Slg 14

I Pwal nda Barnabas ma Ikwaniya

1Manda ɓhadaghata i Pwal nda Barnabas da luwa Ikwaniya, ka lam həŋ da həga tagha skwa la *Yahuda, ka mnə həŋ ta gwaɗa Lazglafta. Ma tsa mnay taŋ ya, ndaɗaʼa ndəghatá la Yahuda nda la *Grek ta zlghafta nda ŋuɗuf wa. 2Ama mbaɗa tsa la Yahuda kul zlghafta nda ŋuɗuf ya, ka gagaftá gwal kul nzakway ka la Yahuda ŋa gwafta wi nda həŋ ka zba gwaɗa da zwana ma. 3Kulam nda tsa, ka nzəɗavatá i Pwal nda Barnabas ma tsa luwa Ikwaniya ya. Ka mnə həŋ ta gwaɗa Lazglafta ka ŋɗaŋɗa nda fatá ghəŋ dar ta Mgham Lazglafta. Vərɗa gwaɗa tsa gwaɗa ya, ka Mgham Lazglafta nda həŋ nda ma vlaŋta ni ta mbrakwa maga mazəmzəm, nda mandərmimi ta həŋ. 4Ka dgavaptá mnduha his gamndər ma tsa luwa ya. Gəts ya laha mista la Yahuda, gəts ya laha mista gwal ghunay. 5Ka dzraftá la Yahuda, nda gwal kul nzakway ka la Yahuda, nda maliha taŋ ta wi, ŋa liŋtá i Pwal nda Barnabas nda pala ŋa pslatá həŋ. 6Ka snanaghatá tsi ta i Pwal nda Barnabas. Ka laghu həŋ da ɗiɗifa vgha ma luwa Listra, nda ya ma luwa Derba ta haɗika Ikwaniya, nda ya ma luwaha ta wanafta. 7Ka mnə həŋ ta *Lfiɗa Gwaɗa ma tsa vliha ya guli.

I Pwal nda Barnabas ma Listra

8Ma tsa Listra ya guli, mamu sana mndu nda rwa səla ni ta kul walaŋta mbaɗaŋtá mbaɗa daga yagata, ta nzakwa ni hada. 9Ka fatá tsi ta sləməŋ ka sna tsa gwaɗa ta mnə Pwal ya. Ka faftá Pwal ta iri tida. Ta nghə tsi ná, mamu zlghay nda ŋuɗuf da tsi prək ka mbanafta. 10Ka Pwal nda tsi mantsa: « Sliʼaf sliʼa ka sladata ka nda səla gha, » kaʼa nda tsi nda lwi dagala dagala. Gi vɗuk kəʼa valavata, ka mbaɗ tsi ta mbaɗa. 11Nghanata tsa tskata mnduha ya ta tsa skwi maga Pwal ya, ka hlaftá həŋ ta wi nda gwaɗa Ikwaniya ta nzakway ka gwaɗa taŋ. « Wana sliʼagata lazglaftaha manda mnda səla tsakwam tsakwam da slamaghata#14:11 Ngha ta Slna gwal ghunay 28:6., » ka həŋ. 12« Zeyus » nana, ka həŋ nda Barnabas. « Hesmes » nana, ka həŋ guli nda Pwal, kabga tsatsi ta gwaɗa. 13Ka ksagaghatá mndu ta pla tsa Zeyus banaf lu ta həga ni ta tva lami da tsa luwa ya ta lghəŋha rkanaf tsi ta rka ta wa tgha tsa həga ya. Ta kumay tsatsi nda tsa tskata mnduha ya tani, ta planatá ghəŋ ta i Barnabas nda Pwal. 14Snaŋta tsa gwal ghunay ta nzakway ka i Barnabas nda Pwal ya ta tsa skwi ya, ka kwahiŋtá həŋ ta lgut ta vgha taŋ, ka ndadamta da taba tsa tskata mnduha. Ka həŋ mantsa: 15« Nawawanawa zwana ma, nahgani na dzaʼa kuni magay na? Mndu aŋni manda va kaghuni tane. *Lfiɗa Gwaɗa ŋa aŋni ta kləgaghunaghata, ka zlaŋta kuni ta skwa wuyayha ka mbəɗakta kuni ta vgha təv Lazglafta ya nda hafu mida, ya ta magaftá luwa nda haɗik, nda inda skwiha mida tani. 16Ghalya ná, zliniszla ta tvi ta mnduha ŋa ksa tvi ya ta kum həŋ. 17Aŋ mndani, ta kwalaghu a Lazglafta ta maraŋtá ghəŋa ni nda maga zɗaku wa. Ta nzəgaghuna nza ta imi daga ta luwa, ta magaku skwi ma vwaha ghuni, ta hasl nda hasla kuni ta skwa zay, ta taku ŋuɗufa ghuni da rfu, » ka həŋ. 18Kulam nda va tsa mnay taŋ mantsa ŋa taŋ ya, zlah zlah ka həŋ pyaftá həŋ ta dzaʼa pla ghəŋ ŋa taŋ.

19Ta ma tsa gwaɗa ya həŋ, ka sliʼadaghatá la *Yahuda ma luwa Aŋtakiya nda gwal ma luwa Ikwaniya, da baraftá tsa tskata mnduha ya. Ka zləzlərtsə lu ta Pwal ma ŋa dzata. Zlah nda mta tama ka lu ka tsəhidiŋta tahula luwa ta wa mazawa. 20Ama ka lagha gwal zlghay nda ŋuɗuf wanaghatá vgha, ka sliʼaftá tsi ka lami da huɗa luwa.

Ga mahtsima ni, ka sliʼaftá tsi kawadaga nda Barnabas ka laghu da luwa Derba.

Vraghata da Aŋtakiya ta haɗika Siri

21Ka mnə həŋ ta *Lfiɗa Gwaɗa ma tsa luwa ya. Ka mutsaftá həŋ ta ndəghata gwal ta zlghafta nda ŋuɗuf. Tahula tsa, ka vraghatá həŋ da luwa Listra, nda ya da luwa Ikwaniya, nda ya da luwa Aŋtakiya ta nzakway ta haɗika Pisidi ya. 22Ka vlaŋtá həŋ ta mbraku ta tsa gwal zlghay nda ŋuɗuf ya, ŋa dihavata taŋ ma zlghay nda ŋuɗufa taŋ. « Nda ma ghuya ɗaŋwa kavghakavgha dzaʼa lama lu da ga mghama Lazglafta, » ka həŋ, nda həŋ. 23Ka paghanamtá həŋ ta gwal ŋa ngha mnduha ta həŋ ma inda vla guyatá ghəŋa mnduha Lazglafta. Tahula ndəɓata taŋ ta dzvu kawadaga nda suma, ka fanamtá həŋ ta tsa mnduha ya ma dzvu ta Lazglafta, ya zlghaf həŋ.

24Ka sliʼaftá həŋ ka laghu nda ta haɗika Pisidi, ka ɓhadaghatá həŋ ta haɗika Pamfali. 25Ka mnə həŋ ta gwaɗa Lazglafta ma luwa Perge. Ka sliʼaftá həŋ ka laha da luwa Atali. 26Ka sliʼaftá həŋ nda kwambalu hada guli, ka laghu da luwa Aŋtakiya ta nzakway ta haɗika Siri ya. Ma tsa luwa ya mutsafta həŋ ta zɗakatahuɗa Lazglafta ŋa maganatá slna ya kɗa həŋ ta magay. 27Manda ɓhadaghata taŋ, ka tskanatá həŋ ta *Igliz, ka rusu həŋ ŋa taŋ ta inda skwi ya mag Lazglafta nda həŋ, nda ya kəʼa guninistá tva zlghay nda ŋuɗuf ta gwal kul nzakway ka la *Yahuda guli. 28Ka hanavatá i Pwal nda Barnabas katakata ma luwa Aŋtakiya kawadaga nda gwal zlghay nda ŋuɗuf.

Currently Selected:

Slg 14: xed

Highlight

Copy