EZEKIYEL 21
21
Kura col ay dalira
1Boy Yawena mbay egen dan ana, 2«Goŋ sanna gol iriŋ ha daliya, di boy ma jok vun Lonana ha kay gura Negebpa. 3Aŋ di gura Negebpa ana, ndak hum boy ma vi Yawena haa. Bu Suuna, Yawe, di ana, gola an min gak kura ay dukuku. Ndaɗ hin ŋgal ŋgusugi suu ŋgolomma u suu sooyna kiyo. Ku ndaɗta hin ka tewɗi. Ndaɗ hin ŋgal sene ma vi suu dalinana ki halaŋ ta ta tuɗ tew ay ki ii ma mbayawna. 4Suu warna halaŋ hin wi ki ana gi ku ndaɗta ni an Yawe. Ku ndaɗta ka tewɗi.» 5An sa ma jok vun Lona may ni hin di ana, «Ҥii, Bu Suuna Yawe, suuna tew tew ka ɓak ana sa namma na tew tew ka di dlara ni u ndal boyna sa ka humum umbi lay.»
Ŋgew ma vi Bu Suunana
6Boy Yawena mbay egen dan ana, 7«Goŋ sanna, gol iriŋ ha kay Yerusalem di boy ma jok vun Lona ha kay Ziŋ Lonara, di boyna ha ki kay mbassa vi suu Israelna. 8Aŋ di kay ndaŋgara Israella ana, Yawe di ana, an hin mbay kaku, hin paɗ ŋgew manna kiyo. An hin ci suu ɗegeena u suu cona kiyo. 9Hu li ma an a ci suu ɗegeena u suu cona kira ni, ŋgew manna an paɗam ay ki hu ziimu, hin ci suu warna ki ni halaŋ, col ha dali ta ta mbayawi. 10Suuna halaŋ hin wi ki ana an Yawe paɗ ŋgew manna ki kiɗik wa. Nam ka hoŋ hu ziim oloɗi.
11«Goŋ sanna hom taŋ kaŋgaa, zama, zam u deleŋga eŋga fok suuna halaŋ. 12Lini asi joɓoŋ ana aŋ zam na ni kay mege? Ni aŋ dasi ana, an hum boy ma cona ana dlara hin liya. Suuna halaŋ hin mbuɗ ki ndaana ko suuna halaŋ hin maŋ kiyo. Saa suuna halaŋ hin njay kiyo. Vun givisi halaŋ hin ka ki mbona. Dla ndaɗta hin mbaa, hin li ki lay. Di ni Bu Suuna, Yawe.»
Dlara jok vun Lona kay ŋgewna
13Boy Yawena mbay egen dan ana, 14«Goŋ sanna, tuɗ di boyna. Aŋ di ana, Bu Suuna di ana,
Ŋgewna, ŋgewna siim guu ki wa,
nam ki guuri jivi ɦay.
15Ki guuri jivi a ci suuna,
tam ki jivira a weleɗ cocora may.
16Nam ɦam ha a minim tam kira,
vammi u kom ma jakŋa.
Asi guurum siim kiyo,
ŋgewna asi horokom tam ki may.
Ҥammi hu duk ko suu ci maɗna.
17Sawalla, tiira goŋ sanna.
Ŋgewna kal duk suu mansina wa.
Nam kal ni duk muli suu Israelna halaŋ.
Asi halaŋ puk fun ŋgewna
ni u suu mansina bel bel ko koŋ ɓalaŋu.
18Ni tuk mayra ŋgolla,
daɗ ha ki ni an Bu Suuna, Yawe, daŋ may.
19Aŋ hum haa, goŋ sanna,
di dlara joɓpa ha kiyo.
Ko koŋ yaŋ dew, yaŋ mba,
yaŋ hindi ni ŋgewna hin mbuɗ saɓak cocoo.
Ni ŋgew ŋgol ma ci maɗna cocona.
20A asi mbuɗ ki ndaana hu ɦoŋzina halaŋga ni,
an tuɗusi ŋgewna ki fun ziisi dew dew halaŋ.
Ŋgew namma weleɗ cocoo,
lammi kay a ci maɗna daŋ may.
21Ŋgew ma sii ɦayna ka gulu may,
ka njuf may, pereɗ ii kara ki hu lina halaŋ.
22An may ni ko konu,
hin lina maŋ yaanda halaŋ.
Ni an, Yawe, di na ni anu.»
Ŋgew ma vi mul ma Babilonna
23Boy Yawena mbay egen dan ana, 24«Goŋ sanna, aŋ hum ha jiviya, wak voɗta na mba', ni voɗta ŋgew ma vi muli suu Babilonna a kal ay hura. Voɗta mba' ndaɗta col ha ni hu mbassa dewra a kal ay hu voɗ ndaɗtara ni aŋ tin va ma tak zi ma voɗta tuɗ hurumma ki keŋ voɗta. 25Wak voɗ taa dew ni suu duu suu Babilonna tuɗ ay hu a tuɗ hu ɦoŋzi ma Rabana vi suu Amonna. Voɗta hiniŋga tuɗ hu ɦoŋzi ma eŋ coco ma Yerusalemma may, ni vi suu Yudana. 26Mul ma Babilonna col ki hu garak voɗta mba' ndaɗta a joɓ fulina. Nam kisik mburura, joɓ fulina may, gol duduk yoorina may. 27Hu kom ma njufna ŋgaɓpa ndi ni kay Yerusalem ana, vin ni asi hin tin gu ma to gulummuna kiyo, ɦal voɗta camba, tum soo mayra duuna, col gu ma to gulumunna vun grekŋa, mol tlena kolo kel tasiya, vek zulla ki hu voɗta may. 28Suu vo hu Yerusalemma gol dla ndaɗta ni ko ndal ka boyna na, kay galam mayra asi vaɗ ki u suuna zeɗ zeɗta. Na may ni mul ma Babilonna hin gasi humusi kay coosira asi laɗ ndaɗta, kay coosi ndaɗta asi hin tuɗ ki mbaɓura komu. 29Kay ndaɗta Bu Suuna, Yawe, di ana, cemi ni agi wi coogira ki wa. Gegelay ni wi suluk mam ma nam lamma. Agi ka tak dla coogira ki hu sunda agi laɗta halaŋ. Cemi ni ɓakŋa vagi wa. An ɦagi ki ko suu babali magisina wa. 30Aŋ mul ma vi suu Israelna hum haa, aŋ sa ma li dla cora, buu maŋŋa ndak wa ni dlaaŋga co ndaɗta hin daɓ kiyo. 31Bu Suuna, Yawe, di ana, tlam jum mamba tini kamba kiyo. Tlena halaŋ mbuɗ ki zeɗ zeɗ. Va ma ay ki gana hin tlam ki koloo, va ma ay kolona hin hoŋom ay ki gaa. 32Ɓalakka, ɓalakka, an hin ɓalak lina kiyo. Dlara ko ndaɗta na li ay ka jew dew tuɗi. Ta ta hin juɓmi sa ma kaɓakŋa mbay tuwa, ni sa ma an hinim dla ndaɗta komma.
Ŋgew ma kay suu Amonna
33«Tin humuŋ hum haa, goŋ sanna, tuɗ di boy ma jok vun Lona, aŋ di ana, Bu Suuna, Yawe, di kay goryoŋ Amonna suu ka mbaɗ vun suu Israelnana ana,
Ŋgewna, ŋgewna paɗ ki wa,
nam weleɗ coco a ci maɗna,
ɓalak tlena, nam weleɗ cocoo.#Jer. 49.1-6; Eze. 25.1-7; Amos 1.3-15; Sof. 2.8-11
34A ka del suu li dla cora, hu li ma buurusi ndakŋa, hu li namma ni dla cora hin daɓ kiyo. Kaŋ taŋga may ni asi di ni dlara kaboyna ɦawaa.
Boyna kay Babilon
35«Hoŋ ŋgew maŋŋa hu ziimu. An hin kaaŋ ɓakŋa kaŋŋi hu li ma laŋ ay ki huna, ni hu mbas maŋga aŋ col ay hura. 36An puk yaanda kaŋŋi ko ndal kura na. An hin ɦaŋ ki hu duk ko suu dlasi co, suu las suuna asi hin baaŋ kiyo. 37Aŋ hin ki ni vaŋ kurana, busuɗuŋ hin vo ki ga hu mbas ndaɗta. Hum sa hin ka a gam kaŋ oloɗi. Di ni an, Yawe.»
Currently Selected:
EZEKIYEL 21: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.