Zĩn 4

Yãkpalɛkɛa ń Piɛɛo ń Zãao

1Kɛ́ Piɛɛ ń Zãao lɛ́ yã'onɛ́, sa'onaɔ ń Lua ua dɔ̃anaɔ gbɛ̃zɔ̃ɔo ń Saduseɔ gɛ̃̀ńzi. 2An pɔ pà, kɛ́ aalɛ gɛɔ vua yãdanɛ́ aalɛ Yesu vua kpawakɛ yãi. 3Ɔ̃ aa ń kṹ aa ń dá kpɛ́u e gu dɔ, asa oosi kɛ̀ kɔɛ. 4Ãma gbɛ̃́ pɔ aa ń yãmà aa Yesu naaikɛ̀ɔ dasikũ̀ e an gɔ̃ɛɔ kà gbɛ̃ɔn ɔaasɔsɔo lɛɛ sɔo (5 000) taawa.

5Kɛ́ a gu dɔ̀, Yuda gbãadeɔ ń gbɛ̃zɔ̃ɔɔ ń Mɔizi ikoyãdanɛdeɔ kã̀aa Yelusalɛũ. 6Sa'onkia Anasi ku we ń Kaaifao ń Zãao ń Alɛsandao ń gbɛ̃́ pɔ aa dɛ sa'onkiapi daɛ ũɔ pii. 7Wà mɔ̀ ń Piɛɛo ń Zãao gbãadepiɔ aɛ, ɔ̃ wà ń lá: Bɔ́ gbãa ge de tɔ́ a bee kɛ̀òi? 8Piɛɛ paa ń Lua Nisĩnao ɔ̃ à yã'ònɛ́ à mɛ̀: Á gbãadeɔ ń gbɛ̃zɔ̃ɔɔ, 9lá álɛ wá lala gbã yãmaa pɔ wá kɛ̀ kɔ̃̀ɔɛ, lá wá kɛ̀ɛ̀ à gbã̀gbã yãi, 10á Isailiɔ ápii, àɔ dɔ̃ kɛ́ gbɛ̃́ pɔ zɛa á aɛɛ bee aafia è ń Yesu Kilisi Nazalɛti pɔ á pà líwa Lua aà bɔ̀ gau tɔ́oɛ. 11Beewa,

gbɛ pɔ á ɛ̃bonaɔ a pãkpài

ɔ̃mɛ gɔ̃̀ mide ũ golau.#Soũ 118.22

12Gbɛ̃pãle ku à gbɛ̃́ɔ suabao, asa dũniau pii Lua i gbɛ̃e dilɛ gbɛ̃nazĩnaɔnɛ à ń suabao, sema aapi.

13Kɛ́ aa è vĩa i Piɛɛ ń Zãao kũo, mɛ́ aa ń dɔ̃ zɔ̃ɛ ladɔ̃nsaiɔ ũ, à bɔ̀ ń saɛ, ɔ̃ aa ń kua ń Yesuo yã dɔ̃̀ sa. 14Lá aa gbɛ̃́ pɔ gbã̀gbãpi è zɛa ń saɛ, aai e yãe zãsìmáo, 15ɔ̃ aa ònɛ́ aa bɔlɛ. Aa lɛkpàaĩ 16aa mɛ̀: Wá sɛ́ ń gbɛ̃́piɔ kpelewa ni? Asa Yelusalɛũdeɔ dɔ̃ pii kɛ́ aa dabudabu zɔ̃ɔ kɛ̀, wá fɔ̃ gi beeio. 17Kɛ́ yãpi su ligua dɛ kɛ́ao, wà ginɛ́ pãsĩpãsĩ aasu yã'o gbɛ̃eɛ ń tɔ́pio lɔo. 18Ɔ̃ aa ń sisì, aa gìnɛ́ fĩ́afĩa aa yã'o ge aa yãdanɛ́ ń Yesu tɔ́o. 19Ɔ̃ Piɛɛ ń Zãao wèmá aa mɛ̀: À gwa ázĩawa à gwa. Á yã wà maa, ge Lua pɔɛ? A kpele mɛ́ maa Luaɛi? 20Asa wá fɔ̃ gi yã pɔ wá mà mɛ́ wá è oio. 21Gbãadeɔ ɛ̀a aa vĩadàdańzi, ɔ̃ aa ń gbaɛ. Aai ĩadaama zɛ'eo dasi yãi, asa gbɛ̃pii lɛ́ Lua saaukpa yã pɔ kɛ̀pi yãiɛ. 22Gbɛ̃́ pɔ aa gbãgbãa dabudabupi kɛ̀ɛ̀ zi dɛ wɛ̃̀ blaa.

Gãlideɔ nɔsɛdoũkɛa ń kɔ̃o

23Kɛ́ wà ń gbaɛ, ɔ̃ aa tà ń gbɛ̃́ɔ kĩi, aa ònɛ́ lá sa'onkiaɔ ń gbɛ̃zɔ̃ɔɔ ònɛ́. 24Kɛ́ aa mà, aa wiilɛ̀ Luawa ń laasoo doũo aa mɛ̀: Dii, mmɛ n musu kɛ̀ ń tɔɔlɛo ń isiao ń pɔ pɔ ku ń guuɔ pii.#Soũ 146.6 25Ń dà ń zĩkɛna wá dezi Davidiɛ ń n Nisĩna gbãao, ɔ̃ à mɛ̀:

Bɔyãi bui ń buio lɛ́ zɔakai?

Bɔyãi wàlɛ lɛ́ pã kpaaĩi?

26Dũnia kiaɔ lɛ́ zĩ̀ sɔukɛ,

kpalablenaɔ lɛ́ kãaa Diizi

ń Mɛsi pɔ a kpào.#Soũ 2.1-2

27Sĩanaɛ, Helodi ń Pɔ̃nsi Pilatio kã̀aa wɛ̃lɛɛ beeu ń Isailiɔ ń buipãleɔ n zĩkɛna pɔ a kua adoa Yesu pɔ ń kpàpizi.#Luk 23.1, 7-11 28Aa kɛ̀ lá n dɔaa n zɛò n gbãa ń n pɔeãowa. 29Tiasa Dii, yãpãsĩ pɔ aa ò ma we. Wapiɔ n zɔblenaɔ, wá gba lɛ́ wà n yã'o ń sɔ̃o dilɛa. 30Ɔdauwá wà gbɛ̃́ɔ gbãgbã wà dabudabuɔ ń yãbɔnsaɛɔ kɛ ń n zĩkɛna Yesu pɔ a kua adoa tɔ́o. 31Kɛ́ aa wabikɛ̀ aa làa, gu pɔ aa kãaaau lùalua, ampii aa paa ń Lua Nisĩnao, ɔ̃ aa gɛ̀ aalɛ Lua yã'onɛ́ ń sɔ̃o dilɛa.

32Yesu naaikɛnaɔ gãli laasoo doũ mɛ́ an lɛ́ doũ. An gbɛ̃e lí mɛ a pɔvĩaɔá a pɔɛ adoo. An pɔpiiá an baade pɔɛ. 33Zĩnaɔ lɛ́ Dii Yesu bɔa gau yã'onɛ́ ń iko zɔ̃ɔo. Ampii aa na ń gbɛ̃́ɔ maamaa. 34Gbɛ̃e pɔe taasi vĩ ń guuo, asa gbɛ̃́ pɔ aa bú vĩɔ ge kpɛ́ɔ, aaì yia aa mɔ́ ń a ɔ̃ao, 35aa kpa zĩnaɔwaɛ, ɔ̃ wì ɔ̃api kpa baadewa, lá a a bɔɔlɛ vĩwa. 36Levi bui Yosɛfu pɔ bɔ̀ Sipi busuu ku ń guu. Zĩnaɔ tɔkpàɛ̀ Baanaba. Bee mɛ̀ nɔsɛninina. 37À a bú lɛɛ do yìa, ɔ̃ à mɔ̀ à a ɔ̃a kpà zĩnaɔwa.

Currently Selected:

Zĩn 4: Boo2024

Highlight

Copy