Zãa 13

Yesu a iwaɔ gbapipia

1E Gɛ̃amusu dikpɛ àɔ ká, Yesu dɔ̃ kɛ́ a bɔa dũniaɛ bee guu taa a Mae kĩi gɔɔ kà. Lá a ye a gbɛ̃́ɔzi dũniau, a yeńzi e a wɛ̃ni lɛ́waɛ.

2Aalɛ pɔble. Ibiisi dà Simɔ Isaliɔti nɛ Yudasiɛ a sɔ̃u kɔ̀, kɛ́ aà Yesu kpamá. 3Yesu dɔ̃ kɛ́ a Mae pɔpii nàɛ a ɔzĩ. A dɔ̃ kɛ́ a bɔ Lua kĩi, mɛ́ a ɛa álɛ tá aà kĩiɛ. 4Gɔɔ pɔ aalɛ pɔble, Yesu fɛ̀lɛ à a ula bɔ̀ a kàlɛ, ɔ̃ à savɛti sɛ̀ a dɔ̀ a pi. 5Bee gbɛa à ikà ta guu, ɔ̃ à nà a iwaɔ gbapipiawa, àlɛ waa ń savɛti pɔ a dɔ̀ a pipio. 6Kɛ́ à kà Simɔ Piɛɛ kĩi, Piɛɛ òɛ̀: Dii, mmɛ ńyɔ̃ ma gbapipimɛɛa? 7Yesu wèwà à mɛ̀: Ń yã pɔ malɛ kɛ dɔ̃ gĩ́ao. Ńyɔ̃ dɔ̃ gbɛzã. 8Piɛɛ òɛ̀ à mɛ̀: Ńyɔ̃ ma gbapipimɛɛ bauo. Yesu òɛ̀: Tó mi n gbapipio, wáɔ yãe vĩ ń kɔ̃o lɔo. 9Simɔ Piɛɛ òɛ̀: Dii, i kɛ ma gbáɛ adoo, ma ɔ ń ma mioɛ lɔ. 10Yesu òɛ̀: Gbɛ̃́ pɔ zu'ò bàa ku ń a gue pipiaoo, sema aà gbá, asa a zɛ̃aɛ. Á gbãsĩo, ãma i kɛ ápii no. 11A dɔ̃ gbɛ̃́ pɔ asu à a kpamá. A yãi à mɛ̀ aa gbãsĩsai mpiio.

12Kɛ́ à ń gbapìpinɛ́ a làa, à a ula sɛ̀ a dà, ɔ̃ à zɔ̃̀lɛ lɔ. A ònɛ́: A yã pɔ má kɛ̀ɛ́ dɔ̃̀a? 13I omɛɛ Mɛtulu ge Dii. Álɛ o a zɛ́waɛ, asa má dɛ a ũɛ. 14Lá ma gbɛ̃́ pɔ má dɛ á dii ń á yãdanɛdeo ũ ma á gbapìpiɛ́, àliɔ kɔ̃ gbapipi sɔ̃. 15Ma a taa kɛ̀ɛ́. Àliɔ kɛ lá má kɛ̀ɛ́wa. 16Sĩana malɛ oɛ́, zɔblena líɔ dɛ a diilao, zĩna líɔ dɛ gbɛ̃́ pɔ a zĩlao. 17Lá a yãpi dɔ̃̀, baaadeɔn á ũ tó álɛ kɛ. 18I kɛ ápii yã malɛ oo. Má gbɛ̃́ pɔ má ń sɛ́ɔ dɔ̃. Sema yã pɔ wa kɛ̃̀ɛ bee pa wà mɛ̀:

Gbɛ̃́ pɔ wi ɔkãaa ta doũ mɛ́ bɔ̀ ma kpɛ.#Soũ 41.10

19Malɛ oɛ́ tia e àɔ gɛ́ mɔi, kɛ́ tó à mɔ̀, á sí mamɛ má aà ũ. 20Sĩana malɛ oɛ́, tó gbɛ̃́ gbɛ̃́ pɔ má zĩ̀ dìlɛ, à ma dilɛɛ. Tó gbɛ̃́ ma dilɛ sɔ̃, à gbɛ̃́ pɔ ma zĩ dìlɛɛ.

Yesu dɔaa Yudasi ń Piɛɛo yã'oa

(Mat 26.20-35; Maa 14.17-31; Luk 22.21-34)

21Kɛ́ Yesu bee ò, tolobi zùaagu, ɔ̃ a ònɛ́ wasawasa à mɛ̀: Sĩana malɛ oɛ́, á gbɛ̃do mɛ́ a ma kpamá. 22Ɔ̃ aà iwaɔ kɔ̃ gwàgwa, aa bilikɛ̀ gbɛ̃́ pɔ àlɛ owa. 23Iwa mɛndo pɔ Yesu yeaazi gɛngɛsɛkɛa aà saɛ. 24Ɔ̃ Simɔ Piɛɛ lɛsuikɛ̀ɛ̀ aà Yesu la gbɛ̃́ pɔ àlɛ o. 25Ɔ̃ iwapi sɔ̃kpàlɛ Yesuzi à aà là à mɛ̀: Dii, dé ni? 26Yesu wèwà à mɛ̀: Má lɔmazɔ̃ dowa, mí kpá adewa. Ɔ̃ à lɔmazɔ̃̀ dowa a kpà Simɔ Isaliɔti nɛ Yudasiwa. 27Kɛ́ Yudasi lɔmapi sì, Setãu dìɛ̀ gɔ̃̀ɔ. Ɔ̃ Yesu òɛ̀: Yã pɔ nlɛ kɛ kɛ kpakpa. 28Gbɛ̃́ pɔ aalɛ pɔbleɔ, an gbɛ̃e i dɔ̃ bɔyãi Yesu bee òiɛ̀o. 29Lá Yudasi mɛ́ ìɔ mɔbɔɔ kũa, ɔ̃ gbɛ̃eɔ lɛ́ e Yesu òɛ̀ aà gɛ́ dikpɛ pɔ pɔ aa yeiɔ luiɛ ge aà gɛ́ pɔe kpai taasideɔwaɛ. 30Kɛ́ Yudasi lɔmapi sì, à bɔ̀ gɔ̃̀ɔ. Gɔɔ bee sɔ̃ gwãɛ.

31Kɛ́ Yudasi bɔ̀, Yesu mɛ̀: Tiasa Gbɛ̃nazĩn Nɛ a tɔbɔ, mɛ́ Lua a tɔbɔ aà yãmusu. 32Tó Lua tɔbɔ̀ aà musu sɔ̃, Lua a aà tɔbɔ a kĩi mɛ́ a bɔ gɔ̃̀ɔɛ. 33Ma gbɛ̃́ɔ, ma kuaánɔ gɔ̃̀ yɔɔɛ. Á ma wɛɛlɛ, ãma malɛ oɛ́ tia lá má ò gbãadeɔnɛwa, á fɔ̃ mɔ gu pɔ malɛ táuo.#Zãa 7.34 34Malɛ yã dafu dilɛɛ́ɛ, àliɔ yekɔ̃i. Lá má yeázi, apiɔ sɔ̃ àliɔ yekɔ̃i màa. 35Tó á yekɔ̃i, ɔ̃ gbɛ̃pii a á dɔ̃ ma iwaɔ ũ.

36Simɔ Piɛɛ aà là à mɛ̀: Dii, nlɛ tá má ni? Yesu wèwà à mɛ̀: Gu pɔ malɛ táu, ńyɔ̃ fɔ̃ ǹ tɛmazi gĩ́ao. Gbɛzã ɔ̃ ńyɔ̃ mɔ́. 37Piɛɛ òɛ̀: Dii, bɔyãi má fɔ̃ mà tɛnzi tiao ni? Má a wɛ̃ni kpa n yãi. 38Yesu mɛ̀: Ńyɔ̃ n wɛ̃ni kpa ma yãi ló? Sĩana malɛ onɛ, e ko àɔ lɛzu, ńyɔ̃ lelekpamazi gɛ̃n aaɔ̃.

Currently Selected:

Zãa 13: Boo2024

Highlight

Copy