Maa 11

Gbãakpaa Yesuzi Yelusalɛũ

(Mat 21.1-11; Luk 19.28-40; Zãa 12.12-19)

1Kɛ́ aa kãikũ̀ ń Yelusalɛũo, aa kà Bɛfaze ń Bɛtani pɔ ku Kukpɛ sĩsĩpɔlɛuo. Ɔ̃ Yesu a iwaɔ gbɛ̃ɔn pla zĩ̀ 2a ònɛ́: À gɛ́ wɛ̃lɛ pɔ kalɛ wá aɛ kee guu. Tó a gɛ̃ gɔ̃̀ɔ, á zaa'ĩn bɔlɔ e dɔa we, gbɛ̃e i dikpɛ yãao. À polo, à suò. 3Tó wà á lá, bɔ́ álɛ kɛ wei, í mɛ Dii mɛ́ ye a mɔaoi, a ɛa suò tia. 4Ɔ̃ aa gɛ̀ zaa'ĩna è dɔa kpɛɛlɛ gãaɛ. Kɛ́ aalɛ polo, 5ɔ̃ gbɛ̃́ pɔ zɛa weɔ ń lá aa mɛ̀: Bɔ́ álɛ kɛ ń zaa'ĩnapio, ɔ̃ álɛ poloi? 6Aa wèmá lá Yesu dànɛ́wa, ɔ̃ wà ń tó we. 7Aa sù ń zaa'ĩnapio Yesuɛ. Aa ń ulaɔ kpàlɛ zaa'ĩnapiwa, ɔ̃ Yesu dìkpɛ.#Zkl 9.9 8Gbɛ̃eɔ lɛ́ ń ulaɔ kpalɛ zɛ́ guu,#2 Kia 9.13 gbɛ̃eɔ lɛ́ láɔ zɔ̃ sɛ̃u, wàlɛ kpalɛ lɔ. 9Gbɛ̃́ pɔ dɔaaaɔ ń gbɛ̃́ pɔ tɛ́ zã́ɔ lɛ́ wiilɛ aalɛ mɛ:

Gbãakɛ!

Baaade gbɛ̃́ pɔ lɛ́ mɔ́ ń Dii tɔ́o!#Soũ 118.25-26

10Baaade wá dezi Davidi bui pɔ lɛ́ mɔ́ kiblei!

Wà gbãakpaaazi à zɔ̃ luawa.

11Kɛ́ Yesu kà Yelusalɛũ, à gɛ̃̀ Lua ua, ɔ̃ à wɛpã̀ pɔpiila. Kɛ́ ĩatɛ̃ i gɔ̃ bila lɔo yãi ɔ̃à bɔ̀ gɛ̀ Bɛtani ń a iwa gbɛ̃ɔn kuɛplaɔ.

Yesu figi lí kaa ń aà kua Lua uao

(Mat 21.12-22; Luk 19.45-48; Zãa 2.13-22)

12Kɛ́ gu dɔ̀, aa bɔ̀ Bɛtani, ɔ̃ nɔana lɛ́ Yesu dɛ. 13À figi lí è kãaa, a lá pàɛ. À gɛ̀ gwai tó a nɛ mà. Kɛ́ à kà we, i pɔe eo, sema a lá, asa a magɔɔ i ka yãao. 14Ɔ̃ a ò lípiɛ: Gbɛ̃e a n nɛ ble bau lɔo. Aà iwaɔ yãpi mà.

15Kɛ́ aa kà Yelusalɛũ, Yesu gɛ̃̀ Lua ua, ɔ̃ à laayianaɔ ń laalunaɔ yà à ń bɔlɛ, à ɔlɛũkpakɛnaɔ taabũnuɔ ń felenyianaɔ kilaɔ fuangba. 16I wei gbɛ̃e a aso sɛ̀ à bɔlɛ ń Lua uaoo. 17Ɔ̃ à yãdà gbɛ̃́ɔnɛ à mɛ̀: Wa kɛ̃̀ wà mɛ̀: Ma kpɛ́ aɔ dɛ ma sisikpɛ ũ bui piiɛ.#Isa 56.7 Apiɔ sɔ̃ á kɛ̀ gbɛ̃blenaɔ tòo ũ.#Zel 7.11 18Sa'onkiaɔ ń Mɔizi ikoyãdanɛdeɔ yãpi mà, ɔ̃ aalɛ zɛwɛɛlɛ wà aà dɛ. Aalɛ vĩakɛɛ̀, asa aà yãdaanɛ́ ì di bilawa piiɛ. 19Kɛ́ oosi kɛ̀, ɔ̃ Yesu ń a iwaɔ bɔ̀lɛ wɛ̃lɛu.

20Kɛ́ gu dɔ̀, aa bɛ zɛ́u, ɔ̃ aa figi lípi è, à giigàga e a zĩ́nau. 21Kɛ́ a yã dɔ̀ Piɛɛgu, ɔ̃ a ò Yesuɛ: Dii, figi lí pɔ ń kà gwae, à giigàgaɛ. 22Yesu ònɛ́: Àɔ Lua naai vĩ. 23Sĩana malɛ oɛ́, tó gbɛ̃́ ò sĩ̀sĩɛ beeɛ aà fɛlɛ à azĩa zu isiau, tó i seakɛ a nɔ̀sɛ guuo, tó a a naai vĩ kɛ́ yã pɔ á òpi a kɛ, a kɛɛ̀. 24Bee yãi malɛ oɛ́, tó álɛ wabikɛ, yã pɔ a a wabikɛ̀ pii, à dilɛ á è kɔ̀, í e. 25Tó a fɛlɛ álɛ wabikɛ, tó á ĩikũa ń gbɛ̃eo, à suuukɛaanɔ, á Mae pɔ ku musu i suuukɛánɔ ń á tàaeɔ sɔ̃. 26Tó i suuukɛ ń gbɛ̃́ɔo, á Mae pɔ ku musu a suuukɛánɔ ń á tàaeɔ sɔ̃o.

Yesu laa a ikoi

(Mat 21.23-27; Luk 20.1-8)

27Ɔ̃ aa kà Yelusalɛũ. Lá Yesu lɛ́ bɛbɛ Lua ua, sa'onkiaɔ ń Mɔizi ikoyãdanɛdeɔ ń gbɛ̃zɔ̃ɔɔ sɔ̃̀aazi 28aa aà là aa mɛ̀: Iko kpele nlɛ yãpiɔ kɛòi? Demɛ n gba yãpi kɛa zɛ́i? 29Yesu wèmá à mɛ̀: Má yã mɛndoe gbɛawá. À wea, mí iko pɔ malɛ yãpiɔ kɛò oɛ́ sa. 30À omɛɛ. Zãa gbɛ̃́ɔ da'ilɛkɛa#Maa 1.4-5 bɔ̀ Lua kĩi yã̀, ge gbɛ̃nazĩna kĩiɛ? 31Ɔ̃ aa lɛkpàaĩ aa mɛ̀: Tó wa mɛ̀ Lua kĩiɛ, a mɛ bɔyãi wi Zãa yãsio niɛ. 32Tó wa mɛ̀ gbɛ̃nazĩna kĩiɛ sɔ̃, too. Aa bila vĩa vĩ, asa gbɛ̃pii Zãa ãnabikɛ sìɛ. 33Ɔ̃ aa wè Yesuwa aa mɛ̀: Wá dɔ̃o. Ɔ̃ Yesu ònɛ́: Mapi sɔ̃ má iko pɔ malɛ yãpiɔ kɛò oɛ́o.

Currently Selected:

Maa 11: Boo2024

Highlight

Copy