Maa 10

Nɔyaa

(Mat 19.1-12)

1Ɔ̃ Yesu bɔ̀ we à gɛ̀ Yude busuu e Yuudɛ̃ baale. Bila ɛ̀a kã̀aaaazi we, ɔ̃ à yãdànɛ́ lá ì kɛwa. 2Falisieɔ mɔ̀ likpalɛiwà, ɔ̃ aa aà là aa mɛ̀: Gɔ̃ɛ zɛ́ vĩ aà a na yaa? 3A wèmá à mɛ̀: Mɔizi dìlɛɛ́ kpelewa ni? 4Aa mɛ̀: Mɔizi gɔ̃ɛ gbà zɛ́ aàli ginzila kɛ̃́, aàli a na yaòɛ.#Iko 24.1-4 5Ɔ̃ Yesu ònɛ́: Á swãgbãa yãi Mɔizi bee dìlɛiɛ́. 6Za dũnia daalɛgɔɔ Lua gɔ̃ɛ kɛ̀ ń nɔɛoɛ.#Daa 1.27 7Ayãmɛto gɔ̃ɛ ì go a de ń a daowa, ì na a nawa, 8ɔ̃ aaì gɔ̃ lan sawakula ń gbalaowa.#Daa 2.24 Beewa aa ku dodo lɔo, aa gɔ̃̀ mɛdoũɛ. 9A yãi gbɛ̃́ pɔ Lua ń nákɔ̃waɔ, gbɛ̃e su ń kɛ̃aao. 10Kɛ́ Yesu tà bɛ, aà iwaɔ aà là yãpi mii. 11Ɔ̃ a ònɛ́: Gbɛ̃́ pɔ a na yà à a pãle sɛ̀ gbãsĩkɛ̀ a nɔ sɛ̃ia yãmusun we. 12Nɔɛ pɔ gì a zã́zi à zã́ pãle kɛ̀ sɔ̃, à gbãsĩkɛ̀n we.

Kpala pɔ Lua kpàá zĩabusanaɔ pɔɛ

(Mat 19.13-15; Luk 18.15-17)

13Wàlɛ mɔ́ Yesuɛ ń nɛɔ aà ɔnamá, ɔ̃ aà iwaɔ lɛ́ ginɛ́. 14Kɛ́ Yesu è màa, i kɛɛ̀ nao, ɔ̃ a ònɛ́: À to nɛɔ mɔ ma kĩi, ásu ginɛ́o, asa kpala pɔ Lua kpàá gbɛ̃́ bee taaɔ pɔɛ. 15Sĩana malɛ oɛ́, gbɛ̃́ pɔ i kpala pɔ Lua kpà yã sí lan nɛwao a gɛ̃uo. 16Ɔ̃ à nɛɔ sɛ̀, à ń kpakpà a kuɛ, à ɔnànamá à baaadàńgu.

Ɔde

(Mat 19.16-30; Luk 18.18-30)

17Kɛ́ Yesu dà zɛ́u àlɛ gɛ́, ɔ̃ gɔ̃ɛe baalɛ̀, à mɔ̀ kùlɛ aà aɛ, à aà là à mɛ̀: Mɛtulu maa, kpelewa má kɛ mà aizãna ei? 18Ɔ̃ Yesu òɛ̀: Bɔyãi ń òmɛɛ má maai? Gbɛ̃e maao, sé Lua ado. 19Ń ikoyãɔ dɔ̃: Nsuli gbɛ̃́ dɛo, nsuli wulɛ ń gbɛ̃pãle nɔoo, nsuli kpãi'oo, nsuli yãdɔ n gbɛ̃deewao, nsuli gbɛ̃bleo, nìli n de ń n dao kpɛla.#Bɔa 20.12-16 20Ɔ̃ à mɛ̀: Mɛtulu, za ma nɛfɛ̃nɛngɔɔ má yã beeɔ kũa piiɛ. 21Ɔ̃ Yesu aà gwà ń yenzi wɛ́o a òɛ̀: Yã gɔ̃̀nɛ mɛndo. Gɛ ǹ pɔ pɔ ń vĩɔ yia pii, ní a ɔ̃a kpá taasideɔwa, ní mɔ ǹ tɛmazi, ńyɔ̃ɔ aizɛɛ vĩ luabɛ.

22Ɔ̃ gɔ̃ɛpi oosìsi yãpi yãi, à tà ń pɔsiao, kɛ́ aà aizɛɛɔ dasi yãi. 23Ɔ̃ Yesu wɛpã̀ a iwaɔla a ònɛ́: Aizɛɛde gɛ̃a kpala pɔ Lua kpà guu zĩ'ũ. 24Yãpi bɔ̀ aà iwaɔ saɛ, ɔ̃ Yesu ɛ̀a ònɛ́: Ma gbɛ̃́ɔ, gɛ̃a kpala pɔ Lua kpà guu zĩ'ũ fa! 25Yiongo gɛ̃a abaawɛu àa dɛ ɔde gɛ̃a kpala pɔ Lua kpà guula. 26Ɔ̃ yãpi aà iwaɔ kũ̀ gbãa, aalɛ okɔ̃ɛ aa mɛ̀: Tó màaɛ, demɛ a bɔi? 27Yesu ń gwa soee à mɛ̀: Gbɛ̃nazĩna a fɔ̃o, sema Lua, asa Lua yãpii zɛ́ vĩɛ.

28Ɔ̃ Piɛɛ òɛ̀: Wapiɔ sɔ̃ bɛ? Wa pɔpii tò weɛ, ɔ̃ wa bɔ tɛnzi. 29Yesu mɛ̀: Sĩana malɛ oɛ́, gbɛ̃́ pɔ a bɛ tò we ge a vĩiɔ ge a dãunaɔ ge a da ge a mae ge a nɛɔ ge a bua ma yãi ń ma baona yão, 30ade a ɛa bɛɔ ń vĩiɔ ń dãunaɔ ń daɔ ń nɛɔ ń búaɔ e lɛɛ basɔo dũnia tiaɛ bee guu ń ĩadamao lɔ, i aizãna e dũnia pɔ a mɔ guu. 31Dasi pɔ dɔaaaɔ gɔ̃ zã́, mɛ́ dasi pɔ tɛ́ zã́ɔ gɔ̃ dɔaaa.

Yesu a gaa ń a vuao yã'oa

(Mat 20.17-19; Luk 18.31-34)

32Aa ɛ̀a dà zɛ́u, aalɛ gɛ́ Yelusalɛũ. Yesu dɔaaa a iwaɔnɛ, ɔ̃ yãpi bɔ̀ ń saɛ, mɛ́ vĩa gbɛ̃́ pɔ tɛ́ aà kpɛɔ kũ̀. Ɔ̃ Yesu lìlɛ ń a iwa gbɛ̃ɔn kuɛplaɔ, à ɛ̀a yã pɔ asu a le ònɛ́ lɔ 33à mɛ̀: À ma! Wálɛ gɛ́ Yelusalɛũɛ. We wa Gbɛ̃nazĩn Nɛ kpáu sa'onkiaɔ ń Mɔizi ikoyãdanɛdeɔwa, aai yãdaaala, aai aà kpa luayãdɔ̃nsaiɔwa wi aà dɛ. 34Aa aà kɛ pɔɔpɔɔ, aa lɛ'ikakawà, aai aà gbɛ̃ ń flaalao, wi aà dɛ, a gɔɔ aaɔ̃dezĩ i vu.

Zaki ń Zãao wabikɛa

(Mat 20.20-28)

35Ɔ̃ Zebede nɛɔ Zaki ń Zãao sɔ̃̀ Yesuzi aa òɛ̀: Mɛtulu, wá ye ǹ yã pɔ wálɛ a wabikɛma kɛwɛ̃ɛ. 36Ɔ̃ à ń lá à mɛ̀: Bɔ́ á ye mà kɛɛ́i? 37Aa wèwà aa mɛ̀: Wá gba zɛ́ wà zɔ̃lɛnnɔ tó n mɔ ń n gawio, gbɛ̃do n ɔplaai, gbɛ̃do ɔzɛɛi. 38Yesu ònɛ́: Á yã pɔ álɛ a wabikɛa dɔ̃o. Kɛɛona pɔ má a imi, á fɔ̃ mia? Ga pɔ má siu, á fɔ̃ siua? 39Aa wèwà aa mɛ̀: Wá fɔ̃́. Ɔ̃ Yesu ònɛ́: Í pɔ má mi, á mi, mɛ́ ga pɔ má siu, á siu, 40ãma zɔ̃lɛa ma ɔplaai ge ɔzɛɛiá ma yã no. Gbɛ̃́ pɔ Lua kɛ̀kɛnɛ́ɔ pɔɛ.

41Kɛ́ iwa gbɛ̃ɔn kwi kĩniɔ yãpi mà, an pɔ pà Zaki ń Zãaozi. 42Ɔ̃ Yesu ń kãaa a ònɛ́: Á dɔ̃ kɛ́ gbɛ̃́ pɔ wàlɛ ń gwa busu gbɛ̃zɔ̃ɔɔ ũɔ ì gbãable ń gbɛ̃́ɔwaɛ. Màa gbãadeɔ ì ikokɛmá lɔ. 43Ãma a dɛánɔ màao. Á guu gbɛ̃́ pɔ ye gɔ̃ gbɛ̃zɔ̃ɔ ũ, aà gɔ̃ á dɔnlɛde ũ. 44Màaɛ lɔ gbɛ̃́ pɔ ye gɔ̃ á dɔaana ũ, aà gɔ̃ ápii zɔblena ũ.#Maa 9.35 45Asa Gbɛ̃nazĩn Nɛ i mɔ wà dɔnlɛkɛɛ yãio, à mɔ̀ dɔińlɛɛ, i a wɛ̃ni kpa gbɛ̃́ɔ boa dasi yãi.

Vĩ̀a baakɛna gbãgbãa

(Mat 20.29-34; Luk 18.35-43)

46Aa kà Yeliko. Lá Yesu lɛ́ bɔ we ń a iwaɔ ń bilao, vĩ̀a baakɛna Timɛ nɛ Baatimɛ zɔ̃lɛa zɛ́lɛ. 47Kɛ́ a mà Yesu Nazalɛti mɛ́ lɛ́ gɛ̃, ɔ̃ à nà lɛ́ gbãa zuawa à mɛ̀: Davidi Bui Yesu, ma wɛ̃nagwa! 48Ɔ̃ dasi lɛ́ gíɛ̀, wàlɛ mɛ aà nilɛ. Ɔ̃ aà lɛzua gbãa kã̀fĩ à mɛ̀: Davidi Bui, ma wɛ̃nagwa. 49Yesu zɛ̀, à mɛ̀ wà aà sisi. Ɔ̃ wà vĩ̀api sìsi wa òɛ̀: Sɔ̃dilɛ ǹ fɛlɛ, àlɛ n sisi. 50Ɔ̃ vĩ̀api a zwãa wòlo à vĩ̀ pɛ̀lɛ à mɔ̀ Yesu kĩi. 51Ɔ̃ Yesu aà là à mɛ̀: Bɔ́ ń ye mà kɛnɛi? Vĩ̀api wèwà à mɛ̀: Dii, má ye màɔ gu'eɛ. 52Ɔ̃ Yesu òɛ̀: Gɛ́, ma naai pɔ ń kɛ̀ mɛ́ n gbãgbã̀. Wegɔ̃ɔ à gu'è, ɔ̃ à bɔ̀ tɛaazi.

Currently Selected:

Maa 10: Boo2024

Highlight

Copy