɗon, sey goɗɗo neɗɗo doggi yahi diccii yeeso maako. Neɗɗo on ƴamimo, wi'i, “Moodibbo geeto, ko haani mi waɗa mi heɓa yonki ki re'ataa?”
18Yeesu wi'imo, “Ngam ɗume noddirɗaayam geeto? Walaa geeto sey Allah tan. 19A andi ko Attawra wi'i: ‘Taa' waɗu warhoore. Taa' waɗu njeenu. Taa' wujju. Taa' hokku ceyda fewre. Taa' ƴoyru neɗɗo njaɓanaamo ko o jeyi. Hokku nyaako maaɗa e maduujo maaɗa mangu.’ ”#Wur 20.13; TA 5.17; Wur 20.14; TA 5.18; Wur 20.15; TA 5.19; Wur 20.16; TA 5.20; Wur 20.12; TA 5.16.
20Sey o wi'i Yeesu, “Moodibbo, e mi waɗa fuu fii ɗu'um daga e mi suka.” 21Yeesu raarimo nder yidde, wi'imo, “A dullii waɗuki fii go'o. Yahu, cooraa ko ngooduɗaa, kokkaa ɓe ngalanaa ceede ɗen, nden a heɓay mbarjaari ton dow. Nden ngaraa, tokkaayam.” 22Nde neɗɗo on nani non, ɓernde maako taƴi, o dilli o nanaayi belɗum, ngam e mo woodi risku ɗuɗɗum.
23Yeesu raari tokkuɓemo wi'iɓe, “E ɗum saɗi diskuɗo natta Laamu Allah!”
24Tokkuɓemo kayɗinii e ko o wi'i, ammaa o fuɗɗiti o wi'iɓe, “Ɓiɓɓe am, nattuki Laamu Allah e saɗi naa' seɗɗa! 25Ɗum ɓuray hoyki ngeelooba tokka nder yolnde baatal dow diskuɗo natta Laamu Allah.”
26Tokkuɓemo kayɗini naa' seɗɗa, ɓe mbi'imo, “Too, to ɗum non, moye hisata?”
27Yeesu raariɓe, wi'i, “To yimɓe ɗum waɗataako, ammaa to Allah ɗum waɗoto. Ngam to maako koo ɗume ɗum gaɗotooɗum.”
28Sey Biiturus wi'imo, “Too, raɗɗum, minon min alii koo ɗume min tokkiima.”
29Yeesu wi'i, “E mi wi'a'on goonga, fuu aluɗo wuro muuɗum, koo sakiraaɓe muuɗum worɓe koo rewɓe, koo maduujo muuɗum, koo nyaako muuɗum, koo ɓiɓɓe muuɗum, koo gese muuɗum ngam am e Habaru Belɗum, 30o heɓay ko ɓuri non nder ɗu'um jaamanu. O heɓay gureeje, e sakiraaɓe worɓe e rewɓe, e danyooɓe, e ɓiɓɓe, e gese nde 100. Ɗonmaa yimɓe torraymo, ammaa Nyalnde Jaango o heɓay yonki ki re'ataa. 31Ammaa yimɓe ɗuɗɓe artuɓe ɓe ngartay cakitiiɓe, nden cakitiiɓe ngartay artuɓe.”
Yeesu Fuɗɗitii Wi'i No O Mayrata
(Maatiyu 20.17‑19; Luka 18.31‑34)
32Yeesu e tokkuɓemo sappo e ɗiɗo e woɓɓe tokkuɓemo e ɓe dow laawol yaaki Urucaliima, Yeesu e ardiiɓe. Tokkuɓemo sappo e ɗiɗo ɓen e kayɗini, tokkuɓemo koriiɓe boo e kula. Yeesu fuɗɗiti noddi tokkuɓemo sappo e ɗiɗo ɓen kamɓe tan, o fuɗɗi wi'ukiɓe ko heɓatamo, 33o wi'i, “Raɗɗum, en njahay Urucaliima, nden ɗum waɗay Ɓii Neɗɗo nder juuɗe mawɓe ardiiɓe diina e moodiɓɓe Attawra. Ɓe taƴanaymo kiita mayde, nden ɓe ngaɗamo nder juuɗe yimɓe naa' Yahuudanko'en, 34ɓe njukkitamo, ɓe tuttanamo joode, ɓe piyamo, ɓe mbaramo. Nden gaɗa balɗe tati, o ummoto daga mayde.”
Ko Yaakubu e Yahaya Torii Yeesu
(Maatiyu 20.17‑19; Luka 18.31‑34)
35Sey Yaakubu e Yahaya ɓiɓɓe Jabadi ɓaddii Yeesu, mbi'i, “Moodibbo, e min ngiɗi ngaɗanaamin fuu ko min torimaa.”
36Sey Yeesu wi'iɓe, “Ko ngiɗɗon mi waɗana'on?”
37Ɓe mbi'i, “Taa jooɗake dow jooɗorgal laamu maaɗa nder teddungal maaɗa, go'oto amin jooɗoo to nyaamo maaɗa, go'oto to nano maaɗa.”
38Ammaa Yeesu wi'iɓe, “On andaa ko torotooɗon. On mbaaway njaron iri jardugel torra ngel njaraymi yeeso ɗo'o? Koo on mbaaway ɗum waɗana'on iri baptisma torra ɗum um waɗantayam yeeso ɗo'o?”#Luk 12.50.
39Ɓe mbi'i, “Ee, min mbaaway.”
Sey Yeesu wi'iɓe, “On njaray iri jardugel torra ngel njaraymi, nden ɗum waɗana'on baptisma iri ɗum um waɗantayam. 40Ammaa jooɗaaki e jungo am nyaamo e jungo am nano naa' min hokkataɗum. Ɗe'e bigeeje ɗum ɗe ɓen ɗon ɓe ɗum siryaniiɗe.”
41Nde horiiɓe tokkuɓe Yeesu sappo nani non, ɓe puɗɗi monnanki Yaakubu e Yahaya. 42Sey Yeesu noddiɓe, wi'iɓe, “On andi nder yimɓe naa' Yahuudanko'en, yimɓe ɓe ɗum andiri laamu e kolla laamu sembe, nden mawɓe maɓɓe e kolla ɓural. 43Ammaa onon, to' on ngaɗu non hakkunde mooɗon. Fuu giɗɗo warta mawɗo nder mooɗon, doole warta jaggantooɗo'on.#Luk 22.25,26. 44Kadin fuu giɗɗo warta ardiiɗo, doole o warta maccuɗo koo moye.#Maat 23.11; Mar 9.35; Luk 22.26. 45Ngam Ɓii Neɗɗo warii naa' ngam o jagganee, ammaa ngam o jagganoo yimɓe, o hokka yonki maako ngam rimɗinki ɗuɗɓe.”
Bumɗo Bi'eteeɗo Bartimaawus Wumtinaama
(Maatiyu 20.29‑34; Luka 18.35‑43)
46Sey ɓe njottii gariiri Jeriiko. Yeesu e tokkuɓemo hawti e yimɓe ɗuɗɓe e mburtoo gariiri Jeriiko, goɗɗo bumɗo torotooɗo e jooɗii haade ɗatal. Inde maako Bartimaawus, waato ɓii Timaawus. 47Nde o nani Yeesu Najarankeejo ƴaɓɓotoo, o fuɗɗi nodduki e sembe, e mo wi'a, “Yeesu, Ɓiɗɗo Dawda, yurminanam!”
48Yimɓe ɗuɗɓe kaɓanimo mbi'imo o de''ita, ammaa o ɓeydi nodduki e sembe, e mo wi'a, “Ɓiɗɗo Dawda, yurminanam!”
49Sey Yeesu darii, wi'i, “Noddaneeyammo.”
Ɓe noddi bumɗo on, ɓe mbi'imo, “Nanu belɗum! Umma! E mo noddumaa.”
50Sey o hubini cuddaari maako, o ummii jawɗum, o yahi to Yeesu.
51Sey Yeesu ƴamimo, wi'i, “Ɗume ngiɗɗaa mi waɗanmaa?”
Bumɗo on nootii wi'i, “Moodibbo, e mi yiɗi mbumtinaayam.”
52Sey Yeesu wi'imo, “Dillu. Hoolaare maaɗa yamɗitiniima.”
Ɗon e ɗon gite maako mbumti, o tokki Yeesu, ɓe ndillidi.
Currently Selected:
Markus 10: fuv
Highlight
Share
Copy
Want to have your highlights saved across all your devices? Sign up or sign in
© 2010, Bible League. All rights reserved.
