Mpiin 5
5
Adam aayaabitiib aayimbil
(1 Bibɔrb Aabɔr 1.1-4)
1Adam aayaabitiib aah paa tɔb pu pu na sɔ. Uwumbɔr aah naan unibɔn na, u ŋa bi ki di naŋ ubaa la. 2U nan naan uja ni upii la, le ki ŋa tinyoor ŋa bi pu, le ki yin bi ke “Unibɔn”.#5.2: Baaliin ni, “unibɔn” ye Adam la. 3N‑yoonn mu Adam nan saa ŋibin nkub ni piitaa na, le upuu ki dek lipuul, le ki ma ubijabo u naahn ute Adam, le u yin u ke Sef. 4Adam nan ki ma mbim muken, le ki nan beenin bi, ki ti saa ŋibin ikui iniin, 5le ki nan saa ŋibin ikui iwae ni piitaa, le ki nin kpo.
6N‑yoonn mu Sef ti saa ŋibin nkub ni ŋiŋmu na, le u ma ujapɔɔn Enos. 7Sef nan ki ma mbim muken, le ki nan beenin bi, ki ti saa ŋibin ikui iniin ni ŋilole, 8le ki nan saa ŋibin ikui iwae ni kipiik ni ŋilee, le ki nin kpo.
9N‑yoonn mu Enos nan ti saa ŋibin imonko inaa ni kipiik na, le u ma ujapɔɔn Kenann, 10le u nan ki ma mbim muken, le ki nan beenin bi, ki ti saa ŋibin ikui iniin ni kipiik ni ŋiŋmu, 11le ki nan saa ŋibin ikui iwae ni ŋiŋmu, le ki nin kpo.
12N‑yoonn mu Kenann nan ti saa ŋibin imonko itaa ni kipiik na, le u ma ujapɔɔn Mahalalel, 13le u nan ki ma mbim muken, le ki nan beenin bi, ki ti saa ŋibin ikui iniin ni imonko ilee, 14le ki nan saa ŋibin ikui iwae ni kipiik, le ki nin kpo.
15N‑yoonn mu Mahalalel nan ti saa ŋibin imonko itaa ni ŋibin ŋiŋmu na, le u ma ujapɔɔn Jared, 16le u nan ki ma mbim muken, le ki nan beenin bi, ki ti saa ŋibin ikui iniin ni piitaa, 17le ki nan saa ŋibin ikui iniin ni imonko inaa ni kipiik ni ŋiŋmu, le ki nin kpo.
18N‑yoonn mu Jared nan ti saa ŋibin nkub ni imonko itaa ni ŋilee na, le u ma ujapɔɔn Enok, 19le u nan ki ma mbim muken, le ki nan beenin bi, ki ti saa ŋibin ikui iniin, 20le ki nan saa ŋibin ikui iwae ni imonko itaa ni ŋilee, le ki nin kpo.
21N‑yoonn mu Enok nan ti saa ŋibin imonko itaa ni ŋiŋmu na, le u ma ujapɔɔn Metusela. 22Nee aapuwɔb le Enok nan dii Uwumbɔr aasan mbamɔm, le ki ma mbim muken, le ki nan beenin bi, ki ti saa ŋibin ikui itaa. 23U nan bi ki ti saa ŋibin ikui itaa ni imonko itaa ni ŋiŋmu. 24U nan dii Uwumbɔr mbamɔm, le kaa nan kpo. Uwumbɔr le nan di u buen paacham.
25N‑yoonn mu Metusela nan ti saa ŋibin nkub ni imonko inaa ni ŋilole na, le u ma ujapɔɔn Lamek, 26le ki ma mbim muken, le ki nan beenin bi, ki ti saa ŋibin ikui ilole ni imonko inaa ni ŋilee. 27Le u nan saa ŋibin ikui iwae ni imonko itaa ni ŋiwae, le ki nin kpo.
28N‑yoonn mu Lamek nan ti saa ŋibin nkub ni imonko inaa ni ŋilee na, le u ma ujapɔɔn 29le ki bui ke, “Uwumbɔr aah puun lii kitiŋ pu na, ubo umina pu, le ti ga kan lifuur timi aafalaa ni,” le ki yin u ke Nowa.#5.29: Baaliin ni, “lifuur” ni “Nowa” naan la. 30Lamek nan ki ma mbim muken, le ki nan beenin bi, ki ti saa ŋibin ikui iŋmu ni imonko inaa ni kipiik ni ŋiŋmu, 31le ki nan saa ŋibin ikui ilole ni imonko itaa ni kipiik ni ŋilole, le ki nin kpo.
32Nowa aah nan ti saa ŋibin ikui iŋmu na, nee aapuwɔb le u ma mbijabim mutaa, ki yin ubaa ke Sem, ki yin uken ke Ham, ki yin u uken ke Jafef.
Currently Selected:
Mpiin 5: xonB
Highlight
Share
Copy
Want to have your highlights saved across all your devices? Sign up or sign in
©1998, 2014 Wycliffe Bible Translators, Inc. All rights reserved.
