VUN ŊGOLNA 5
5
Gol taŋ jivi ko cara gawlaŋga
1Goonna, jeɓeren yal manna jiviya,
tin humuŋ hum gasira an daɗta.
2A aŋ li ni sa ma ɗilina,
vunuŋ di ni dlara jivira yalna.
3Na daŋ may boy ma ay fun cara gawlaŋgana ni
ko ndal mbul yumma na.
Dlara ndaɗ daɗta jivi ko mbulna na,
4may ŋgoo daganda ni ndaɗ ki galaara
ko ndal jarakka na,
ki siina ko ndal ŋgew ma siim guuri luh luhna na.
5Seɗ tuɗ ni hu voɗta vi miɗnara,
ndaɗ tuɗ ni ga hu lina vi suu miɗina.
6Ndaɗ ka saa kay voɗta vi iiriraɗi lay,
voɗ maɗta viɗ ki iriɗ ni
ndaɗ ka wi li ma ndaɗ a tuɗ hunaɗi lay.
7Cemi ni agi, goryonu, humun vunun haa,
ɦal ŋgorogi maŋ dlara an dagi wandaraɗi.
8Ҥuɗ taŋ ki eg ca ndaɗta na day.
Tin taŋ ay eg ziiɗna tokgi.
9Kay ka ndaɗ ɦaŋ jivi maŋga ki maŋ sa ma daŋgi.
Jogoŋ basa maŋga kay ndaŋgarara ki maŋ sa ma ka wi hahaw saɗinaɗi.
10Ka a suu koyogina hoɓ ki u saɓakaŋgi,
ka tlesuu aŋ lasi u saɓakaŋŋa
a tuɗ ki maŋ sa ma aŋ ka wambinaɗi.
11Ŋgoo daganda aŋ hin daɓ ki ni ɦawana,
tliwiŋ ka a hin egeŋ oloɗi lay.
12Aŋ hin mbuɗ ɓak taŋ ana,
«An hum ka u haɗtaɗi ni kay mege?
Hurun vi dla mayra dandara kaɗi ni kay mege?
13An hum haɗta vi suu haɗanna kaɗi ni kay mege?
An min ka a tin humun kay dlara asi daɗtaɗi ni amege?
14Hin na ew a an kal ki hu wihawra duk suu tokina,
dee suu taɓi kel tasi dewna, asi a dikin kira.»
Min caaŋga aŋ vaɗ u zoŋ taŋga
15Ci ni mbo ma hu goloŋ maŋgana,
nam law ay ni hu goloŋ maŋga daŋ may.
16Hin mbo goloŋ maŋga a ɓaɗ ha ki ga hu voɗtaɗi,
hinim a ɓaɗ ki hu li ma suuna tuɗ hu belnaɗi.
17Ko goloŋ maŋga li ni maŋ na hol,
ɓorowoɗ ha ki maŋ suu daŋŋaɗi.
18Ko goloŋ maŋga paɗ vunna li kaɗu,
furi u caaŋga aŋ vaɗ u zoŋ taŋga.
19Caaŋga li iriŋ jivira ko ndal dukka na,
pooɗ li cuki kaŋ na tew tew,
zoŋ maɗta furuyuŋ huruŋ na gak gak.
20Goonna, aŋ viɗ taŋ ki u cara daŋga ni kay mege?
Aŋ lam po cara aŋ ka waɗɗira ni amege?
21Kay ii Yawe ka wi voɗta vi suunara halaŋ,
nam ka golosi voɗta asi tuɗ huruɗta halaŋ.
22Sa ma dlam cona dla coomba vammi ndaɗ tok,
nam hin vi ni hu bayna vi dla coomba tok.
23Sa ma ka doo tambina ba tam ki ni kay tamu,
laɓa mamba tuɗum hu miɗna ni ndaɗu.
Currently Selected:
VUN ŊGOLNA 5: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
