Slg 21

Lagha Pwal da luwa Ursalima

1Tahula dgata ŋni ta vgha nda həŋ, ka lam ŋni da kwambalu. Ka sliʼafta ŋni ka laghu tur da luwa Kus. Ga mahtsima ni, ka sliʼafta ŋni ka laghu da luwa Rudes. Ka gi sliʼafta ŋni hada guli ka laghu da luwa Patara. 2Hada, ka slafta ŋni ta sana kwambalu ta sliʼi da luwa Finisi, ka lam ŋni dida, ka laghu ŋni. 3Nghay ŋni ta luwa Kiprus manda a, haɗik ya ta tsavata ma drəf, ka zluŋtá ŋni nda ga zlaɓa ŋni ka laghu ŋni nda təv haɗika Siri. Ka ɓhadaghatá ŋni da luwa Tir ma vla pghay kwambalu ta huzla. 4Hada, ka slanaghatá ŋni ta gwal zlghay nda ŋuɗuf, ka zata ŋni ta fitik ndəfáŋ da həŋ. « Ma laf ka da luwa Ursalima, » ka həŋ nda Pwal, manda kɗakwa Sulkum nda ghuɓa ta mnanaŋtá həŋ. 5Ma kɗavakta tsa mandəfáŋa fitik ya, ka sliʼafta ŋni ka sliʼi. Ka pghafta həŋ demdem ta aŋni, nda miʼa taŋ, nda zwana taŋ tani, ha ka zluŋtá huɗa luwa. Ɓhadaghata ŋni ta wa ghwa, ka tsəlɓata ŋni, ka magatá duʼa. 6Manda dgata ŋni ta vgha nda həŋ, ka ŋlaftá aŋni ta kwambalu, ta vraghuta hahəŋ dzagha taŋ.

7Ka kɗiŋtá ŋni ta mbaɗa ŋni nda kwambalu. Sliʼafta ma luwa Tir ka ɓhadaghata da luwa Tulemayis. Hada, ka gaguvta ŋni ta zgu nda zwana ma. Ka zata ŋni ta fitik turtuk kawadaga nda həŋ. 8Ka sliʼafta ŋni ga mahtsima ni ka dzaʼa, ka ɓhadaghata ŋni da luwa Sezare. Ka sliʼafta ŋni guli ka lagha da Filip ta hgə lu ka mnda mna gwaɗa Lazglafta, ta nzakway ka mndu ya tekw mataba tsa gwal ndəfáŋ ya kay#21:8 Ngha ta Slna gwal ghunay 6:5. Nda 8:5-40.. Ka lam ŋni da həga ga taŋ ka hanay ga taŋ. 9Mamu kwagha ni fwaɗ ka daghali ka daghali ta klaktá lwa Lazglafta. 10Nda za fitika ŋni ŋulum hada tama, ka sliʼaftá sana anabi ta hgə lu ka Agabus daga ta haɗika Zudiya, 11ka sagha da slaŋnaghata. Ka klaftá tsi ta ɓanava Pwal, ka habanatá tsi ta səlaha ni nda dzvuha ni. Kaʼa mantsa: « Wya skwi mna Sulkum nda ghuɓa: Ka ŋa wa nana ɓanava na ná, manda va yeya dzaʼa habafta la *Yahuda ta tsa mndu ya ma Ursalima, ŋa klafta taŋ ka fanamta gwal kul nzakway ka la Yahuda ma dzva taŋ, » kaʼa.

12Na snaŋta ŋni ta tsa gwaɗa ya, nda aŋni tani, nda gwal ma tsa vli ya tani, ka ndəɓ ŋni ta dzvu ŋa Pwal ŋa kwala ni kul lafi da Ursalima. 13Ka Pwal nda aŋni mantsa: « Ta ghəŋa wu ta tawa kuni ta taw. Ta kumay kuni ta giɗiftá zləŋ ra? Iʼi taɗa ná, ŋa habaftá iʼi yeya a wu, dər má ŋa dzatá iʼi ma Ursalima ta ghəŋa hga Mgham *Yesu tsi, nda fa vgha ɗa, » kaʼa. 14Na tsa trapta ŋni mida ya ná, ŋəvglaŋ a aŋni guli wa. « Ka maga Mgham Yesu ta skwi ya kumaŋ tsi, » ka aŋni ta ghəŋa ni.

15Tahula luta tsa fitik ya tama, ka hbaftá ŋni ta vgha, ka ŋlaghatá da luwa Ursalima. 16Ka sliʼaftá sanlaha ma gwal zlghay nda ŋuɗuf ma luwa Sezare guli mista ŋni. Ka pghadaghata həŋ ta aŋni da vli ya dzaʼa hani ŋni ta hani ga sana mndu ta hgə lu ka Menasuŋ, mnda sana luwa ta tsavata ma drəf, ta hgə lu ka Kiprus. Nda kɗa fitika tsa mndu ya ma zlghay nda ŋuɗuf.

Nghanaghata Pwal ta Yakubu

17Ɓhadaghata ŋni da Ursalima, ka tsuʼafta zwana ma ta aŋni nda rfu. 18Ga mahtsima ni, ka sliʼaftá Pwal kawadaga nda aŋni ka lagha da Yakubu. Ka lagha gwal *Igliz tskavata demdem hada. 19Tahula ganaghata Pwal ta zgu ta həŋ, ka rusu tsi turtuk turtuk ta skwi maga Lazglafta mataba gwal kul nzakway ka la *Yahuda nda ma slna ni. 20Snanata taŋ ta tsa skwi rusanaf Pwal ta həŋ ya, ka zləzlvu həŋ ta Lazglafta. Ka həŋ nda tsi mantsa: « Zwaŋama, nda ngha ka ta dəmbuʼata la Yahuda ta zlghafta ya kiʼe, ta ŋava ŋa həŋ ka sna zlaha Musa. 21Ka lu nda həŋ nda gwaɗa ta kagha ná, ma snə kuni ta zlaha Musa, ma ɗatsə kuni ta fafaɗa zwana ghuni, ma taghə kuni ta nzakwa la Yahuda, ká ka ta taghay ŋa inda la Yahuda ta nzaku ma səla hamata sanlaha ma mnduha, ka lu ta mnay. 22Waká lu dzaʼa magay? Ya wya dzaʼa nda sna həŋ kahwathwata kazlay: Hadna ka kəʼa, dzaʼa sliʼagagha sliʼa həŋ. 23Ka si mantsa tsi, ka maga ka ta na skwi dzaʼa ŋni mnaghata na. Mamu sana mnduha fwaɗ mataba mu ta waɗana ta waɗu ta Lazglafta. 24Hla ta həŋ ka dzaʼa ka da tsalapta ghəŋa gha kawadaga nda həŋ. Ka plata ka ta skwi ma dzaʼa hahəŋ da play. Tahula tsa, ŋa htsiŋta taŋ ta ghəŋa taŋ. Ka maga maga lu mantsa katsi, dzaʼa nda sna inda mnduha kazlay, tsa skwi ta snə mu ta mnay ta Pwal ya kay ná, tsakalawi ya kəʼa. Ma tsaya dzaʼa kəl lu ka snaŋta kazlay: Ta snay kagha ta zlahu guli kəʼa. 25Ŋa gwal kul haɗ ka la Yahuda ya, tsiŋ tsa mu ta ghəŋa ni ka vindanafta mu ta həŋ kazlay: Yaha həŋ da za sluʼa skwa wuyay, yaha həŋ da za us, yaha həŋ da za skwi ɓərta lu nda ɓərta, yaha həŋ da maga sliʼiŋsliʼiŋ#21:25 Ngha ta Slna gwal ghunay 15:20. kəʼa, » ka həŋ.

26Mantsa tama, ka sliʼafta Pwal kawadaga nda tsa mnduha fwaɗ ya ka tsalapta tsi ta ghəŋa ni. Ga mahtsima ni, ka lam tsi da həga Lazglafta, ŋa mnata fitika dzata ghəŋa tsa tsalatá ghəŋ, nda vlata skwa pla ghəŋ dzaʼa vlə lu ta həŋ ta həŋ ya.

Ksaftá Pwal ma həga Lazglafta

27Baɗu kɗavakta tsa mandəfáŋa fitik ya, ka nghaŋtá la *Yahuda ta sagha ta haɗika Asiya ta Pwal ma həga Lazglafta. Ka gagaftá həŋ ta dəmga, ka ksafta həŋ ta Pwal. 28Ka dzata həŋ ta lawlaw: « Ari mnduha la Israʼila! Kudiɗwa! Ya wana tsa mndu ta ra inda vli ka raraza mnduha mu, nda zlaha Musa, nda na həga Lazglafta na tani ya kay. Lagha ni guli ná, ka hladamtá la *Grek da na həga Lazglafta na, ka ŋəriŋtá na vli nda ghuɓa na, » ka həŋ. 29Tsaw si nghiŋngha həŋ ta sana mndu ta hgə lu ka Trufim, mnda la Afisus kawadaga nda tsi ma luwa. Zlah si kladam kla Pwal ta tsa mndu ya da həga Lazglafta ka həŋ si ta gray.

30Kɗukuts sliʼavaf sliʼa vli ma luwa, ka gazladaghatá mnduha ma inda vli. Ka ksaftá həŋ ta Pwal ma həga Lazglafta, ka ksigiŋta dzibil, ka gi hahuŋtá tghaha. 31Ta naghay naghay həŋ ta tva dzatá Pwal ta lagha lu da mnay ŋa mghama sludzi kazlay: ya nda ɓadza vli ma luwa Ursalima kəʼa. 32Ka gi hlaftá tsi ta sludziha nda maliha ta ghəŋa la sludziha, ka sliʼafta həŋ ka ndadaghata slanaghata həŋ. Nghay taŋ ta mghama la sludzi nda la sludzi tani, ka gi zlaŋta həŋ ta dza Pwal. 33Ka gavadaghatá mghama la sludzi ka ŋanatá Pwal, ka tsatsanaftá ziɗaha his. « Wa va kagha, nahgani maga ka? » kaʼa nda tsi. 34Ka nu ŋa ya ta gwaɗay, ka nu ŋa ya ta gwaɗay, ka tsa tskata ghəŋa mnduha ya. Triɗ, trapta mghama sludzi ta ksaftá ghəŋa gwaɗa, kaʼa mantsa: « Klawa kla ta na Pwal na da vla nzakwa la sludzi, » kaʼa. 35Ndusadaghata Pwal ta vata dzatá tva ŋlu da həga, ka gi tsukwaghatá la sludzi, kabga nda ga sida mnduha. 36« Dzata! Dzata, dzata! » ka tsa ŋəɗdəma ta mnduha ta mbaɗa mista ni ya, ka dzaʼa nda hla wi.

Waɗay Pwal ta ghəŋa ni

37Taghwaŋ a lu ka kladamta Pwal da vla nzakwa la sludzi tama wu, « dzaʼa tsuʼay ka, ka mnaghaŋta yu ta gwaɗa ɗa ra? » Ka Pwal nda tsa mghama sludzi ya. « Nda sna ka ta gwaɗa la *Grek ra? 38Kagha a na mnda la Masar ta sliʼanaftá zlərɗa wi kamataŋ, ka hlaghatá gəndaha dəmbuʼ fwaɗ da mtak ya wu ra? » kaʼa nda Pwal. 39Ka Pwal mantsa: « Mnda la *Yahuda iʼi, ya lu ma luwa Tarsis ta haɗika Silisi, zwaŋa sana luwa ta klu lu ya yu. Kdəkkdək, vliha vla ta tvi ka gwaɗganata yu ta mnduha, » kaʼa. 40Ka vlaŋtá tsa mghama la sludzi ya ta tvi. Ka sladatá Pwal ta tsa dzatá tva dzaʼa da həga ya. Ma hlə kuni ta wi, kaʼa nda dzvu nda mnduha. Sriw, nza nza mnduha. Ka zlraftá Pwal ta gwaɗa nda həŋ nda gwaɗa *Hebru.

Currently Selected:

Slg 21: xed

Highlight

Copy