LUK 8
8
Boyogi suu tuɗ u Yesuna
1Yesu tuɗ hu zi ma ŋgolona u ma gorina di Boy ma Ayra kay Mul Lonara. Suu haɗi mam suu doogo yam mbana tuɗ umu, boyogina may. 2Boyogi suu nam dikisi fulina ki kasina garaɗasi ki hu tuguɗi masira lay. Mari ta Magdalara nam dikiɗ fulina ki kaɗ kiɗisiyara. 3Jan caŋ Kuzara, sa fun Herodna. Suzan u boyogi suu hiŋŋa ni suu njun u Yesu a ɦam tlena u suu haɗi mamsina lay.
Yesu tin ndal boyna u waɗ njafna
(Matiye 13.1-9; Mark 4.1-9)
4Suuna ay hu zina zeɗ zeɗ halaŋ mbay eg Yesu. Yesu wi suuna mol coco na ni, nam dasi u ndal boyna ana,
5«San dew kal ki bagi waɗ njafna. Nam a waɗamba wanni, ii njaf ma ɦiw yak ki keŋ voɗta, suuna tuɗ ki kam lay, layagina koɓom ki lay. 6Hiŋŋa ndi kay gogoyra, hu li ma nam day ki kolo na may ni, so ki gaw, kay lina ka um ŋgolombi. 7Ma hiŋŋa ndi duk wayara, wayara cili kam cilni cam ki gaw. 8Hiŋŋa ndi kay ndaŋgara jivira, ma namma cuk yam ŋgoloo, irim ne kis may.» Yesu hin dasi hu ana, «Agi suu humugi a humma, humugiya.»
Yesu tin ndal boyna na ni kay mege?
(Matiye 13.10-17; Mark 4.10-12)
9Suu haɗi suu vi Yesuna joɓom ana, «U ndal boy namma ni ana mege?» 10Nam hoŋ dasi ana, «Agi ni suu Lona gagi u boy ma ŋgay kay Mul Lonara kina. Maŋ suu hiŋŋa an ɓakasi u ndal boyna. Gam um ka ki maŋ suu hiŋŋa koɗi.
Asi gola ka wiɗi,
asi jeɓeera, ka humbi lay.»
Yesu vasi u ndal boy ma tinim u waɗ njafna kiyo
(Matiye 13.18-23; Mark 4.13-20)
11«Humugi u ndal boy ma kay waɗ njafna ha ɗaŋ. Waɗ njafna ni Boy ma vi Lonna. 12Suu ɦiw ni ko njaf ma yak keŋ voɗta na. Asi hum Boy ma vi Lonana na ni, Satanna yowosina ki hurusi gaw. Ka hinisi a tin hurusi a suɗ kiɗi. 13Suu tli tasi u ndaŋga goyra na ni suu hum Boy ma vi Lonna, vam u ayra ka hinim a kal sariyam hurusiɗi. Nam kak hurusi ew daŋ. Dlara loɓma mba wa ni, asi hinim voɗom gaw. 14Ii njaf ma ndi duk wayara ni suu hum Boy ma vi Lonna hummi, hurusi ki tini kay tlesuu kay ndaŋgarana, begera mbaɗasi hurusiya, tlesuu asina muruɗusi boy ma vi Lonna ki hurusiya, boy namma ka zul hurusiɗi. 15Ii njaf ma waɗ kay ndaŋgara jivira ni suu hurusi ndaki, jiviya hum Boy ma vi Lona, li umu, vam hurusi lay, tuɗ fok u nam gak gak. Boy namma zul hurusi coco may.»
Yesu tin ndal boyna kay pindilla
(Mark 4.21-25)
16«San do ku pindilla kom doni, ka kuluɓuɗ yaɗ ki kaŋgaɗi, ka ŋgayaɗ ki u laynaɗi lay. A jivira ni aŋ gaɓaɗ ki ni koloo. Kay suu kal kalafna wi lina ki jiviya. 17Tlesuu ŋgayna halaŋ usi hin gi ki mbeeɗi su? Tlesuu dluri kaŋgana halaŋ hin wi ki lay, usi hiŋ gi ki kiɗiki.
18«Gol tagi jivi kay dlara agi humuɗ wanda. Sa u tlen komma hin fi kayam hu olo. Sa va ka kombina, hin tlam ma nam a fam gin na ki lay.»
Su Yesu u gorsemma
(Matiye 12.46-50; Mark 3.31-35)
19Su Yesu u gorsemma mba famu, min a tuɗ egemu, ka fi voɗtaɗi kayme suuna moli cocoo. 20Asi jok vunna ha maŋ Yesu ana, «Suŋ u gorseŋŋa ka bunsu, halaŋ a ŋgaf u aŋu.» 21Yesu hoŋosi dira ana, «Sun u gorsenna ni suu hum boy ma vi Lona, vi um mayna.»
Yesu doo babaana
(Matiye 8.23-27; Mark 4.35-41)
22Fali taa dew Yesu ful hu lumba fulni, di suu haɗi mamsina ana, «Jakaygi ha ki doŋ lumma ii hiŋŋa.» Asi hin tuɗ gaw. 23Asi ful hu lumba may ni, Yesu buu senna gaw. Cecem gaw ni babaa ma ŋgolna fasiya, yona ka bilna usi hu lumba. Asi hal a tluɓ kaŋgaa. 24Suu haɗi mamsina ɦuɗ tasi egem, dliɗim kolo yam ana, «Mala Haɗta, aygi ba ki ni ge.»
Yesu col kolo colni, bay babaana u yona ana, «Seŋ taŋu.» Babaana u yona col ɗigiɗ gaw. 25Yesu di suu haɗi mamsina ana, «Hurugi ma tininna ni arage?»
Asi mbuɗ ki ndaana, hin lakira na jim, ɓak duk tasi ana, «Sa namma ni gege? Babaana u yona humum vunum lay ni nanage?»
Yesu dik fulina ki kay sana
(Matiye 8.28-34; Mark 5.1-20)
26Asi ɗuŋ ha ki ŋgoo lumma hu mbassa Gerasenda fok taɗ u mbassa Galilera. 27Yesu cuk sem ay ki kaŋga hu lumba may ni, san hu zi namma dew ŋgafamu. Sa namma u fulina kamu. Ay jew day ni nam ka cuk baraw egembi, ka buu hu ziɗi lay. Nam buu ni duk us suu miɗina. 28Nam wi Yesu na ni sawalla, goɓ kaŋga fokomu, di u delemba eŋga ana, «Aŋ min me egen ge? Yesu Goŋ Lo ma kolona. An ceneŋu, aŋ lasanɗi.» 29Nam di na ni kay Yesu hal a dikim fulna ki kamba. Ful namma lasam na tew tew. Asi njunum kaŋga u zew kinjiŋŋa a nam pii ki ŋgooɗi. Nam ja kinjiŋŋa ki ja ni, fulna piirim ki ŋgoo bagiya. 30Yesu joɓom ana, «Seŋ ana mege?» Nam hoŋom dira ana, «Sen ana Bolowo.» Nam di na ni kay fulina oy hurum cocora. 31Asi joɓom sem bolowo ana, «Dikimi hu zulla ŋgolla ndarayamina ha hura tuɗi.»
32Hu li namma kosoŋŋa moli cocoo, ti tlena kay ɦinira. Fulina joɓ Yesu ana hinisi asi sel hu kosoŋŋa. Nam hinisi gaw. 33Asi sel ha ki sel ni, cuk hu kosoŋŋa gaw. Kosoŋŋa ay kolo kay ɦinira yow liŋŋa cuk ki duk lumma. Mbona cam ki halaŋ.
34Suu taa kosoŋŋa wi na ni yow liŋŋa, tuɗ di boy namma ki maŋ suuna hu zi ma ŋgolna u ma gorira halaŋ. 35Suu hu zinana sel ay ki a gol dlara li ndaɗta. Asi tew eg Yesu may ni fi sa fulina hinim kina kakiya. Nam kaki eg Yesu u barawna tamu, irim ɗili lay. Suuna wam na ni mbuɗ ki ndaana. 36Suu wi boy namma u irisina njaɗ maŋ ndarayasina dlara Yesu suɗ sa fulina kamma kira. 37Suu hu mbassa Gerasenda di maŋ Yesu ana, nam tuɗ ha ki hinisi mbas masira. Kayme asi mbuɗ ki ndaana cocoo. Yesu ful hu lumba a tuɗta. 38Sa fulina hinim kina joɓ Yesu ana, hinim nam kak u namu. Yesu dam ana, 39«Holoŋ vo varaŋu di dlara Lona laŋga egeŋga ki maŋ suu hu ziiŋŋana.» Sana tuɗ njaɗ dlara Yesu lamba egemba ki hu zina halaŋ.
Goŋ Jayrussa u cara ŋgen baraw ma vi Yesunara
(Matiye 9.18-26; Mark 5.21-43)
40Yesu ɗuŋ aygi ŋgoo lumma ii hiŋŋa may ni, suu juɓumma halaŋ ŋgafam fokom u furira. 41San dew yam ana Jayrus mba egemu. Nammi mulna hu Zira Tokka. Nam goɓ kaŋga fok Yesu, tii tam ana nam mbay varamu. 42Kayme goromba kom na dew basaɗaɗ doogo yam mba' hal a miɗa.
Nam gi tam a tuɗta wanni suuna ɦeɓem duku, nam ka fi li ma musuk kosiɗi. 43Cara fi busuna li basara doogo yam mba' u ndaɗu. [Ndaɗ ba tlena coco a hal kumuna, sa ndak ka a garaɗaɗ kiɗi.] 44Ndaɗ pereɗ ay ŋgoo Yesu ŋgenem vun baraw mamma na ni busuna ka uɗ gaw. 45Yesu joɓ ana, «Sa ŋgenenna ni gege?» Suuna halaŋ tin vunusi ana sa ŋgenem kaɗi. Piyer di ana, «Mala Haɗta, suuna bolowra coco egeŋŋi, ŋgeneŋŋi asiɗi su?» 46Yesu di ana, «San ŋgenenu, kay an wi ana saɓak ma egenna kal kiyo.» 47Cara wi ana uɗ gi ki wa ni, ndaɗ mbuɗ ndaana, mba goɓ kaŋga fokomu, dam boy ma ndaɗ ŋgenem vun baraw mamma kamma ki fok suuna halaŋ, di ana ndaɗ ŋgen vun barawna na ni, busuna hiniɗ ki gaw. 48Yesu daɗ ana, «Goonda, huruk ma tini kanna suɗuk ki wa. Tuɗ jiviya.»
49Vun Yesu bay ndi kaŋga tu may ni, sa sunda col ay vi mulna Jayrus mba di ana, «Loɓ ta Mala Haɗta oloɗi. Goroŋga miɗ ha ki wa.» 50Yesu hum na ni di Jayrus ana, «Li ndaaɗi. Tin huruŋ kanu, goroŋga hin suɗ kiyo.» 51Yesu tew hu zina may ni hin sa a kal ha um voɗi. Suu nam hinisi sel um vona ni Piyer, Jaŋ u Jak, bu goora u suɗ may. 52Suuna halaŋ tii kaɗu, yoo tasi coco lay. Yesu dasi ana, «Tiirigiɗi. Ndaɗ ka miɗiɗi, buu ni senna ɦawaa.» 53Suuna halaŋ gijaŋ san umu, kay asi wi ana ndaɗ ki miɗiya. 54Yesu vaɗ koɗ na ni, daɗ ana, «Goora col ki koloo.» 55Goora dliɗ dliɗni coli kolo gaw. Yesu dasi ana, Haɗ tlesuu tira, ndaɗ tiya. 56Somoyoɗ hin lakira na jim kay boy namma su ki kasiya. Yesu dasi ana di boy namma ki maŋ saɗi.
Currently Selected:
LUK 8: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
