Zlr 49

Tfanaghata Yakubu ta wi ta mndəra la Israʼila ghwaŋpəɗ his

1Ka hagaftá Yakubu ta zwana ni, kaʼa mantsa: « Tskavawa tska ka mnaghunata yu ta skwi dzaʼa slaghunaghata dazlay. 2Tskavawa tska, ka fata kuni ta sləməŋ, zwana Yakubu.

Fanawa sləməŋ ta da ghuni ta nzakway ka Israʼila.

3Rubeŋ, kagha zumala ɗa,

kagha mbrakwa zlrafta mazgun zguna ɗa,

kagha mala sgit,

kagha mala mbraku.

4Manda zala ta valu ya nzakwa gha.

Mantsa tama,

nzata a ka ka taŋtaŋa ni wu,

kabga laf la ka ta ghəzləŋa da gha, ma ŋladafta gha,

ka pghiɗaghatá ka ta hula.

5I Simghuŋ nda Levi ná, zwana ma həŋ,

nda dzra wa taŋ, ŋa maga mbraku mbraku.

6Haɗ yu dzaʼa lami da skwi ta dzrə həŋ wa.

Ksaf a fləma ɗa ta tsa skwi ta guy həŋ ta ghəŋ ta ghəŋa ni wa.

Ma gufatá ŋuɗufa taŋ ná, dzaʼa həŋ ta mndu.

Ŋa zɗanaftá ŋuɗuf ta həŋ ná, ka tsanaptá həŋ ta dzalakwa lghəŋ.

7Ka nza tsa gufatá ŋuɗufa taŋ ya ka skwi nda ksiʼa,

kabga fərtu fərta. Ka nza ŋlatá ŋuɗufa taŋ ka skwi nda ksiʼa,

kabga haɗ nziʼiŋa taŋ nda mndu wa.

Dzaʼa dagam daga yu ta zivira taŋ ma səla zivira Yakubu,

dzaʼa wutsiŋ wutsa yu ta həŋ mataba la Israʼila.

8Kagha Yahuda, dzaʼa zləzləvay zwana ma gha ta kagha.

Dzaʼa dzagana dza ka ta ghəŋa ghumaha gha.

Dzaʼa tsəlɓu vərɗa zwana ma gha ta kəma gha.

9Yahuda, manda slaɓalakwa rveri ka.

Zwaŋa ɗa!

Ksa ksa ka ta nimtak ka vraghuta da vla hana gha.

Ta nza nza rveri nda nza,

ta hana hana nda hana.

Wa dzaʼa laviŋtá sliʼanafta na?

10Ma həga ga Yahuda dzaʼa gɗavata dafa ga mgham.

Ma dzva gwal dzaʼa yata lu ma zivira taŋ

dzaʼa nzata mbrakwa ga mgham,

ha fitika sagha vərɗa mndani,

ya dzaʼa snu ndəghata mndəra mnduha ta gwaɗa da tsi.

11Dzaʼa hbana hba ta kəɗiha ni ta fwa inabi,

ta ŋərma zligamaha ni dzaʼa hbanata tsi ta zwaŋa kəɗiha ni.

Ma dvata ima inabi dzaʼa ghuɓa tsi ta lguta ni,

ma dvata ima inabi dzaʼa ghuɓa tsi ta mayafa ni.

12Ka dva ira ni ka malaghutá ghuzu,

ɓuɓa sliʼiŋa ni ka malaghutá uʼa.

13Zəvuluŋ ya, ta wa drəf dzaʼa nzakwa tsatsi,

dzaʼa mamu vla slada kwambalu ga taŋ.

Dikw da Tsiduŋ dzaʼa nzakwa haɗika ni.

14Yisakar ya, nda nza tsatsi ka kəɗih nda mbra,

ta hani ma zlərɗa gamakha.

15“Ɗinu ɗina na vli ta mbiʼi yu ta vgha na,

ŋərma vli na kwakwar na,” ka tsatsi ta gray.

Ka fiŋtá tsi ta badzaga ni mista ndəgaku,

ka fatá tsi ta ghəŋa ni ka vuʼa.

16Daŋ ya, tsatsi dzaʼa ga mgham ta ghəŋa mnduha ni,

manda sani ma mndəra la Israʼila.

17Nda nza Daŋ manda nahaɗik ta tvi,

manda mupuhwa ta wa tvi

ta hiʼida plis ta dzalakw,

kabga dɗagata mndu tida nda ga mahulhul.

18Ari Yawe! Fafta mba mnda gha yu ta ghəŋ!

19Gat ya, dzaʼa valanagha vala gəndaha.

Ma tsatsi dzaʼa mbəɗanata həŋ,

ka ghəzlaftá həŋ.

20Da Aser dzaʼa saba skwi nda mala.

Da tsi dzaʼa saba skwa zaya mamgham mgham.

21Naftali ya, nda nza tsatsi manda ghadigir flaʼu vgha ni,

ta yaya zwani ɗina ɗina.

22Yusufu ná, nda nza tsatsi manda dzuslatá ŋərma fu,

dzuslatá ŋərma fu ta wa dzuɓay

ta gala zligimha ni

ka malaghutá slrakwa matsak.

23Ka zlurgu mnduha,

ka hah həŋ nda hava.

Ka nzakw tsi ka mndu ta husaŋtá gwal hahaku.

24Ama haɗ skwi ta gigiɗaŋtá lgheɗa ni wa.

Dzvuha ni nda wa dzvuha ni ná, znuʼ znuʼa ni,

nda ma dzva Lazglafta Yakubu ta mbruta,

ka nutá ka mnda ngha rini,

ka palaka la Israʼila.

25Slna Lazglafta da gha dzaʼa katá kagha,

ka tfaghagha tfa Lazglafta ta Mbruta ta wi,

tfa wi nda imi daga ta luwa nda gaftək,

tfa wi nda imi ma ghuvata haɗik,

tfa wi nda uʼa,

tfa wi nda zlgha huɗi.

26Tfa wiha da gha ná,

malaghu mala ta tfa wiha ghwáha ŋa kɗekedzeŋ.

Malaghu mala ta ŋərma skwiha ta kuɗuŋurha ŋa ghalya.

Ka nzaf nza tsa tfa wiha ya ta ghəŋa Yusufu,

ta ghəŋa zwaŋa mgham mataba zwana ma ni.

27Biŋyamiŋ ná, katəlmay ya,

ta kwahanaptá skwa ni ksa tsi,

ga sərɗək, ta zay ta sluʼa ni,

ga hawu, ta daganap daga ta skwi mutsaf tsi, » kaʼa.

28Inda tsaha ya mndəra la Israʼila ghwaŋpəɗ his. Tsaya skwi mnana da taŋ ta həŋ ma tfanaghata ni ta wi ta həŋ. Inda taŋ, nda ŋa ni ma tva tfatá wi.

Mtakwa Yakubu

29Ka mnanaftá Yakubu ta həŋ, kaʼa mantsa: « Saba hafu ma iʼi ya, ka lamta kuni ta iʼi kawadaga nda dzidzíha ɗa ma galigha ma vwaha Ghefruŋ mnda la Het ya. 30Ka lamta kuni ta iʼi ma tsa galigha ma vwaha Makpela mbəŋ nda Mamre ta haɗika Kanʼana, skwa Abraham da Ghefruŋ la Het, ŋa nzakwa tsa kulu ya ŋa ŋa ni ya. 31Hada lamta lu ta Abraham, mantsa ya markwa taŋ Sara, mantsa ya Izak, nda markwa taŋ Rebeka, hada lamta yu ta Leʼa guli. 32Tsa vwah ya nda tsa galigha mida ya ná, skwaghu da la Het lu, » kaʼa. 33Manda kɗiŋta Yakubu ta mnanaftá zwana ni, ka hangladatá tsi ta ghəzləŋa ni, ka sab hafu mida, ka laghu tsi da dzidzíha ni.

Currently Selected:

Zlr 49: xed

Highlight

Copy