EZEKIYEL 25
25
Di dlara jok vun Lonara kay goryoŋ Amonna
1Boy Yawena mbay egen dan ana,#Jer. 49.1-6; Eze. 21.33-37; Amos 1.13-15; Sof. 2.8-11 2«Goŋ Sanna, gol iriŋ ha kay goryoŋ Amonna gige. Dasi dlara an a dasira kasira haa. 3Aŋ di goryoŋ Amonna ana, humugi boy ma vi Bu Suuna Yawena haa. Bu Suuna, Yawe, di ana, hu li ma suuna to Ziŋ Lonara ki may mbuɗ li ma teteɗna ki njenjera mayna, agi pan Israelna ana na may ɗaŋ hu li ma asi tuɗ ki mbaɓurana. 4Kay ndaɗta an hin ɦagi ki hu duk ko suu u maɗiina na, asi hin ti mulla kagiya. Asi hin vi mbutluɓ masi ma duuna ki hu mbas magira. Asi hin min zina kolo lay. Asi hin tagi wama hu sene maginana kiyo, hin cagi mbii magira ki lay. 5An hin mbuɗ Rabpa ki ni a li ma taa yoorina, ni li ma taa jamballa, mbassa vi goryoŋ Amonna ni a li ma taa timigiina. Agi hin wi ki ana anni Yawe.
6«Bu Suuna, Yawe, di ana, agi ko kogi u suu mansina, panasiya, agi furi ki kay dlara lasi wanda u hurugi na halaŋ. Gologi suu col ay hu mbassa Israella ki lalas cocoo. 7Kay ndaɗta an hin ŋgen kon ki egegiya. An hin hinigi ki hu duk ko njaf suu daŋŋa. An hin bulumugi ki duk suuna. An hin njayagi ki hu mbassa daŋga zeɗ zeɗ, hin ɓalakagi kiyo. Agi hin wi ki ana anni Yawe.
Di dlara jok vun Lona kay mbassa Moabpa
8«Bu Suuna, Yawe, di ana, hu li ma Moab u Edom di ana, ziŋ suu vi Yudana mbuɗ ki ni ko ma vi njaf suu daŋŋana na lay.#Eza. 15.1—16.14; 25.10-12; Jer. 48.1-47; Amos 2.1-3; Sof. 2.8-11 9Kay ndaɗta an mal vun kaa ma ii hakara u suu Moabma ay kiyo. Suu duuna cuk ay hu mbas masira. Ҥoŋzi ma jivi coco ɦayna lay ni hin ɓalak kiyo. Bet-Yesimot, Baal Meon u Kiriataim. 10Suu u maɗiinana hin ti mbassa Moabpa ki ni asiya u goryoŋ Amonna lay. An ɦal mbas ndaɗta ki ni ka a sa humum hin gam kay goryoŋ Amonna duk njaf suu hu duliyarana oloɗi lay. 11An hin kaɓakŋa kay suu Moabma. Asi hin wi ki ana anni Yawe.
Dlara jok vun Lona kay suu Edomma
12«Bu Suuna, Yawe, di ana, suu Edomma duu suu Yudana a sa sukulna ni asi mbuɗ tasi ki ni a suu sulukŋa may.#Eza. 34.5-17; 63.1-6; Jer. 49.7-22; Eze. 35.1-15; Amos 1.11-12; Abd. 1-14; Mal. 1.2-5 13Kay ndaɗta Bu Suuna, Yawe, di ana, an maɗ kon kay suu Edomma u hurun ma ɓeŋ ki egesi u yarna. An hin ci suu warna u yoorina kiyo. An gijaŋ ɓalakka ay ni hu mbassa Temanda day, asi hin puk kaŋga fun ŋgewna ta ta tew ki hu mbassa Dedanda. 14An hin tin sa sukul manna hu Edommi u bik ko suu man suu Israelna. Asi hin li suu Edomma ni ko hurun ma ɓeŋ dasi ana asi li yara na may. Ni asi hin wan sa sukul manna. Di ni Bu Suuna, Yawe.
Dlara jok vun Lona kay suu Filistinna
15«Bu Suuna, Yawe, di ana, suu Filistinna duu suu Israelna u huu ma cona u gonok mayra ay ŋgay hurusi day dayra. Asi hal a bulumusi ki ni u huu ma cona, baasi ha ki a fafaɗta.#Eza. 14.29-31; Jer. 47.1-7; Joel 4.4-8; Amos 1.6-8; Sof. 2.4-7; Zak. 9.5-7 16Kay ndaɗta Bu Suuna, Yawe, di ana, an hin maɗ kon kay suu Filistinna. An hin casi kiyo u suu ii mbayaw suu hin ndena an hin daɓasi kiyo. 17An hin sa sukul suu mansina ki u asiya. An hin ɦasi warak ma co namma u hurun ma yara. Asi hin wi ki ana anni Yawe, daŋ may.»
Currently Selected:
EZEKIYEL 25: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.