Zlr 14

Zluʼagapta Abram ta Lut ma dzva mghamha fwaɗ

1Ma fitika nzakwa Amrafel mghama Singhar, nda Aryuk mghama Ilasar, nda Kədurlaghumer mghama Ghelam, nda Tidghal mghama Gwayim, 2ka sliʼaftá vulu mataba taŋ nda Bera mghama Sədum, nda Birsa mghama Ghamura, nda Sinʼav mghama Adma, nda Semʼever mghama Tsevuyim, nda mghama Belagh ta hgə lu ka Tsughwar ya. 3Ka sliʼadatá tsa mghamha hutaf ya, ka tskavata ma didiŋa ma Siddim, ta nzakway ka drəfa Slughul ndanana ya. 4Ghwaŋpəɗ his vakwa taŋ ta sna gwaɗa da Kədurlaghumer, ta maghwaŋpəɗ hkəna vakwa taŋ tama, ka gaftá həŋ ta sidi.

5Ta maghwaŋpəɗ fwaɗa vaku, ka sliʼaftá mgham Kədurlaghumer nda mghamha kawadaga nda tsi, da vulu. Ka zatá həŋ ta la Rafa, ma luwa Ghastərut Karnayim, nda la Zuz ma luwa Ham, nda la Im, ma luwa Savekiriyatayim, 6nda la Huri ta ghwá taŋ ta haɗika Seghir. Ka liŋtá həŋ ta həŋ ha ka laghu nda ma Ilparaŋ ndusa nda wa mtak. 7Tahula tsa, ka mbəɗagaghatá həŋ ta vgha nda ma Gheŋʼmispat ta hgə lu ka Kades, ka zatá həŋ ta herhera la Ghamalek. Ka zatá həŋ guli ta la Amuru ta nzaku ma haɗika Hatsuŋʼtamar ya.

Ksaghatá Lut ka vuʼa

8Tahula tsa tama, ka sliʼagaptá i mghama Sədum, nda mghama Ghamura, nda mghama Adma, nda mghama Tsevuyim, nda mghama Belagh. Tsa luwa ya ta hgə lu ka Tsughwar. Gwedza gwedza guya guya həŋ ma didiŋa Siddim, 9nda Kədurlaghumer mghama Ghelam, nda Tidghal mghama Gwayim, nda Amrafel mghama Singhar, nda Aryuk mghama Ilasar. Mghamha fwaɗ ta guyata nda mghamha hutaf. 10Ka ghəzlaftá lu ta i mghama Sədum nda Ghamura. Tsaw tsa vli ma daɓi ma didiŋa Siddim ya ná, ka ghurumha kwalta dzeʼdzeʼ nzakwa ni. Ka rkaghatá həŋ da tsa ghurumha ya, ta hwayaghatá sanlaha nda ta ghwá. 11Ka hlaghatá tsa gwal ta zatá ghwa ya ta nekwata skwa la Sədum nda Ghamura, nda inda nimaya taŋ, ka laghwa taŋ. 12Ka ksiŋtá həŋ ta Lut zwaŋa zwaŋama ni ma Abram ta nzaku ma Sədum, nda inda skwa ni, ka laghwa taŋ. 13Ka hwayaktá sana mndu ta ndapta ma tsa vulu ya, da mnanatá Abram mnda la Hebru ta nzutá nzakwa ni ndusa nda fuha dagala dagala ma Mamre. Mamre ná, si mnda la Amuru ya, zwaŋama ni ma i Iskwal nda Ghaner. Ka dzraftá tsa mnduha ya ta wi nda Abram. 14Na tsa gi snaŋta Abram ta tsa lwa ksaghatá zwaŋama ni ka vuʼa ya, kaʼa nda kwalvaha ni yaya lu ma həga ga taŋ, gwal ka bikwira vulu mantsa: « Hbawa vgha, » kaʼa nda həŋ. Ka zbiŋtá tsi ta tsa mghamha ya, ha da Daŋ. 15Ka dagaptá tsi ta ŋwa mnduha ni kabga ŋa valanaghatá həŋ girviɗik. Tsatsi nda kwalvaha ni, ka zatá həŋ ta tsa ghumaha ya, ka liŋtá həŋ ta həŋ, ha da Huba nda təv mazlaya Damas. 16Ka vranaktá tsi ta nekwata tsa skwiha ya, vranakha ta zwaŋama ni Lut kawadaga nda nekwata skwiha ni guli. Mantsa i miʼaha, nda inda gwal si hlagha lu ya guli.

Guyakwa Abraham nda Melkisedek

17Ta vraktá Abram tahula zatá ni ta mgham Kədurlaghumer, nda tsa mghamha kawadaga nda tsi ya, ka sab mghama Sədum da guyay ma didiŋa ma Save ta nzakway ka didiŋa mgham. 18Ka sab Melkisedek mghama Salem, mnda dra skwi ŋa Lazglafta Dagala, ka klaktá tsi ta buradi nda ima inabi. 19Ka tfanaghatá tsi ta wi ta Abram, kaʼa nda tsi mantsa: « Ka tfanagha tfa Lazglafta Dagala, ya ta zlagigiŋtá luwa nda haɗik ta wi ta Abram. 20Zləzləvama Lazglafta Dagala, kabga tsatsi ta vlaghatá ghumaha gha ma dzva gha, » kaʼa. Ka hlaftá Abram ta zaka ma inda tsa skwiha hlak tsi ya, ka vlaŋta.

21Tahula tsa, ka mghama Sədum nda Abram mantsa: « Vliha vla ta kuraghuta mnduha, ka hla kagha ta inda skwiha, » kaʼa. 22Ka Abram zlghanaftá wi ta mghama Sədum mantsa: « Ta kapaf kapa yu ta dzva ɗa təv Yawe, Lazglafta Dagala ta zlaganaptá luwa nda haɗik. 23Ta waɗa gha waɗa yu, haɗ yu dzaʼa ksaŋtá inda skwi, dər sləvdza skwi, dər zuʼa ɓaɓaha skwi ta nzakway ka ŋa gha wu, kabga yaha ka mnay kazlay: “Nanaf na yu ta Abram ka galipi kəʼa.” 24Haɗ sana skwi dzaʼa klaʼata yu ɗekɗek wu, ba tsa skwa zay zu duhwalha ɗa ya. Skwi ta nghanata mayaka tsa mnduha ta sliʼafta kawadaga nda iʼi, i Ghaner nda Iskwal, nda Mamre ya, hahəŋ ná, dzaʼa hlay hahəŋ ta ŋa taŋ ma mayak, » kaʼa.

Currently Selected:

Zlr 14: xed

Highlight

Copy