Luk 3
3
Ana Jon ji nwohngalahb jo bung alum Esowo
(Mat 3:1-12; Mak 1:1-8; Jon 1:19-28)
1Eji ma kang nnya elku nyi Taibirius jolo ntul a Rom, ngare nyio nyi Pontus Pailet jolo ntubesi ejahbe go Judea, Herod jo fili Galili, Filip mmonannyehn jo fili Iturea, fere jo fili Trakonitis, Lisanias jo fili Abilene. 2Annas abola Kayafas jolo atubesi abalimajom.
Ngare nyio nyi ellum Esowo song kpiri Jon ji jolo mmon a Sekaraya go elka emahng. 3Jon kehm tahme, jo yannge go ajahbe nya li kohlo Jodan, jo bung alum Esowo re, “Yaangen mbang enyahne, wahn bel ewohngalahb, Esowo bahke tahme ka-n go egahne abiafem.” 4Ana nnyehnamahr Aisaya nyono kak go nwer re,
“Nne noa, kpꞌrabe go elka emahng re,
‘Tuungen mbang nyi Ntul bum-e!
Limen mbang tꞌtor nyi á bahke sehnge.
5Bo bahke kake ndi go edamme ajehng ajehng, fere jol bale bale,
fere rene ewong ajehng ajehng gooro, fere jol bale bale.#3:5 Mat 23:12.
Ejum ji lꞌgalle, bo bahke limi, fere tor.
Abang nya li akpuku akpuku, bo bahke fere gooro, jol gele gele.
6Nne awohng awohng bahke nyehne eltahre ni Esowo.’ ”
7Ellong ane gbalee jo lꞌlohng, je goji Jon re á wohngo bo alahb. Jon kehm bungu tong bo re, “Wahn enyo bia, nne awo tong-n re ḿ bahke foro go erakatahng ji Esowo ji kpꞌbake? 8Jo limen eljini ni bahke jo tib re, wahn ebyaange mbang enyahne. Kana bom elbungu atemtem re, ‘Ebraham wo li nso ejahre.’ Tibre n kp-n tongo re, Esowo bahke ma ko atal nyaa, lim abon ka Ebraham.#3:8 Jon 8:33,39.
9“Bobtoobo elfuk bum, ni bo bahke kiimi alohk nti. Eti ajehng ajehng ji tohko kab akab nya nno, bo bahke gbahke tub, rod kak agun.”
10Owo ane bao kehm-e bahbe re, “Anv, ejum aji e bahke limi me?” 11Á kehm faange bo re, “Nne no lꞌbel nsubu ebal, nong, á yehke anyehng, ka nne no ki kpi. Nne no lꞌbel nsol alehke, nong, á tob lim ano.”
12Abakokatak kehm tob ba re bo ba bel ewohngalahb. Owo bo kehm-e bahbe re, “Ntꞌtibi, ejum aji e bahke limi?”
13Jon kehm faange bo re, “Kana kpe jo ko akpohko etahk sehnge ana bo tong-n re wahn jo ko.”
14Egom nsoja nyindiki kehm-e tob bahb re, “Wahr bahke limi renan?”
Á kehm faange bo re, “Kana jo lim nne awohng awohng ejum go eko! Kana jo ka nne ebi mbol mbol! Nong, ana bo kp-n kpiki jo gbal-n.”
15Owo ane kehm kehme ekpu kunu, fere jo tir go bo a ntim bada Jon re, fundiki ye Mesaya wo.#3:15 Jon 1:19-28.
16Owo Jon kehm bungu tong bo ane kpee re, “N kp-n wohngo alahb maka maka. Nne no kpꞌbake gbale sehnge me. Jol me n tohkem fꞌfuumu re me n fannge alehke akpaketa enye. Ye wo bahk-n wohngo alahb go Etingi Etohko, a agun. 17Á fili edꞌda go ebo, kpꞌfeebe arasi enye. Á bahke kpuku arasi enye, song kak go ege ekpꞌkpa, fere jahm awal go agun nya lꞌkꞌtiki lahme elahmelahme.”
18Nsol nyehko kpe jol tvv, nyi Jon kpe jo rehke bo, eji á jo tiingi ane bao nnoobo etib.
19Á tob ka ntul a Herod ebi, tib eji á taare Herodias, nkal a Filip mmonannyehn, kpe lim abi nsol nyako budu.#3:19 Mak 6:17-18. 20Herod kpe lim ebi jehko kpele, eji á bobo Jon kak ngbekobo.
Ana Jisos bele ewohngalahb
(Mat 3:13-17; Mak 1:9-11)
21Eji ane bao kpee ma bel ewohngalahb, Jisos kehm tob bel ewohngalahb. Eji á jo kak ero, ejahbetul kehm lennge. 22Etingi Etohko kehm badde go elfoongo ni ebbehl, ba jol a ne. Bo kehm wuku ellum go ejahbetul Esowo re, “Wo wo li akor-m mmon ewame, no kpo kor-m sꞌsehng.”#3:22 Luk 9:35.
Nwer nyi etꞌtohngo ji Jisos lohngo no
(Mat 1:1-17)
23Ngare nyio Jisos ebkang ejum eltahl a nnya ewubu. Ane jo tiri re, á jolo mmon a Josef,#3:23 Luk 4:22. ji jolo mmon a Heli. 24Heli jolo mmon a Matat. Matat jol mmon a Livai. Livai jol mmon a Melki. Melki jol mmon a Jannai. Jannai jol mmon a Josef. 25Josef jol mmon a Matatias. Matatias jol mmon Amos. Amos jol mmon a Nahum. Nahum jol mmon Esli. Esli jol mmon a Naggai. 26Naggai jol mmon a Maat. Maat jol mmon a Matatias. Matatias jol mmon a Semein. Semein jol mmon a Josek. Josek jol mmon a Joda. 27Joda jol mmon a Joanan. Joanan jol mmon a Resa. Resa jol mmon a Serubabel. Serubabel jol mmon a Sealtiel. Sealtiel jol mmon a Neri. 28Neri jol mmon a Melki. Melki jol mmon Addi. Addi jol mmon a Kosam. Kosam jol mmon Elmadam. Elmadam jol mmon Er. 29Er jol mmon a Josua. Josua jol mmon Eliesa. Eliesa jol mmon a Jorim. Jorim jol mmon a Matat. Matat jol mmon a Livai. 30Livai jol mmon a Simeon. Simeon jol mmon a Juda. Juda jol mmon a Josef. Josef jol mmon a Jonam. Jonam jol mmon Eliakim. 31Eliakim jol mmon a Melea. Melea jol mmon a Menna. Menna jol mmon a Matata. Matata jol mmon a Natan. Natan jol mmon a Devid. 32Devid jol mmon a Jesi. Jesi jol mmon Obed. Obed jol mmon a Boas. Boas jol mmon a Sela. Sela jol mmon a Nason. 33Nason jol mmon Aminadab. Aminadab jol mmon Admin. Admin jol mmon Arni. Arni jol mmon a Hesron. Hesron jol mmon a Peres. Peres jol mmon a Juda. 34Juda jol mmon a Jekob. Jekob jol mmon no Aisik. Aisik jol mmon no Ebraham. Ebraham jol mmon a Tera. Tera jol mmon a Nahor. 35Nahor jol mmon a Serug. Serug jol mmon a Reu. Reu jol mmon a Peleg. Peleg jol mmon no Eber. Eber jol mmon a Sela. 36Sela jol mmon a Kainan. Kainan jol mmon Arfasad. Arfasad jol mmon a Sem. Sem jol mmon a Noa. Noa jol mmon a Lamek. 37Lamek jol mmon a Metusala. Metusala jol mmon no Enohk. Enohk jol mmon a Jared. Jared jol mmon no Mahalalel. Mahalalel jol mmon a Kainan. 38Kainan jol mmon no Enos. Enos jol mmon a Set. Set jol mmon no Adam. Adam jol mmon Esowo.
Currently Selected:
Luk 3: ekaNT
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
