Matyu 2
2
Po page koneai bidi dabe augwali aselama, Jisas suagasai
1Te Mariago Jisas te Betlehem bulude ame nani, te Judia tǫde. Tama te sogo te moni gavman tuni bidi nogi Herot aga bidali. Tama Mariago te wai Jisas ame nai digi, tama nosali te sia ge pedalobo badu bidali po page koneai bidi dabe augwali meba te Jerusalem moni hanuba sabolali. Tama augwali te dagalu hǫde haniani po page mu koneai dao. Tama augwali Jerusalem hanuba sabolama, tama augwaligo te po wai, 2“Wai me deli aga te Juda dabego tuni bidi pedalainogo ame nani, aga menade bidibowe? Da te sia ge pedalobo badude bidibadi dago aga hǫ pedalobo sulama, tama agade kidu sugunama dago agade lotu po wainogo digibulu asai dao,” te po wai. 3Tama te gavman tuni bidi Herotgo te po wabo odama, tama aga noma siyu moni homu mu yali. Tama tigidali Jerusalem we bidi augwali me noma siyu moni homu yai. 4Tama Herot agai te pris tuni bidi dabe me, te Israel dabego bomai po page koneai bidi dabe dali deliba sisinama, tama agai augwalibolo hanalu wali, “Te Godigo sa muani nosali asaibao wali bidi Krais aga mena bulude ame naibawe?” 5Herotgo te po wai. Augwaligo agabolo te po wali, “Te Betlehem bulude, te Judia tǫde dao. Te Godigo po pusubo profet bidigo po polobadu asęyu te po wai,
6‘Te Betlehem hanu, te Juda tǫ tomode, te Juda
bagego tuni bidi dabego gedude nago nogi te
dwasianunu elalugobeo. Te mu menio. Te nagede
genuai tuni bidi me deli pedelaibao, tama agai eno
hani Israel tonaluabo bidi dao,’ te po asęani,”
augwaligo te po Herotbolo wai. #Mai 5:2
7Tama te po odolama, tama Herotgo geme te sia ge pedalobo badu asali te po page koneani bidi dabe augwali i wai. Tama augwali aga pageba aselama, tama dua dua eyu agai augwalibolo “Te dagego suali hǫ te mena sogo pedalaliwe?” te po hanalu wali. Tama augwaligo agabolo te hǫ pedalali sogo pusali. 8Tama tilama, agai augwali te Betlehem buluba tagala paliyu, tama te po wali, “Dage pelama, tama bomo elama te wai gegao. Tama dagego gegelama subaso da, teda dagego po enaba ma sela asao. Tama ena me pelama, agade kidu sugunama, eno agade lotu po wagi paibao,” Herotgo te po wai.
9Te augwaligo te tuni bidigo po odama, tama augwali pai. Tama pobadi, te hǫ polobadu augwali te sia ge pedalubo badude bidibadi suali hǫ, te hǫ augwali asobodu polasa pelama, tama te wai bidibo be pedu ugwadu dolo dolaluai. 10Tama augwaligo te hǫ sulama, tama augwali wiegi yai homu genuai pemene mu yai. 11Tama augwali te be tomoba pelama, tama augwaligo te wai aga ida Maria dali suai. Tama augwali tobolu basi gulama, tama kidu sugunama, te waiba lotu po wai. Tama augwaligo augwa wa dabe dalama, tama augwaligo te waibolo wiegi yai nai meba olo mawai, te kapa nogi gol me, te wiegi yai denami ebo pauda nai me, te tigide wiegi yai denami ilibo nai, te tama nai te wai olo mawai.
12Tama tilama, tama Godigo nade augwalibolo te po pusali, tama augwa te moni gavman tuni bidi Herot bidibo digi ma pigio te po wai. Tama augwali gasa tųdu peyu, augwa buluba ma pai.
Josep aga we dali wai bǫų augwali Isip buluba pai
13Te Jisas suagasali po page koneai bidi dabe pela silai digi, tama Genuai Bidigo ensel mobo bidi Josepba nade pedalai. Ensel mobo bidigo te po wai, “Nage hodaluama te wai bǫų aga ida dali selama, tama Isip tǫba wi pao. Te genuai gavman tuni bidi Herot agai te wai bǫų te ela muabo homu eyu, aga gegebo tamadi gagalaibao. Tama tibaso, megi wi pao. Tama nage Isip tǫde bidibadi te eno ma asao obaso nage asao,” te po wai. 14Tama Josep hulide digi hodaluama te wai aga ida dali selama, tama aga Isip buluba pabo gagalali. 15Tama Josep te Isip tǫde bidibadi tama te moni gavman tuni bidi Herot isabo sogo tonaluyu bidali.
Te pedalali sę te tiwai te po me deli te Genuai Bidigo te agai po pusubo profet bidigo pedauwalidu wali po usu numainogo yai. Agai te po wali, “Eno ogwa aga Isipde bidibadi, tama eno aga tedu asomainogo i wai dao.” #Hos 11:1
Herotgo pode augwaligo wai bǫų dabe hauwa ela muai
16Tialima te genuai gavman tuni bidi Herotgo koneama, te giliga pedalobo badu asali po page koneai bidi augwaligo agai wali po tudiba munama, tama gasa tųdu geme pai homu yali, tialima aga sębę mu yai. Tama agai enesigi bidi dabe tagala paliyu, augwalibolo te po wai, “Dagego te Betlehem bulude me te pąde elalubo bulude me tede bidibo ogwa wai dabe te kibu be si yabo tomode augwali tigidali ela muao,” te po wali. Agai te po page koneai bidi augwalibolo te hǫ hasia pedelali sogode hanalu badi, tama augwaligo aga dali te wali po homugo ma koneama, agai kibu be si weyu tama tiwai dao.
17Tama te sę ebogo te Godigo po polobadu pusali profet bidi Jeremaiago wali po me deli usu nanio. Agai te po wai,
18“Augwaligo po me deli te Rama hanude odali.
Augwaligo te genuai gela wabo me te hobede yabo
i wabo me odali. Te we Resel aga wai dabe hagede
gela obao, tama te we bidi augwaligo aga homu
wiegi yai me ilibo usu ebe. Magi baso meni. Aga wai
dabe augwali tigidali isalio.” #Jer 31:15
Josep aga me aga we me te ogwa dali augwali ma asai
19Te nosali te moni gavman tuni bidi Herot isai. Tialima Isip buluba te Genuai Bidigo ensel mobo bidi Josep bidibo digi nade pedelai. 20Tama agai te po wai, “Nage hogodolama, te wai aga ida dali selama, tama nage te Israel tǫba ma pao. Te wai elainogo yali bidi dabe, augwali isai dao,” te po wai. 21Tama tibaso Josep hogodolama, tama te ogwa wai aga ida dali oda selama, tama augwali te Israel tǫba pai. 22Tiali goli agai odali, te bidi Arkelausgo te aga aya gavman genuai bidi Herotgo yali sę selama, tama te Judia genuai tǫde gavman tuni bidi sę eyu bidibo po wai. Tama aga te po odobaso, aga te Judia genuai tǫba bidigi pabo wi yali. Tama nade gasa po me Godigo agabolo olama, tama aga te Galili genuai tǫba pai. 23Tama te tǫba sabolama, tama aga te hanu me nogi Nasaret te hanuba bidigi pai. Tama te sę yaligo da te Godigo po pusali profet dabego wali po usu nubao, “Tama augwaligo aga te Nasaret hanu te bulu bidi dao, te po waibao,” te po wali. #Ais 11:1; Mak 1:24; Luk 2:39; Jon 1:45
Currently Selected:
Matyu 2: mps
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
