YouVersion Logo
Search Icon

Zĩn 2

2
Lua Nisĩna mↄa
1Kɛ́ Pãteko#2.1 Lev 23.15-16 dikpɛgↄↄ kà, aa ku gudoũ ḿpii. 2Kã́ndo aa kↄ̃fĩ mà à bↄ̀ luabɛ lán zàa'ĩan gbãawa, ↄ̃ à kpɛ́ pↄ́ aa zↄ̃̀lɛu wã̀. 3Aa pↄ́ è lán tɛ́lɛpiↄnaↄwa, aa fã̀aa nàna ń baade miwa. 4Lua Nisĩna dìnɛ́ ḿpii, ↄ̃ aa nà yãebui'oawa lá Nisĩnapi dànɛ́ aa owa.
5Yudaeↄ ku Yelusalɛũ we, luayãmana pↄ́ aa bↄ̀ dṹnia bùsu píi guuↄ ũ. 6Kɛ́ aa ń zↄapi mà, aa kã̀aańzi dasidasi, ↄ̃ aa bílikɛ̀, kɛ́ aa mà aalɛ ń baade píi buiyã o. 7Yã́pi ń kṹ gbãa à bↄ̀ ń saɛ aa mɛ̀: Yã'onapiↄá Galiledeↄnɛ píio lò? 8Àkɛa wá mà aalɛ wá baade buiyã oi? 9Paatiↄ ń Mɛdɛↄ ń Elaũↄn wá ũ ń gbɛ̃́ pↄ́ kú Mɛsↄpↄtamiↄ ń Yudeo ń Kapadosio ń Pↄ̃ntuo ń Azio 10ń Filizio ń Pãmfilio ń Egipio ń Libii bùsu pↄ́ kú Silɛni saɛo ń gbɛ̃́ pↄ́ bↄ̀ Lomaↄ. 11Yudaↄ ń gbɛ̃́ pↄ́ aa ń zɛ́ sɛ̀ↄn wá ũ ń Kɛlɛtiↄ ń Laalubuↄ, ↄ̃ wá mà, aalɛ Lua yãbↄnsaɛkɛaↄ o ń wá baade buiyãↄ. 12Yã́pi ń kṹ gbãa, aa bílikɛ̀, aalɛ kↄ̃ lala aa mɛ̀: Yã́pi dɛ kpelewan wei? 13Gbɛ̃eↄ sↄ̃ aalɛ ń láanikɛ aa mɛ̀: Í mɛ́ ń kã́.
Piɛɛ waasokɛa
14Ɔ̃ Piɛɛ fɛ̀lɛ zɛ̀ ń a gbɛ̃́ kĩni gbɛ̃ↄn kuɛdoↄ, à yã'ò gbã́ugbãu à mɛ̀: Á Yudaↄ ń gbɛ̃́ pↄ́ kú Yelusalɛũↄ píi, tó á ye yã́pi dↄ̃, à swã́kpa ma yã́i. 15Í i gbɛ̃́piↄ kã lá álɛ ewao, asa kↄↄ mↄ̀ kɛ̃okwiɛ. 16Ãnabi Yoɛli dↄ̀aa yã́ɛ bee ò à mɛ̀:
17Lua mɛ̀ gↄↄgbɛzãzĩ
má a Nisĩna pisi gbɛ̃́piiɛ,
á nɛgↄ̃ɛↄ ń á nɛnↄɛↄ i ãnabikɛkɛ,
á ɛ̀waasoↄ i wɛ́pungu e,
á maezↄ̃ↄↄ i yã́ↄ e iu.
18Gↄↄbeezĩ má a Nisĩna pisi
ma zↄ̀blenaↄnɛ gↄ̃ɛↄ ń nↄɛↄ píi
aai ãnabikɛkɛ.
19Má seelaↄ kɛ musu,
má yãbↄnsaɛↄ kɛ dṹniau,
au ń tɛ́o ń tɛluo aↄ ku.
20Ĩatɛ̃ a siakũ,
mↄvua a tã lán auwa
e Dii mↄgↄↄ zↄ̃ↄ gawide àↄ mↄ́,
21Dii sìsinaↄ i bↄ píi.#2.21 Yoɛ 3.1-5
22Isailiↄ, à yã́ɛ bee ma. Lá á dↄ̃ ázĩawa, Lua tò a Yesu Nazalɛti dɛa a gbɛ̃́ ũ seela è dabudabuↄ ń yãbↄnsaɛ pↄ́ a tò Yesupi kɛ̀ á guuↄ yã́i. 23Lua zɛ̀ò a pↄeã ń a dↄ̃ao guu kɛ́ wà aà kpáwá, ↄ̃ á tò luayãdↄ̃nsaiↄ aà pàliwa aa aà dɛ̀.#2.23 Luk 23.33 24Ɔ̃ Lua ga ba bↄ̀wà à aà vù,#2.24 Luk 24.6 asa a zɛ́ kú kɛ́ ga fↄ̃ àↄ aà kũao. 25Asa Davidi aà yã́ ò à mɛ̀:
Miↄ Dii e ma wɛ́u gↄↄpii,
lá a ku ma ↄplaai, má kpaguao.
26A yã́i ma pↄ ìↄ na,
ma nↄ̀sɛ ìↄ yáalↄ,
ma wɛ́ dↄi baa ma mɛ aↄ ku aafiaɛ,
27asa ńyↄ̃ ma to miauo,
ńyↄ̃ wei n gbɛ̃́ pↄ́ a kua adoa yaikɛo.
28N ma ka wɛ̃ni zɛ́wa,
n kĩ́i pↄna ìↄ pɛɛau.#2.28 Soũ 16.8-11
29Ma gbɛ̃́ↄ, má fↄ̃ wá dezi káau Davidi yã'oɛ́ wásawasa. À gà, wà aà vĩ̀, aà mia ku wɛ̃́lɛu la e ń a gbão. 30Aà ãnabikɛ guu a dↄ̃̀ kɛ́ Lua lɛgbɛ̃̀ɛ à mɛ̀ á a buie kpa a kpalau.#2.30 Soũ 132.11, 2Sam 7.12-13 31Ɔ̃ Davidi dↄ̀aa Mɛsii vua yã'ò à mɛ̀:
Lua a aà to miauo,
a wei aà mɛ yaikɛo.
32Yesupi ↄ̃ Lua aà bↄ̀ gau. A seeladeↄn wá ũ wápii. 33Zↄ̃lɛa a Mae Lua ↄplaai à aà Nisĩna pↄ́ à a lɛgbɛ̃̀wɛ̃ɛ èwà, ↄ̃ a pìsiwɛ̃ɛ. Yã́ pↄ́ álɛ e mɛ́ álɛ ma tiaɛ bee bↄ̀ weɛ. 34Asa i kɛ Davidi mɛ́ fɛ̀lɛ gɛ̀ luabɛo, à mɛ̀:
Dii ò ma Diiɛ aà zↄ̃lɛ a ↄplaai
35e aà aà ibɛɛↄ kɛɛ̀ aà gbadibↄ ũ.#2.35 Soũ 110.1
36Isailiↄ, àↄ dↄ̃ sã́asã kɛ́ Yesu pↄ́ a aà pàliwa ↄ̃ Lua aà dìlɛ Dii ũ, Mɛsii ũ.
37Kɛ́ aa yã́pi mà, à ń sↄ̃ zↄ̃̀, ↄ̃ aa Piɛɛ ń zĩna kĩniↄ là aa mɛ̀: Gbɛ̃́ↄ, wá sɛ́ kpelewa ni? 38Ɔ̃ Piɛɛ ònɛ́: Á baade nↄ̀sɛlilɛ, í da'ilɛkɛ ń Yesu Kilisi tↄ́o, á duuna i kɛ̃́wá, Lua i á gba a Nisĩna. 39Asa lɛ́ pↄ́ Lua gbɛ̃̀pi dɛ á pↄ́ ũɛ ń á nɛ́ↄ ń gbɛ̃́ pↄ́ kú zã̀ↄ, gbɛ̃́ pↄ́ Dii wá Lua a ń sɛ́piↄ píi. 40À yãpãleↄ ònɛ́ dasi, à nàɛmá à mɛ̀: À ázĩa bↄ gbãgbɛ̃ vãiɛ beeↄ guu. 41Ɔ̃ gbɛ̃́ pↄ́ aa aà yã́ sìↄ da'ilɛkɛ̀. Zĩbeezĩ ↄ̃ wà kã̀fĩ ń guu gbɛ̃ↄn ↄ̀aasↄsↄo lɛɛ àaↄ̃ (3.000).
Yesu náaikɛnaↄ kua ń kↄ̃o
42Aa laaidↄ̀ zĩnaↄ yãdaanɛ́wa ń gbɛ̃kɛkɛakↄ̃ɛo ń Dii blɛbleao ń wabikɛao. 43Zĩnapiↄ lɛ́ dabudabuↄ ń yãbↄnsaɛↄ kɛ, ↄ̃ vĩa gbɛ̃́pii kũ̀. 44Dii náaikɛnaↄ píi gãli doũ. An pↄvĩa dɛ ampii pↄ́ ũɛ. 45Tó aa ń pↄvĩaↄ yìa, aaì a ↄ̃a kpakↄ̃wa lá gbɛ̃́ a bↄↄlɛ vĩwa. 46Lá gu lɛ́ dↄ aaìↄ kↄ̃ kãaa Lua ua ń lɛdoũo, aaìↄ Dii blɛ ble kↄ̃ bɛ, aaìↄ pↄble ń pↄnao ń nↄ̀sɛmɛndoo. 47Aaìↄ Lua táasilɛ mɛ́ aaìↄ na ń gbɛ̃́piio. Dii ìↄ gbɛ̃́ pↄ́ álɛ ń suabaↄ kã́fĩ ń guu lá gu lɛ́ dↄ.

Currently Selected:

Zĩn 2: BBL2010

Highlight

Share

Copy

None

Want to have your highlights saved across all your devices? Sign up or sign in