Daa 30

1Kɛ́ Lasɛli è álɛ nɛ'i ń Yakɔbuoo, à gɔ̃akpà ń a vĩio. Ɔ̃ a ò Yakɔbuɛ: Nɔdɔmagu. Tó mi e sɔ̃o, má gaɛ. 2Yakɔbu pɔ pàaazi à mɛ̀: Mamɛ má Lua ũa? Aapi mɛ́ gìnɛ ǹ nɛ'i. 3Ɔ̃ Lasɛli mɛ̀: Ma zɔnɔɛ Bila kɛ, gɛ ǹ iaanɔ, i nɛɔ imɛɛ, mí bui e sɔ̃ aà sabai. 4Ɔ̃ à a zɔnɔɛ Bila kpàwà nɔ ũ. Yakɔbu wùlɛaanɔ, 5ɔ̃ à nɔsì, à nɛ'ì gɔ̃ɛ ũ. 6Ɔ̃ Lasɛli mɛ̀: Lua zɛ̀manɔ, à ma yãmà, à ma gba nɛgɔ̃ɛ. Ɔ̃ à tɔkpàɛ̀ Dã.#30.6 Bee mɛ̀ yã bɔ̀ńnɔ na 7Lasɛli zɔnɔɛpi ɛ̀a nɔsì, à nɛ'ì gɔ̃ɛ ũ lɔ, 8ɔ̃ Lasɛli mɛ̀: Ma dɛ̃ɛ zɔ̃ɔ kà ń ma vĩio, ma dɛ̃ɛnɛ̀, ɔ̃ à tɔkpàɛ̀ Nɛfatali.#30.8 Bee mɛ̀ ma dɛ̃ɛ

9Kɛ́ Lea è a nɛ'i zɛ̀, ɔ̃ à a zɔnɔɛ Zilipa kpà Yakɔbuwa nɔ ũ sɔ̃. 10Ɔ̃ Lea zɔnɔɛpi nɛ'ì gɔ̃ɛ ũ ń Yakɔbuo. 11Ɔ̃ Lea mɛ̀: Minaɛ. Ɔ̃ à tɔkpàɛ̀ Gada.#30.11 Bee mɛ̀ mina 12Ɔ̃ Lea zɔnɔɛpi nɛ'ì gɔ̃ɛ ũ lɔ ń Yakɔbuo. 13Ɔ̃ Lea mɛ̀: Ma pɔ kɛ̀ na, asa nɔɛɔ o pɔnaden ma ũ. Ɔ̃ à tɔkpàɛ̀ Asɛɛ.#30.13 Bee mɛ̀ pɔna

14Lubɛni bɔ̀ esekɛkɛgɔɔ, à yenzi ɛsɛ è sɛ̃u, ɔ̃ a bòbo à sùò a da Leaɛ. Ɔ̃ Lasɛli òɛ̀: Ǹ n nɛ yenzi ɛsɛpi dãmɛɛ. 15Lea òɛ̀: Kɛ́ n ma gɔ̃ sìa, bee i mɔmao, ɔ̃ ń ye ǹ ma nɛ yenzi ɛsɛ e lɔa? Lasɛli mɛ̀: Tó ń kpàa, mmɛ ńyɔ̃ iaanɔ gbã. 16Kɛ́ Yakɔbu lɛ́ su ń búao oosi, Lea bɔ̀ gɛ̀ dàaalɛ à mɛ̀: Mamɛ má innɔ gbã, asa ma nɛ yenzi ɛsɛ asean n ũ. Ɔ̃ à ìaanɔ gwãasĩna bee. 17Lua Lea wabikɛa sì, ɔ̃ à nɔsì, à Sãi ì ń Yakɔbuo. 18Ɔ̃ Lea mɛ̀: Lua asea kpàa, kɛ́ ma a zɔnɔɛ kpà ma zã́wa yãi. Ɔ̃ à tɔkpàɛ̀ Isakaa.#30.18 Bee mɛ̀ asea 19Lea ɛ̀a nɔsì lɔ, à Wotui ì, 20ɔ̃ à mɛ̀: Lua gba maa dàmɛɛ. Kɛ́ bee sa ma zã́ a ma kpɛla, asa ma nɛgɔ̃ɛ ìaanɔ soolo. Ɔ̃ à tɔkpàɛ̀ Zabulɔni.#30.20 Bee mɛ̀ kpɛlaa 21Gbɛzã ɔ̃ à nɛnɔɛ ì, à tɔkpàɛ̀ Dina.

22Ɔ̃ Lasɛli yã dɔ̀ Luagu, à aà wabikɛa sì, ɔ̃ à kɛ̀ nɛade ũ. 23À nɔsì, à nɛgɔ̃ɛ ì, ɔ̃ à mɛ̀: Lua wibɔ̀mɛɛ. 24Ɔ̃ à tɔkpàɛ̀ Yosɛfu#30.24 Bee mɛ̀ aà kãfĩ à mɛ̀: Dii ɛa nɛgɔ̃ɛ pãle kãfĩmɛɛ lɔ.

Yakɔbu Labã pɔɔ dãa

25Kɛ́ Lasɛli Yosɛfu ì, Yakɔbu ò Labãɛ: Ma gbaɛ mà ta ma bɛ busuu. 26Ma zĩkɛ̀nɛ ma naɔ ń ma nɛɔ yãiɛ. Ǹ ń kpaa mà tá, asa ń dɔ̃ lá ma zĩkɛ̀nɛ. 27Ɔ̃ Labã òɛ̀: Tó ma yã kànguɛ, gɔ̃ la. Ma masokɛ̀ má è Dii ɛfãaikɛ̀mɛɛ n yãi. 28Ǹ n asea omɛɛ, mí kpama. 29Yakɔbu òɛ̀: Ń dɔ̃ lá ma zĩkɛ̀nɛ, mɛ́ ń dɔ̃ lá n pɔtuoɔ kɛ̀ ma ɔzĩ, 30asa a yɔɔna pɔ ń vĩ zadɔ̃ mi mɔo kã̀fĩ maamaaɛ. Dii ɛfãaidàunɛ za zĩ́ pɔ ma kɛsɛpɛ̀lɛ n bɛ la. Bɔɛ má azĩa bɛ zĩ kɛ sɔ̃i? 31Labã aà là à mɛ̀: Bɔ́ má fĩaboònɛi? Yakɔbu wèwà à mɛ̀: Nsu pɔe kpaao, sema ǹ yãɛ bee kɛmɛɛ, míɔ n pɔɔ dãnɛ. 32Gɛ̃ n pɔɔ guu gbã, ní sã baebaeɔ ń a biliɔ plɛ ma asea ũ ń sãnɛ siaɔ ń ble baebaeɔ ń a biliɔ. 33Tó nlɛ ma asea gwa ziabaasi, ńyɔ̃ dɔ̃ kɛ́ ma yãkɛ̀ a zɛ́waɛ. Ble pɔ baebaeo mɛ́ bili no, ge sãnɛ pɔ siao ma kpãi'òɛ. 34Labã mɛ̀: Tɔɔ! Àɔ dɛ lá ń òwa. 35Zĩ́ bee Labã a blesan baebaeɔ ń a kãyãalɛɔ ń bleda biliɔ ń a baebaeɔ sɛ̀, an pɔ pɔ pua vĩɔ pii ń sãnɛ siaɔ pii, à ń ná a nɛɔnɛ ń ɔzĩ. 36Ɔ̃ à gudà ń zãnguo ń Yakɔbuo lan tá gɔɔ aaɔ̃ oa taawa, ɔ̃ Yakɔbu lɛ́ Labã pɔ kĩniɔ dã́.

37Yakɔbu lí bui aaɔ̃ gɔ̃mbusuɔ zɔ̃̀zɔ̃, à ń tɔ̃bɔ̀bɔ à ń wɛ̃sãkɛ̃̀ puuu. 38Ɔ̃ à lí pɔ à ń tɔ̃bɔ̀bɔpiɔ pɛ̀lɛpɛlɛ pɔɔ imikĩi, pɔ pɔ lɛ́ mɔ́ imiiɔ wɛ́u, asa we ɔ̃ aaì kpawa'ou. 39Lá aaìɔ kpawa'o lípiɔ saɛ, ɔ̃ aaìɔ nɛ kãyãalɛɔ i ń a biliɔ ń a baebaeɔ. 40Yakɔbu ì pɔ nɛpiɔ plɛ adoa azĩa pɔ ũ, ɔ̃ ì a kãyãalɛɔ ń a siaɔ ka Labã pɔɔ guu. Beewa à azĩa kpàsa bɔ̀, i ka Labã pɔɔ guuo. 41Tó pɔbui maaɔ fɛ̀lɛ ń kpawa'oao, ɔ̃ Yakɔbu ì lípiɔ pɛlɛpɛlɛ pɔɔ imikĩi an wɛ́u, kɛ́ aa kpawa'o ń saɛ. 42Tó pɔgianaɔnɛ sɔ̃, ìli lipɛlɛpɛlɛnɛ́o. Beewa pɔgianaɔ gɔ̃̀ Labã pɔ ũ, mɛ́ pɔbui maaɔ gɔ̃̀ Yakɔbu pɔ ũ. 43Ɔ̃ Yakɔbu aizɛɛ ìɔ kãfĩ maamaa, aà pɔɔ dasikũ̀ ń zɔnɔɛɔ ń zɔgɔ̃ɛɔ ń yiongoɔ ń zaa'ĩnaɔ.

Currently Selected:

Daa 30: Boo2024

Highlight

Copy