Luk 4

Yesu yɔ̃a

(Mat 4.1-11; Maa 1.12-13)

1Yesu lɛ́ su ń Yuudɛ̃o, a paa ń Lua Nisĩnao, ɔ̃ Nisĩnapi gɛ̀aanɔ gbáau. 2Ibiisi aà yɔ̃̀ we e gɔɔ bla. Gɔɔpi i pɔe bleo. Kɛ́ gɔɔ blapi pà, nɔana lɛ́ aà dɛ. 3Ɔ̃ Ibiisi òɛ̀: Tó Lua Nɛn n ũ, o gbɛɛ bee li pɛ̃ɛ ũ. 4Yesu wèwà à mɛ̀: Wa kɛ̃̀ wà mɛ̀:

Pɔblea ɔ̃ gbɛ̃nazĩna kuò adoo.#Iko 8.3

5Ɔ̃ Ibiisi aà sɛ̀ gɛ̀aanɔ musu, ɔ̃ à dũnia kpalaɔ ɔlɔ̀ɛ̀ pii a zɛgbɛu gɔ̃̀ɔ 6à mɛ̀: Má n gba iko beeɔ pii ń a gawio. A ku ma ɔzĩɛ, gbɛ̃́ pɔ má yei má kpawà. 7Tó n kulɛmɛɛ lé, a gɔ̃ n pɔ ũ piiɛ. 8Yesu wèwà à mɛ̀: Wa kɛ̃̀ wà mɛ̀:

Kulɛ Dii n Luaɛ, níɔ zɔbleɛ̀ ado.#Iko 6.13

9Ɔ̃ à gɛ̀aanɔ Yelusalɛũ, à aà zɛ̀ luakpɛ musu à mɛ̀: Tó Lua Nɛn n ũ, ɔkpa nzĩai, 10asa a kɛ̃a wà mɛ̀:

Lua a n yã'o a malaikaɔnɛ

aa n dɔ̃́a.

11Wà mɛ̀ lɔ:

Aa ɔdama,

kɛ́ nsu gɛ̃nalɛ gbɛwao yãi.#Soũ 91.11-12

12Yesu wèwà à mɛ̀: Wà mɛ̀,

nsuli Dii n Lua lɛ ǹ gwao.#Iko 6.16

13Kɛ́ Ibiisi Yesu yɔ̃̀ ń yãpiio a làa, ɔ̃ à aà tò we e gɔɔ pãle.

Nazalɛtideɔ gia Yesu naaikɛi

(Mat 13.53-58; Maa 6.1-6)

14Yesu ɛ̀a tà Galile ń Lua Nisĩna gbãao, ɔ̃ aà tɔ́ lì busupia pii. 15Ì yãdadanɛ́ ń luasisikpɛɔ guu, mɛ́ gbɛ̃pii ì aà tɔnasi.

16Ɔ̃ à gɛ̀ Nazalɛti, gu pɔ à nɛblèu. Kãmabogɔɔ à gɛ̀ luasisikpɛu lá ì kɛwa. À fɛ̀lɛ à kyokɛ, 17ɔ̃ wà ãnabi Isaia taala kpàwà. Kɛ́ a pòo, à bɔ̀ gu pɔ wà yãɛ bee kɛ̃̀uwa wà mɛ̀:

18Dii Nisĩna kua.

À ma sɛ mà baonakpa taasideɔnɛ,

à ma zĩ mà gɔ̃a wɛ̃ɛɔ ũ kpawakɛ

gbɛ̃́ pɔ aa ńzĩa vĩoɔnɛ,

mà wɛwɛ̃a kpawakɛ vĩ̀aɔnɛ,

mà gbɛ̃́ pɔ yeaɔ polo,

19mí Dii gbɛ̃kɛkɛnɛgɔɔ kpawakɛ.#Isa 61.1-2

20Ɔ̃ à lápi kòo a kpà dɔnlɛdewa, ɔ̃ à zɔ̃̀lɛ. Gbɛ̃́ pɔ aa ku kpɛ́uɔ wɛ́ fĩwà pii. 21Ɔ̃ à yãsɛ̀ à mɛ̀: Lua yãɛ bee pà gbã, lá álɛ maɛwa. 22Yãmaa pɔ dɔ aà lɛ́u bɔ̀ ń saɛ pii, ɔ̃ aalɛ aà tɔnasi. Ɔ̃ aa mɛ̀: Yosɛfu nɛ nolo?

23Ɔ̃ a ònɛ́: Má dɔ̃ sãasã kɛ́ á yaasiɛ bee kɛmɛɛ. Tó ń lootoo ũ, ǹ nzĩa gbãgbã. Á omɛɛ mà yã pɔ á mà má kɛ̀ Kapɛnaũ kɛ ma bɛ wɛ̃lɛu la lɔ. 24Sĩana malɛ oɛ́, ãnabi líɔ gbia a bɛ wɛ̃lɛuo. 25Sĩana malɛ oɛ́, kɛ́ musu zɛ́ tà Ɛlia gɔɔ, gyaa gbɛ̃andoɔ ku dasi. Lou i mao e wɛ̃̀ aaɔ̃ ń mɔ sooloo,#1 Kia 17.1 mɛ́ nɔan zɔ̃ɔ kà Isaili busuu pii, 26kási Lua i Ɛlia zĩ an keewao, sema gyaa pɔ ku Salɛpa wɛ̃lɛu Sidɔ̃ saɛ.#1 Kia 17.8-16 27Ãnabi Ɛlizi gɔɔ sɔ̃, Isaili busu kusudeɔ diɛ, kási i ń kee gbãgbão, sema Sili busu gbɛ̃́ Naama.#2 Kia 5.1-14

28Kɛ́ gbɛ̃́ pɔ ku luasisikpɛuɔ yãpi mà pii, an pɔ pà maamaa. 29Ɔ̃ aa bɔ̀ ń Yesuo wɛ̃nkpɛ, aa gɛ̀aanɔ sĩ̀sĩ pɔ an wɛ̃lɛ kalɛ a pɔlɛu musu, kɛ́ wà ɔzɔ̃aazi zĩlɛ yãi. 30Ɔ̃ à bɔ̀ ń guu à tà.

Yesu kua Kapɛnaũ

(Mat 8.14-17; Maa 1.21-39)

31Yesu tà Kapɛnaũ, ɔ̃ àlɛ yãdadanɛ́ Galile busu wɛ̃lɛpiu kãmabogɔɔzĩ. 32Aà yãdaanɛ́ bɔ̀ ń saɛ, asa aà yã iko vĩɛ. 33Gɔ̃ɛ tãadee ku luasisikpɛu we, ɔ̃ à wii gbãa lɛ̀ à mɛ̀: 34Ee! Bɔ́ wá vĩ ń kɔ̃oi Yesu Nazalɛti? N mɔ wá kaalɛi yã? Má dɔ̃ gbɛ̃́ pɔ ń dɛ a ũ, Lua gbɛ̃́ pɔ a kua adoan n ũ. 35Ɔ̃ Yesu gì tãapiɛ à mɛ̀: Kɛ kílikili! Go gɔ̃ɛpiwa. Ɔ̃ tãapi gɔ̃ɛpi nɛ̀ dasi guu à gòwà, i aà kɛ'ĩao. 36Gbɛ̃pii bilikɛ̀, aalɛ kɔ̃lala aa mɛ̀: Bɔtaa bui yãn wei? Gwa, ì yãdilɛ tãaɔnɛ ń iko gbãao, ɔ̃ aaì gɛ̃zɛa. 37Ɔ̃ aà bao lì busupia gupiiu.

38Kɛ́ à bɔ̀ luasisikpɛu, ɔ̃ à tà Simɔ bɛ. Simɔ nada lɛ́ mɛwãakɛ maamaa, ɔ̃ wà a yã'òɛ̀. 39Yesu zɛ̀ aà mizĩ à gì mɛwãapiɛ, ɔ̃ aà mɛ nìni. Wegɔ̃ɔ à fɛ̀lɛ blɛkɛ̀nɛ́.

40Kɛ́ ĩatɛ̃ gɛ̃̀ kpɛ́u, gbɛ̃́ pɔ gyãe vĩɔ mɔ̀ńnɔ Yesuɛ, ɔ̃ à ɔnàna ń baadewa, à ń gbãgbã̀ ń ń gyã bui dasio. 41Tãaɔ lɛ́ go gbɛ̃́ɔwa ń wiio dasi lɔ aa mɛ̀: Lua Nɛn n ũ. Ɔ̃ à gìnɛ́ aa yã'o, kɛ́ aa aà dɔ̃̀ Mɛsi ũ yãi.

42Kɛ́ gu dɔ̀, Yesu bɔ̀ wɛ̃lɛu à gɛ̀ gusaɛna, ɔ̃ bila lɛ́ aà wɛɛlɛ. Kɛ́ aa bɔ̀wà, aalɛ giɛ̀ aà ń to we. 43Ɔ̃ a ònɛ́: Sema mà kia pɔ Lua kpà baokpa wɛ̃lɛ kĩniɔnɛ lɔ, asa a yãi Lua ma zĩi. 44Ɔ̃ à gɛ̀ àlɛ waasokɛ Yudaɔ luasisikpɛɔ guu.

Currently Selected:

Luk 4: Boo2024

Highlight

Copy