Daa 20

Ablahaũ ń ki Abimɛlɛkio

1Ɔ̃ Ablahaũ fɛ̀lɛ we, à gɛ̀ Nɛgɛvɛ busuu Kadɛsi ń Suluo zãnguo. Kɛ́ à gɛ̀ zɔ̃̀lɛ Gelaa, 2à mɛ̀ a na Salaá a dãeɛ, ɔ̃ Gelaa ki Abimɛlɛki gbɛ̃́ɔ zĩ̀, wà aà sɛ̀ wà sùò. 3Ɔ̃ Lua bɔ̀ à mɔ̀ Abimɛlɛkiwa nana guu gwãasĩna a òɛ̀: Ńyɔ̃ ga nɔ pɔ ń sɛ̀pi yãi, asa nɔzãeɛ. 4Abimɛlɛki i wulɛaanɔ yãao, ɔ̃ à mɛ̀: Dii, ńyɔ̃ bui pɔ aai yãe kɛoɔ dɛdɛ yã? 5Aapi mɛ́ òmɛɛ a dãeɛo le? Nɔɛpi sɔ̃ à mɛ̀ a dãɔɛ. Ma yãkɛ̀ a zɛ́waɛ, má tàae vĩo. 6Ɔ̃ Lua òɛ̀ nanapiu: Ao, má dɔ̃ kɛ́ n yãkɛ̀ a zɛ́waɛ. Ayãmɛto ma kpanɛ ǹ duunakɛmɛɛ, mi we n ɔkã̀ nɔɛpiwao. 7Tiasa, gɔ̃ɛpi nɔ kpawà, asa ãnabiɛ, i wabikɛnɛ, kɛ́ ǹ e ǹ gɔ̃ ń aafiao. Tó ni aà nɔpi kpawà sɔ̃o, ǹyɔ̃ dɔ̃ kɛ́ n gaɛ, mpi ń n gbɛ̃́ɔ ápii.

8Ɔ̃ Abimɛlɛki fɛ̀lɛ kɔɔkɔɔ, à a gbɛ̃́ɔ sìsi à yãpi dàu a sìunɛ́ pii, ɔ̃ vĩa ń kṹ maamaa. 9Ɔ̃ Abimɛlɛki Ablahaũ sìsi a òɛ̀: Bɔ́ yã ń kɛ̀wɛ̃ɛ màai? Bɔ́ yã ma zãwànɛ, ɔ̃ n gbasa ń tò ma gɔ̃ duunde ũ ń ma busuoi? N yã pɔ dɛ wà kɛo kɛ̀mɛɛ. 10Bɔ́ laasoo ń kɛ̀ n gbasa n yãpi kɛ̀i? 11Ablahaũ wèwà à mɛ̀: Malɛ e yãa gbɛ̃e Lua vĩa vĩ busuɛ bee guuoɛ, mɛ́ wasu ma dɛ ma nɔ yãi. 12Bee gbɛa nɔɛpiá ma dãeɛ sĩana. Wá de doũɛ, baade ń a dao, ɔ̃ à gɔ̃̀ ma nɔ ũ. 13Kɛ́ Lua bɔ̀manɔ ma mae bɛ yãa, malɛ bɛbɛbɛbɛ, ɔ̃ má ò ma nɔpiɛ gu pɔ wasu gɛ́u pii, aàli gbɛ̃kɛkɛmɛɛ, aàli o a dãɔn ma ũ. 14Ɔ̃ Abimɛlɛki mɔ̀ ń sãɔ ń zuɔ ń zɔgɔ̃ɛɔ ń zɔnɔɛɔ, a kpà Ablahaũwa, ɔ̃ à aà na sɔ̀aaɛ̀. 15Ɔ̃ Abimɛlɛki mɛ̀: Ma busun kɛ, zɔ̃lɛ gu pɔ ń yei. 16Ɔ̃ a ò Salaɛ: Ma ãnusu ɔwatɛ̃ ɔaasɔo kpà n dãɔwa awakpabɔ ũ, kɛ́ gbɛ̃́ pɔ kunnɔɔ pii e dɔ̃ kɛ́ ni taaekɛo. 17Ɔ̃ Ablahaũ wabikɛ̀ Luawa, ɔ̃ Lua Abimɛlɛki gbã̀gbã ń aà nao ń aà nɔ pɔ i mɛsɛdilɛnɛ́oɔ, kɛ́ aa ɛa na nɛ'iwa, 18asa Dii tò Abimɛlɛki bɛ nɔɛɔ fĩikũ̀ɛ Ablahaũ napi yãmusu.

Currently Selected:

Daa 20: Boo2024

Highlight

Copy