Zãa 12

Tulalekaa Yesu gbáɔwa

(Mat 26.6-13; Maa 14.3-9)

1Gɛ̃amusu dikpɛ gɔ̃̀ gɔɔ soolo, ɔ̃ Yesu mɔ̀ Bɛtani, Lazaa pɔ à aà vù à aà bɔ̀ gau bɛ wɛ̃lɛu. 2Wà blɛkɛ̀ Yesuɛ we. Maata mɛ́ lɛ́ blɛ kpaalɛ, mɛ́ Lazaa ku blɛblenaɔ guu ń Yesuo. 3Ɔ̃ Maliama tulale bui maa ɔde sɛ̀ mɔ̀ò, à kà litili guo, ɔ̃ a kà Yesu gbáɔwa à aà gbápiɔ wàa ń a mikão. Tulale gĩ lì kpɛ́a. 4Yesu iwaɔ do, Yudasi Isaliɔti pɔ a Yesu kpamá mɛ̀: 5Tulale bee ɔ̃a kà wɛ̃̀ do zĩ ɔ̃a ũ. Bɔyãi wi yia wà a ɔ̃a kpà taasideɔwao ni? 6I bee o taasideɔ wɛ̃nagwaa yãi no, kɛ́ kpãiɛ yãiɛ. Ɔ̃mɛ ìɔ mɔbɔɔ kũa, ìɔ ɔ̃a kĩni kuluyeye. 7Ɔ̃ Yesu mɛ̀: Nɔɛpi toò. Aà bee ulɛ e ma gɛ̀ kpɛlagɔɔ. 8Taasideɔ kuanɔ gɔɔpiiɛ,#Iko 15.11 ãma máɔ kuanɔ gɔɔpiio.

9Yudaɔ mà Yesu ku Bɛtani, ɔ̃ aa gɛ̀ we dasidasi. I kɛ Yesu yãi aa gɛ̀i adoo, kɛ́ aa Lazaa pɔ Yesu aà bɔ̀ gau e lɔ yãiɛ. 10Ɔ̃ sa'onkiaɔ zɛ̀ò wà Lazaa dɛ lɔɛ, 11asa aà yãi ɔ̃ gbãadeɔ lɛ́ kɛ̃má dasi, aalɛ Yesu naaikɛ.

Gbãakpaa Yesuzi Yelusalɛũ

(Mat 21.1-11; Maa 11.1-11; Luk 19.28-40)

12Kɛ́ a gu dɔ̀, bila pɔ mɔ̀ dikpɛuɔ mà Yesu lɛ́ mɔ́ Yelusalɛũ, 13ɔ̃ aa damina láɔ zɔ̃̀zɔ̃ aa gɛ̀ daiòaalɛ. Aalɛ wiilɛ aalɛ mɛ:

Gbãakɛ!

Baaade gbɛ̃́ pɔ lɛ́ mɔ́ ń Dii tɔ́o!

Baaade Isailiɔ Kia!#Soũ 118.25-26

14Yesu zaa'ĩna è, à dìkpɛ lá wa kɛ̃̀wa wà mɛ̀:

15Siɔnadeɔ, ásu vĩakɛo.

Á kia lɛ́ mɔ́ dia zaa'ĩn bɔlɔ kpɛ.#Zkl 9.9

16Aà iwaɔ i yãpi mi dɔ̃ gĩ́ao. Yesu fɛlɛ taa gawi guu gbɛa ɔ̃ aa dɔ̃̀ sa kɛ́ wà yãpi kɛ̃̀ aà yãmusuɛ, mɛ́ mpiɔ wà apii kɛ̀ɛ̀. 17Kɛ́ Yesu lɛzù Lazaazi miau, à aà vù à bɔ̀ gɛɔ guu, gbɛ̃́ pɔ kuaanɔɔ a baokpàkpanɛ́. 18A yãi bila gɛ̀ daiaalɛ, asa aa mà à dabudabupi kɛ̀ɛ. 19Ɔ̃ Falisiɔ òkɔ̃ɛ aa mɛ̀: Á èa? Wá fɔ̃ pɔe wowào. Gwa, dũnia bɔ̀ tɛaazi.

Yesu a ga yã'oa

20Gɛlɛkieɔ ku gbɛ̃́ pɔ aa mɔ̀ luasisi dikpɛuɔ guu, 21ɔ̃ aa gɛ̀ Bɛsaida pɔ ku Galile gbɛ̃́ Filipi kĩi, aa wabikɛ̀wà aa mɛ̀: Mae, wá ye Yesu kɔ̃'eai. 22Filipi gɛ̀, a ò Ãndeleɛ, ɔ̃ aa gɛ̀ aa ò Yesuɛ sãnu. 23Yesu ònɛ́: Gbɛ̃nazĩn Nɛ tɔbɔgɔɔ kà. 24Sĩana malɛ oɛ́, tó pɔwɛna i gɛ̃ tíu à fɔ̃mbasikɛ̀o, ìɔ ku adoɛ. Tó à fɔ̃mbasikɛ̀, ɔ̃ ì nɛ'i maamaa. 25Gbɛ̃́ pɔ ye a wɛ̃nii, wɛ̃nipi a piliwà. Gbɛ̃́ pɔ i a wɛ̃ni gwa pɔe ũ dũniaɛ beeu sɔ̃o, ade a wɛ̃ni laasai e. 26Tó gbɛ̃́ ye zĩkɛmɛɛ, aàɔ tɛmazi, ma zĩkɛnapi iɔ ku gu pɔ má kuu. Tó gbɛ̃́ lɛ́ zĩkɛmɛɛ, ma Mae a aà kpɛla.

27Tiasa ma pɔ yà. Kpelewa má oi? Mà o, Baa, ma bɔ yã pɔ lɛ́ mɔau yã? Aawo! Ma mɔ yã pɔ lɛ́ mɔapi yãiɛ. 28Baa, tɔbɔ. Ɔ̃ yã'o bɔ̀ musu à mɛ̀: Má bɔ̀ kɔ̀, mɛ́ má ɛa mà bɔ lɔ. 29Kɛ́ bila pɔ ku we mà aa mɛ̀: Lou mɛ́ vĩ̀. Gbɛ̃eɔ mɛ̀: Malaika mɛ́ yã'òɛ̀. 30Ɔ̃ Yesu ònɛ́: I kɛ ma yãi yã'opi bɔ̀io, á yãiɛ. 31Yã a zɔ̃lɛ dũniaɛ beewa sa. Wa dũniaɛ bee kia bɔ kpalau sa. 32Mapi sɔ̃, tó wà ma sɛ wà ma dɔ musu, má bui pii galɛ mà suò ma kĩi. 33Kɛ́ Yesu ò màa, à dɔ̀aa àlɛ ga pɔ asu ga yã'oɛ.

34Ɔ̃ bila òɛ̀: Wá mà a ku ikoyã láu wà mɛ̀, Mɛsi aɔ ku gɔɔpiiɛ,#Soũ 110.4; Isa 9.6; Dan 7.14 mɛ́ n mɛ̀ wa Gbɛ̃nazĩn Nɛ sɛ dɔ musu sɔ̃ bɛ? Demɛ Gbɛ̃nazĩn Nɛpi ũi? 35Yesu wèmá à mɛ̀: Gupua kuaánɔ gɔ̃̀ yɔɔɛ. Gɔɔ pɔ á gupuapi vĩ, àɔ bɛu, kɛ́ gu su siwáo yãi. Gbɛ̃́ pɔ bɛ gusiau líɔ dɔ̃ gu pɔ àlɛ gɛ́uo. 36Gɔɔ pɔ á gupua vĩ, à gupuapi naaikɛ, í gɔ̃ gupua gbɛ̃́ɔ ũ. Kɛ́ Yesu ò màa, ɔ̃ à gɛ̀ ùlɛnɛ́.

Yuda gbãadeɔá Yesu naaikɛnsaiɔnɛ

37Baa ń dabudabu pɔ a kɛ̀ ń wáa dasikɛo, aai aà naaikɛo, 38kɛ́ yã pɔ ãnabi Isaia ò e pa yãi à mɛ̀:

Dii, gbɛ̃e i bao pɔ wá kpà sio.

Wà n gbãa è, wi dɔ̃o.#Isa 53.1

39Aai we wà aà naaikɛ̀o, asa Isaia ò lɔ:

40Lua ń wɛ́ vĩ̀akũ̀nɛ́ kɛ́ aasu gu'eo,

à ń nɔ̀sɛ tàtanɛ́

kɛ́ aasu yãma aa ɛa suwa,

i ń gbãgbão yãi.#Isa 6.10

41Isaia bee ò kɛ́ à Yesu gawi è#Isa 6.1 yãiɛ, ɔ̃ à aà yã'ò. 42Ń beeo gbãadepiɔ Yesu naaikɛ̀ dasi. Falisiɔ yãi ɔ̃ aaliɔ ye wà dɔ̃máo, kɛ́ wasu luasisikpɛ zɔ̃nɛ́o yãi. 43Asa aa ye gbɛ̃nazĩnaɔ ń saaukpa dɛ Lua ń saaukpaa.

44Ɔ̃ Yesu pũ̀na à mɛ̀: Gbɛ̃́ pɔ lɛ́ ma naaikɛ, i kɛ mapi àlɛ ma naaikɛ adoo, àlɛ gbɛ̃́ pɔ ma zĩ naaikɛɛ lɔ. 45Gbɛ̃́ pɔ lɛ́ ma e lɛ́ gbɛ̃́ pɔ ma zĩ eɛ lɔ. 46Ma mɔ dũniau gupua ũɛ, kɛ́ gbɛ̃́ pɔ lɛ́ ma naaikɛ su àɔ ku gusiau lɔo. 47Gbɛ̃́ pɔ ma yãmà mɛ́ a kũao, i kɛ mamɛ má yãdaaalao, asa mi mɔ yãdai dũniala no, ma mɔ dũnia suabaiɛ. 48Gbɛ̃́ pɔ gìmazi mɛ́ i ma yãsio, yãkpalɛ lɛ́ aà dãɛ. Yã pɔ má dàɛ̀pi mɛ́ a zɔ̃lɛwà gɔɔgbɛzãzĩ. 49Asa mi yãe o ń mazĩaoo. Yã pɔ má ò ń yã pɔ má dànɛ́o, ma Mae pɔ ma zĩ mɛ́ dìlɛmɛɛ. 50Má dɔ̃ kɛ́ yã pɔ a nàmɛɛ ma ɔzĩá wɛ̃ni laasai yãɛ. Beewa yã pɔ malɛ o, malɛ o lá ma Mae òmɛɛwaɛ.

Currently Selected:

Zãa 12: Boo2024

Highlight

Copy