Zlr 9
9
Dzra wa Lazglafta nda Nuhu
1Tahula tsa tama, ka tfanavatá Lazglafta ta wi ta Nuhu nda zwana ni, kaʼa mantsa: « Yawa ya ta yaku, ka nuta kuni tusak, ka ndəghanafta kuni ta haɗik. 2Katakata dzaʼa zləŋa inda rini nda nimtak, nda inda ɗyakha nda zarakha ta ndaraku ta luwa, nda inda skwiha ta mbaɗa nda huɗi ta haɗik, nda inda klipiha ma drəf tani ta kaghuni. Vlaghuna vla yu ŋa gay ghuni ta mgham ta ghəŋa taŋ. 3Ta vlaghuna vla yu ndana ta inda skwiha nda hafu mida ta gigiɗa vgha ŋa zay ghuni, manda ya vlaghuna yu ta kuzuŋ ya. 4Ama yaha kuni da za sluʼi nda hafa ni, tsaya ta nzakway ka usa ni. 5Usa ghuni ná, hafa ghuni ya. Dzaʼa ɗaway yu usa ni da rini dər nimtak a tsi ta dzatá mnda səla, manda ya dzaʼa ɗawu yu da mndu ta dzatá mnda səla ya. Dzaʼa ɗaway yu ta hafa mndu da mndu ta dzata.
6Ka pghiŋ pgha mndu ta usa mndu katsi,
mndu dzaʼa pghiŋtá usa tsa mndu ya guli,
kabga magaf maga Lazglafta ta mndu ŋa gara vgha nda tsatsi.
7Kaghuni, yawa ya ta yaku, ka nuta kuni tusak, ka ndəghanafta kuni ta haɗik, ka yafta kuni katakata tida, » kaʼa. 8Ka Lazglafta mnəglanatá Nuhu nda zwana ni kawadaga nda tsi: 9« Iʼi, wana yu ta dzraftá wi nda kaghuni nda zivirha ghuni tani, 10nda inda skwiha nda hafu ma həŋ kawadaga nda kaghuni: Ɗyakha nda zarakha, nda rini nda nimtak, nda inda skwiha ta sabi ma kwambalu kawadaga nda kaghuni, nda inda skwiha dzaʼa nzakway nda hafu ta haɗik. 11Wana yu ta dzraftá wi nda kaghuni, haɗ yu dzaʼa walglaŋta bərzləglagatá ima zlakwa luwa ŋa ɓadziŋtá haɗik, ka zaɗanata nda ima zlakwa luwa ta inda skwi nda hafu mida wu, » kaʼa. 12Ka Lazglafta ta ghəŋa tsa mantsa: « Wana yu ta magaftá ŋizla dzratá wa ɗa nda kaghuni, nda ya nda inda skwi nda hafu mida kawadaga nda kaghuni ha zivira zivir. 13Tsa ŋizla ya, dakwambuhwali ya fam yu ma ghwayak ŋa mara dzratá wa ɗa mataba ɗa nda haɗik. 14Dər yawu ŋagafta yu ta ghwayak nda ta ghəŋa haɗik, ka zlagaptá dakwambuhwali mida katsi, 15dzaʼa havap hava yu ka dzratá wi mataba ɗa nda kaghuni, nda inda mndəra skwiha nda hafu mida. Səglaghata a imi ŋa nzakwa ni ka ima zlakwa luwa ŋa zaɗglanatá inda skwiha nda hafu mida wa. 16Ma ghwayak dzaʼa zlagapta tsa dakwambuhwali ya ŋa nghay ɗa, ŋa havakta ɗa ta dzratá wi dzraf iʼi Lazglafta nda inda mndəra skwiha nda hafu mida ta haɗik. Tsa dzratá wi ya, ŋa ɗekɗek nzakwa ni. » 17Ka Lazglafta nda Nuhu guli mantsa: « Tsa dakwambuhwali ya, ŋizla dzratá wa ɗa ta fata yu mataba ɗa nda inda mndəra skwiha nda hafu mida ta haɗik ya, » kaʼa.
18Wya tsa zwana Nuhu hkən ta sabi ma kwambalu ya. Hahəŋ i Sem nda Ham, nda Yefet. Hama ta yatá Kanʼana. 19Ma tsa zwana Nuhu hkən ya yagapta mnduha ta haɗik tender.
Dmakwa Nuhu
20Ka zlraftá Nuhu ta hva haɗik, ka hvaftá tsi ta vwaha inabi. 21Ka savatá tsi ta tawata ni, ka ghuyaftá tsi, ka nzatá ka fərdiʼu ma tumpula ni. 22Ka nghanaghatá Ham da ni ma Kanʼana, ka sab tsi da zwana ma ni his. « Waʼa dada ka fərdiʼu » kaʼa nda həŋ. 23Ka klaftá i Sem nda Yefet ta gwada. Ta ŋanatá ya ta badzaga, ta ŋanatá ya ta badzaga. Ka lam həŋ nda mahulhul fanaghatá da taŋ, ka mbəɗaghutá həŋ ta kuma taŋ ŋa kwal kul nghaŋtá fərdiʼuwa da taŋ.
24Manda tsaɗata tsa ima inabi ya ma ghəŋa Nuhu, ka snaŋtá tsi ta tsa skwi magana tsa zughva#9:24 Ma aya 18 ná, tva yata zwana Nuhu ná, Sem, Ham, Yefet həŋ. Sna a lu kabgawu kəl lu ka mnay hadna kazlay Ham na zughva kəʼa wa. ya. 25Kaʼa mantsa:
« Ka nza Kanʼana nda ksiʼa!
Ka nza tsi ka kɗavakta ni mataba vuʼaha zwana ma ni. »
26Kaʼa guli mantsa:
« Glaku ná, ŋa Yawe, Lazglafta Sem,
ka nza Kanʼana ka vuʼa Sem.
27Ka sganagha sga Lazglafta ta kwakwara Yefet#9:27 Yefet nda gwaɗa Ibru na: Tsaya sganaghata.,
ka nzakwa tsi ma tumpulha Sem,
ka nzakwa Kanʼana ka vuʼa ni, » kaʼa.
28Tahula luta ima zlakwa luwa, ka zəglatá Nuhu ta vaku hkən dərmək nda hutaf mbsak. 29Mantsa tama, gwagwatá imi Nuhu ná, təmbay dərmək nda hutaf mbsak həŋ, ka mtuta tsi.
Currently Selected:
Zlr 9: xed
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.