Mpiin 16

Hagar ni ujapɔɔn Ismael aabɔr

1Abram aapuu, u bi nan yin u ke Sarai na, aa nan ma ubo tii u. Tɔ, Ijipt aapiibo ubaa nan bi Sarai chee, ki ye waanaagbiipiibo, bi nan yin u ke Hagar. 2Sarai nan bui uchal Abram ke, “Uwumbɔr aa tii mi ubo. Saan di maanaagbiipiibo ngbaan, ki di ŋa aapuu, ki kpee m pu uu? Nibaakan, u ga maa ubo tii mi.” Abram nan kii tii upuu Sarai aah len pu na. 3Nima pu na, Sarai nan di Hagar tii uchal Abram, le u di u ŋa upuu. Nimina nan ŋa buyoonn Abram nan bi Kanaann aatiŋ ni ki ti saa ŋibin kipiik na la. 4Abram nan doon Hagar chee, le u dek lipuul. Hagar aah kan ke u kpa lipuul na, le waa ki lik pak udindaan Sarai.

5Sarai nan bui uchal Abram ke, “Ni ye saataani pu le Hagar aa ki lik pak mi. Min le nan di u tii si, le waah bee ke u kpa lipuul na, waa ki pak mi. Uwumbɔr le ga lik ki bee m ni si u aabɔr ŋan na.”

6Le Abram nan bui ke, “Mbamɔn, u ye saanaagbiipiibo la. Sin le joo u. Aa ga ŋmaa ŋa u saah ban pu na.” Le Sarai nan piin ki ŋani Hagar mbiin, le u ti san u chee.

7Uwumbɔr aatuun nan ti kan Hagar nnyunbun mubaa chee, mu nan bi kipɔɔk ni, ki dɔ Sur aasan chee, 8le ki bui u ke, “Hagar, Sarai aanaagbiipii, aa nyan ni la, aan ki cha la?”

U nan giin bui u ke, “M san ni ndindaan Sarai chee la.”

9Le Uwumbɔr aatuun ngbaan nan bui u ke, “Gir buen Sarai chee, ki ti li ye waanaagbiipii.” 10Le u ki bui Hagar ke, “M ga cha saamaal pɔr pam, ubaa aan ŋmaa kahn bi. 11Aa ga maa ubijabo, ki yin u ke Ismael; ba pu? Uwumbɔr ŋun saah wii limukl ponn ni pu na.#16.11: Ismael aatataa le ye ke “Uwumbɔr ŋun.” 12Le saabo ngbaan ga li bi ke timoor ni aabon na; u ni biken aan li mɔ tɔb. U ni udo yaab aan ŋmaa kpaan koo tɔb chee.”

13Hagar nan baa ubaa ke, “M sil kan Uwumbɔr, le ki beenin bi limɔfal ni, ki ga ŋmaa tuk binib maah kan u pu na aa?” Le u nan yin Uwumbɔr u nan len u chee tibɔr na ke, “Sin le ye Uwumbɔr u waa mi na.” 14Nima pu le binib yin nnyunbun mu dɔ Kades ni Bered aakaasisik ni na ke, “U bi ki waa mi na aanyunbun.”

15Hagar nan ma ubijabo tii Abram, le Abram yin u ke Ismael. 16Abram nan ye ŋibin imonko inaa ni ŋiloob le n‑yaayoonn ngbaan.

Currently Selected:

Mpiin 16: xonB

Highlight

Copy