Zĩn 3

Gɔ̃ɛ ɛɛ gbãgbãa

1Gɔɔewa Piɛɛ ń Zãao gɛ̀ Lua ua ĩatɛ̃ auapilaa wabikɛgɔɔ. 2Gɔ̃ɛe ku we, wà aà ì ɛɛ ũɛ. Lagulɛdɔ wì aà sɛ wà mɔ wà dilɛ Lua ua bɔlɛ pɔ wì mɛ Bɔlɛ Kɛfɛnau, ɔ̃ ìɔ baakɛ gbɛ̃́ pɔ aalɛ gɛ̃ uapiuɔwa. 3Kɛ́ à Piɛɛ ń Zãao è, aalɛ mɔ́ gɛ̃i Lua ua, ɔ̃ à baakɛ̀má. 4Aa wɛpɛ̀wà, ɔ̃ Piɛɛ mɛ̀: Wá gwa. 5Ɔ̃ à wɛbìimá, aà wɛ́ dɔi à pɔ emá. 6Ɔ̃ Piɛɛ òɛ̀: Má ãnusu ge vua vĩo, ãma pɔ pɔ má vĩ má n gba. Ń Yesu Kilisi Nazalɛti tɔ́o, fɛlɛ ǹ taa'o. 7Ɔ̃ Piɛɛ aà kũ̀ a ɔplaawa, à aà fɛ̀lɛ zɛ̀. Wegɔ̃ɔ aà gbálaɔ ń aà gbakũpɛɛkĩiɔ gbãakũ̀. 8À vĩ̀ zɛ̀, ɔ̃ à nà taa'oawa. À gɛ̃̀ńnɔ Lua ua, àlɛ taa'o, àlɛ vĩvĩ, àlɛ Lua saaukpa. 9Gbɛ̃pii aà è, àlɛ taa'o, àlɛ Lua saaukpa. 10Kɛ́ wà aà dɔ̃̀ baakɛna pɔ ìɔ zɔ̃lɛ Lua ua Bɔlɛ Kɛfɛnau ũ, ɔ̃ yã pɔ wa kɛ̀ɛ̀pi ń kṹ gbãa, à bɔ̀ ń saɛ. 11Lá à nà Piɛɛ ń Zãaowa gu pɔ wì mɛ Salomɔ Velandau, ɔ̃ gbɛ̃pii lɛ́ gɛ̃ ń kĩi, asa yãpi bɔ̀ ń saɛɛ.

12Kɛ́ Piɛɛ ń é, a ònɛ́: Isailiɔ, bɔyãi yãpi bɔ̀ á saɛi? Bɔyãi a wɛfĩ̀wá màai? Álɛ e wazĩa gbãa ge wá yãmaa mɛ́ tò gbɛ̃́ɛ bee taa'òe? 13Wá dezikaauɔ Ablahaũ ń Izaakio ń Yakɔbuo Lua#Bɔa 3.15 a zĩkɛna Yesu tɔbɔ̀. Apiɔ sɔ̃, a aà kpà gbãadeɔwa, a bɔ aà kpɛ Pilati pɔ zɛ̀ ń aà gbaɛao aɛ. 14A bɔ Gbɛ̃maa pɔ a kua adoapi kpɛ, ɔ̃ a wabikɛ̀ Pilatiwa aà gbɛ̃́dɛnae kɛ̃ɛ́.#Luk 23.13-23 15A Wɛ̃nikia dɛ̀, ɔ̃ Lua aà bɔ̀ gau. A seeladeɔn wá ũ. 16Yesu naaikɛa mɛ́ tò gɔ̃ɛ pɔ á aà dɔ̃ mɛ́ álɛ aà gwaɛ bee gbã̀gbã Yesupi tɔ́ gbãa yãi. Yesu naaikɛa mɛ́ aà gbà aafia á baade wáa.

17Tiasa ma gbɛ̃́ɔ, má dɔ̃ kɛ́ apiɔ ń á gbãadeɔ yã pɔ á kɛ̀á wɛsia yãɛ. 18Lua dɔ̀aa a dà ãnabiɔnɛ, ɔ̃ aa ò mpii aa mɛ̀ Mɛsi a taasikɛ, ɔ̃ à kɛ̀ màa. 19Ayãmɛto à nɔsɛlilɛ, í zɛ ń Luao, á duuna i wolowá, 20kɛ́ à mɔɛ́ ń dɛɛpoogɔɔo, i Yesu pɔ à dɔ̀aa a dìlɛɛ́ Mɛsi ũpi zĩwá. 21Sema aàɔ ku musu gĩ́a e gɔɔ pɔ Lua a pɔpii kɛkɛ dafu, lá a dà a ãnabiɔnɛ aa ò za káauwa. 22Mɔizi mɛ̀ Dii á Lua a á gbɛ̃e sɛ ãnabi ũ láawa. À yã pɔ a oɛ́ ma pii. 23Gbɛ̃́ pɔ i ãnabipi yãmao, Lua a ade bɔ á guu à dɛɛ.#Iko 18.18-19

24Ãnabi pɔ aa Lua yã'ò sɛa za Samuɛliwaɔ aa gɔɔpi baokpà pii.#2 Sam 7.12-16 25Yã pɔ ãnabipiɔ ò ń Lua bàa pɔ ku ń á dezikaauɔo gɔ̃̀ á pɔ ũ, lá a ò Ablahaũɛwa à mɛ̀ á baaada dũnia bui piigu aà bui sabai.#Daa 22.18 26Beewa Lua tò a zĩkɛnapi bɔ̀ à mɔ̀wá, à aà zĩ̀wá gĩ́a aà baaadaágu, kɛ́ á baade mikɛ̃ a yãvãikɛaɔwa.

Currently Selected:

Zĩn 3: Boo2024

Highlight

Copy