KOLOSNA 2

1An min ana agi wi ki kay duu ma an ka duu kagina, kay suu Laodisena u suu bay wan u irisi tuna. 2An duu kay ana hurusi mba fi ɦiŋga kay asi mba li taɓi dew hu minda gasira, kay asi mba ndak ki hu gasira vi yalna, kay wi dlara ŋgayra vi Lona ni di ana Kristu tamba. 3Tlesuu ɦizza halaŋ ka ŋgay hurumu ni di ana nera u wira suu ay vi Lonna.

4An di na ni kay sa ma ganagi yagi u boy ma li iira ɦawaɗi. 5Lini an ki egegi day hu mbalatan lay ni, hu saa manda ni an egegi tok. An li furira kay agi coli eŋ duk tagi taɓi dew hu viigira u Kristu.

Iirira faɗ hu Kristura

6Agi vagi hurugi ana Yesu ni Bu Suuna kakagi hu taɓpa u namu. 7Pagi sariyagi kaŋga hurumu, minigi iiri magira ni kam nam dew, kakagi eŋ hu vira u va haɗagi nana, mbuɗugi saɓak u gi deɓpa.

8Gologi tagi jiviya kay sa mba vagi ki um u ganyamba boy ma coli kay nera vi suuna col kay haɗta vi duliyara, u haɗta vi suuna ɦawa, ni ka kay Kristuɗi. 9Hu li ma Lona gi Kristu ki a sana ni kay nam tamba ka hurum hu gaw may. 10Agi fi tlena halaŋ u taɓpa u namba. Nam kaki kay ŋgolla kolora lay kaŋgara lay halaŋ.

11Agi fagi caw ɗiwra ni hu taɓ magira u namba, ni ka u caw ɗiwra vi suunaraɗi, ni u caw ɗiw mayra mbay vi Kristura, ni mayra buɗugi ki ko ŋgolla vi tara cora. 12Hu li ma agi fi mbussa batemma ni agi pagi tagi gaa u Kristu, agi paɗ ki kolo ni u namu, kay agi vi u saɓakŋa vi Lona ma paɗam ki kolo hu miɗna iirina. 13Agi li ay jewni miɗi fok Lona kay coogira kay agi ay ni suu bay caw ɗiwra, suu bay vina. Cecemi Lona hoŋ mbuɗugi iiri u Kristu, ni Lona hoŋ daɓaygi cooygira ki halaŋ. 14Nam bulum magaara bal ma li kaygina kiyo, ni mayra ay tini kaygi u gaɗta eŋga, nam bulumum ki hu li ma ɓalam ki kolo hu gu garakŋa. 15Hu gu garakŋa vi Kristu, Lona tli saɓakŋa u ŋgolla vi fuli suu cona kiyo, mbuɗusi ki zolona fok suuna ko suu daŋgayna na, kay goromma ti wa.

16Hin sa kaagi ɓak kagi kay tlesuu agi tasina u suu agi casinaɗi, kay humba hum u buu ma luuna, u vun tilna, u buu ma vi Lonnaɗi. 17Asina halaŋŋi ŋgus tlesuu jivi suu hin a mbara, gasira ni ta Kristu. 18Hinigi tagi a sa daŋŋa kaagi ɓakŋa kagi na gor gorɗi, suu furi kay dlara asi laɗ u tasira kiɗikka, hoŋ yasi kaŋga fok suu sunda huulona, ɦal ŋgolla maŋ tlesuu tak tasi irsina. Sa ma ko namma nana hurum oyra ni ŋga tara u dlaamba kaɗi, lini u saa mamba hurumba ɦawaa. 19Ni sa namma ka taɓi ko tam u Kristu ma yambaɗi, u jivira vi Kristu ni mbalatara halaŋ fi tina taɓi ko tasi dew. Ni taɓpa u wul ma ko namma nana Lona minimmi namma.

Miɗ kay kak iiri u Kristu

20Agi miɗ ki u Kristu wani buɗ ki ko tlesuu hu duliyarana wa, agi hin poy ko agi ni vi duliyara tu na ni amege? Agi vi kagi a asi tinigi gaɗta kagi ko ndaɗta na ni kay mege? 21«Tlagi wanniɗi,» «Jukgi,» «Ŋgenɗi.» 22Tle asina ki ŋgaɓi kay a ba kira, lini sa li va u asiya, lini kay gaɗta vi suunara u haɗ masira. 23Gaɗ masira gol ko va ma tak nera, u goɓ masira mbay hu minda vi sana, u hoŋ yamba gara, u lassa asi las tasira lay, na may ni kay doo minda vi sana, gaɗ ndaɗta ka li vaɗi.

Currently Selected:

KOLOSNA 2: BMS

Highlight

Copy