Luk 21

Ayare nya nkalebun ka no

(Mak 12:41-44)

1Jisos kehm tabe esamahr ebe, kehm nyehne afang ane kpꞌkake akpohko ayare ebo go elkohl akpohko ni jolo go etahk Esowo. 2Á kehm tob nyehn nkpak a nkalebun kpꞌkake ederi ebbal. 3Owo á kehm bungu re, “Etingitingi, n kp-n tongo re, Nkpak a nkalebun noa wo ga ka sehnge bo ane kpee. 4Egom jehko jo ka gbalee, jo sa bo gbalee go. Ye ji li nkpak ka kpee ji á bele no, ji kehn á jol ma ko, gunu nsol alehke.”#21:4 2 Kor 8:1-3.

Erem, a afemfem

(Mat 24:1-14; Mak 13:1-13)

5Egom ebo jindiki jo bungu bade etahk Esowo, ana bo liibi no go anoobo atal, a nsol nyi bo ko akpohko ayare gunu. Owo Jisos kehm bungu re, 6“Bada nsol nyi ń kpꞌnyehne a, ngare kpꞌbake nyi eltal anehng anehng lꞌkꞌkpe sa kuumu a ntem. Bo bahke wake kpee wohng ndi.”#21:6 Luk 19:43-44.

7Bo kehm-e bahbe re, “Ntꞌtibi, anv, jia bahke limi ngare anyi? Ellingi ani bahke tibi re, yahke ba ellimi?”

8Owo Jisos kehm faange re, “Jo kunen ekpu, eji bo lꞌki-n nehm. Tibre ane gbalee bahke bake go egama mbing, fere jo bung re, ‘Me wo a!’ fere bung re, ‘Ngare ebkabbe!’ Kana jo toono bo! 9Ń lꞌwuk bada nta, fere wuk bade ana ane bahke kehme asi tab, fere jo ten atubesi ebo, kana jo fahl! Nsol nyio bahke tohko gbo mbang lim. Fvfo, lohngem re, esꞌkohro ji ma kabbe o.”

10Jisos kehm kpe tong bo re, “Ejahbe ajehng ajehng bahke noko a njahm ejahbe nyehko. Ajahbe bahke jo nok atemtem. 11Adi nyandiki, ndi bahke jo gbehke sehng. Njal bahke jolo, a ayam nya bahke jo sehnge ane. Amenngemennge nsol, a agburu nliingi bahke jo tib go elbung.

12“Re nsol nyia kpee kehm limi, bo bahke jo bob-n, fere jo nohk-n, jo ko-n tahm a nahne go ntahk ero, fere jo kak-n go ngbekobo. Bo bahk-n jo ko tahm a nahne, song yiimi go esamahr atul, a atubesi tib go egama mbing.#21:12 Luk 12:11. 13Jia ji bahk-n limi, eji ń lꞌyiimi ntianse ka-m.

14“Nong, ntim enyahne jo tahn-n, eji ń lꞌkꞌjo tiiri ana ḿ bahke faange, ngare kehm rehnge.#21:14 Mat 10:19. 15Tibre m bahk-n kake alum nya ḿ bahke bungu, fere ka-n elkahne, eji anebekv ebahne lꞌkꞌma faange, fere jo ten. 16Jol babnso ejahne, a abonane ejahne, a nnahb enyahne, a ate ebahne bahk-n jabbe ka. Egom ejahne jindiki, bo bahke wulu na bo.#21:16 Jon 16:1-3; Ell 2:10,13. 17Ane kpee bahk-n koko ekv tib go egama mbing. 18Jol ellv esi enahne anehng anehng limm, ni bahke tane. 19Ń lꞌjo kpuumu, ḿ bahke tahre atohko enyahne.”

Ana bo bahke rannge Jerusalem

(Mat 24:15-21; Mak 13:14-19)

20Ń lꞌnyehn nlong nsoja ma ba sennge Jerusalem kak, owo ḿ bahke kahne re, bahke gulu elrannge. 21Nong, ane ba li go Judea be song go awong ngare nyio, ane ba li go Jerusalem tahm ejahbe jio song. Ane ba li go bo ebgbe, nong, bo kꞌkpe feere ba go Jerusalem. 22Tibre afung nyao nya li afung elbongo, eji nsol kpee nyi bo nyono go nwer Esowo lꞌlohko jol go etingitingi.

23Eyuu a anebkal ba bahke jolo ela, a ane ba bahke jo yab abon ngare nyio. Ndon bahke gbale sehng ejahbe jio. Erakatahng ji Esowo bahke gboko kuumu ane bao. 24Bo bahke wulu bo go ekahngkahng. Egom jehko, bo bahke bobo bo, tahm abo, bo song jol aneb agbekobo go ejahbe ajehng ajehng ji li go njini. Ane baka baka bahke jo kadde Jerusalem go akpade akpade tete ngare abo biingi.#21:24 Rom 11:25; Ell 11:2.

Elbake ni Mmon no nne

(Mat 24:29-31; Mak 13:24-27)

25“Nliingi bahke jo tib go njul, fere jo tib go ebareka, a alonlo.#21:25 Ell 6:12-13. Ane ba li go njini, ala bahke jo teele bo, eko fere jo tan bo. Bo nehm jo kahn ji bo bahke limi tib go ewahl ji agburu aya, a ebuku bahke jo wahl. 26Ane bahke jo gbo elkv tib elfahle, eji bo kpꞌsiki nsol nyi kpꞌbake go njini kpee.#21:26 Ell 6:15-16. Tibre atahm nya kpi elbung bahke range. 27Owo bo bahke nyehne Mmon no nne kpꞌbake go ekparesemsem, a nsahm, a egburu ellub.#21:27 Ell 19:11-16.

28“Nsol nyio lꞌkehme ellimi, kpiiden asamahr enyahne go ero, wahn tab asi enyahne wahre, tibre eltahre enahne kpꞌkabbe abake.”#21:28 1 Tes 4:16-17.

Elgan ni li bade efig

(Mat 24:32-35; Mak 13:28-31)

29Jisos kehm tubu bo elgan re, “Kpuren eti ji bo kpo lung re efig,#21:29 Luk 13:6-9; Mat 21:19. a nti nyehko kpee. 30Ń lꞌsoro nyꞌnyehn eji ma kehme elnyono, ḿ bahke kahne re, nnale yahke ba. 31Mbang nyꞌnehm nyi, ń lꞌtob nyehn nsol nyio kpee kpꞌlimi, ḿ bahke kahne fvfo re, etul bi Esowo ebkabbe. 32Etingitingi, n kp-n tongo re, Ane ba bahke jolo go elkpin ngare nyio nehm kpo tete nsol nyio kpee lim. 33Elbung abola ndi bahke tane, alum enyame nehm tiki tan.#21:33 Luk 16:17.

Jo kunen ekpu

34“Jo baaben elnahne, goji nkak alimi, a amahm awoko a atꞌtiiri nya elkpin nia lꞌki-n gbal go egahna ntim, eji efung bio lꞌki-n gbede na.#21:34 Mak 4:19; Mat 6:31-33. 35Tibre efung bio bahke gbede ane kpee ba li go njini, ana ntahmfuk nyi bo kpo saade konngo nsahre.#21:35 1 Tes 5:3. 36Jo baaben ngare kpe kpe, wahn jo kak ero, eji ń lꞌbel eko ji ḿ bahke foro go nsol nyio kpee nyi bahke limi, wahn fere yiimi go esamahr bi Mmon no nne.”#21:36 Mak 13:33.

37Efung abehng abehng Jisos jo tibi go etahk Esowo. Atv lꞌbehde, á jo kono eljeke song kang go ewong ji bo kpo lung re Oliv. 38Efungfu atv atv ane kpee jo lohngo ba go etahk Esowo re bo ba wuk-e.

Currently Selected:

Luk 21: ekaNT

Highlight

Copy