MATIYE 3
3
Bolla vi Jaŋ ma mbus batem maŋ suuna
(Mark 1.1-8; Luk 3.1-18; Jaŋ 1.19-28)
1Hu buu namma, Jaŋ ma mbus batemma maŋ suuna kal ay ki ŋgoo bagi hu mbassa Yudera. Nam sawalla 2ana, «Jokogi hurugi ki jivi zeɗ. Mulla huulonara mbawa tok.»
3Jaŋŋi sa ma Ezayi ma jok vun Lona di ki kam ana,
«Del sana sawalla ki ŋgoo bagiya,
Ɗoɓogi voɗta vi Bu Suunara kiyo,
Mbuuɗ huruɗ kiyo.»
4Jaŋ baraw mamma cili ni u tlimiɗ jamballa, gandina njuni hurumu. Tlesuu nam tasina ni baarina u mbul yumma ki ŋgoo bagiya. 5Suu Yerusalemma u suu hu mbassa Yudera u suu fun lumma Yurdanna mbay egem halaŋ. 6Asi yi coosira ki u vunusiya, nam mbususi batemma duk mbo lum ma Yurdanna ni na gaw.
7Jaŋ wi suu Farisenna u suu Sadusenna mbay egem coco ana nam mbususi batemma na ni, nam dasi ana, «Agi njaf guy magira, sa haɗagi a agi puruɗ tagi ki ko yara vi Lonara ni gege? 8Lagi dlara jivira a tak ana hurugi ki joki zeɗ. 9Saaragi hurugi ana, Abraham ni bumiya naɗi. An dagiya, Lona ndak a mbuɗ ɦinira ki a goryoŋ Abrahamma layɗi su? 10Njetna ka gira a ka sari gugunina kiyo, gu ma vuɗum ka jiviɗi na, kaam kiyo, gam ki duk kura. 11An mbusugi batemma duk yona a tak ana hurugi mbuɗ ki zeɗ. Sa ma mbay ŋgoron daganna, hin mbusugi batemma u Musuk Lonara, u kura may, kay dlam ŋgol suunu. An ndak ka a ziirim tuɓuru mammaɗi lay. 12Kaalam mamba feɗ wa blena ka komu, vaa ma neeyna, cukum hu veena, barra nam hin ŋgalaɗ ki duk kura ka miɗɗira.»
Yesu mbus ki batemma
(Mark 1.9-11; Luk 3.21-22)
13Yesu col ay hu mbassa Galilera tuɗ hu lumma yam ana Yurdanna mba eg Jaŋ ana nam mbusum batemma. 14Jaŋ cam wayra ana, «Aŋ a mbusun batemma ni aŋ ɗowɗi su? Aŋ mbay egen na ɗow su?» 15Yesu hoŋom dira ana, «Hin na ta! Mbusun ɗow. Ay li wa na ni, dlara Lona miniɗta.»
Jaŋ hurum viya, mbusum batemma gaw. 16Yesu fi batemma fi ni, a ɗuŋ ay ki kolora wanni, huulona mal ki gaw. Nam wi Musuk Lonara si ay kam ko gugukka na. 17Della ɓak ay kolo huulona ana, «Wanni goron ma an minimma. Nam irin jivi ɦay.»
Currently Selected:
MATIYE 3: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
