Mātaio 9
9
Tē 'akaora nei a Iēsū i tēta'i tangata 'akangoru
(Māreko 2.1-12; Luka 5.17-26)
1'Eke atura a Iēsū ki roto i tēta'i poti, 'akatere atura ki tēta'i tua o te roto, e tae atura ki tōna 'ua'orāi 'ōire. 2Ē inā, kua 'apai maira rātou i tēta'i 'akangoru ki aia ra tē takoto 'ua ra ki runga i te ro'i. I te kite'anga atu a Iēsū i tō rātou 'akarongo, kua karanga atura aia ki te 'akangoru ra, “E 'akamāro'iro'i, e tama, kua 'akakore'ia tā'au au 'ara.”
3Ē inā, kua tuatua i'ora ēta'i Pū'āpi'i Ture i roto i a rātou 'ua'orāi, “Tē 'akakino Atua nei tēianei tangata!”
4I te kite'anga atu a Iēsū i tō rātou manako, kua nā kō maira aia, “'E a'a kōtou i manako kino ei i roto i tō kōtou ngākau? 5Ko tē'ea te mea rave ngō'ie atu, ko te karanga ē, ‘Kua 'akakore'ia tā'au au 'ara’, mē kāre ra, ko te karanga ē, ‘E tū ki runga, e 'aere’? 6Kia kite rā kōtou ē, 'e mana tō te Tamaiti a te Tangata i te 'enua nei kia 'akakore i te au 'ara.” Kua karanga atura aia i reira ki te 'akangoru ra, “E tū ki runga, e rave i tō ro'i, e 'aere ki tō ngutu'are!”
7Tū akera aia ki runga, 'aere atura ki te ngutu'are. 8Kia kite te urupū tangata i tēia mea nei, kua mataku i'ora rātou ē kua 'akakakā i te Atua tei 'ōronga mai i te reira tū mana ki te au tangata nei.
Tē kāpiki nei a Iēsū i a Mātaio
(Māreko 2.13-17; Luka 5.27-32)
9Ē tē 'aere atura a Iēsū mei reira atu, kua kite atura aia i tēta'i tangata, ko Mātaio te ingoa, tē no'o ra ki roto i te 'are ko'i'anga tero. Kua karanga atura a Iēsū ki aia, “Āru mai i āku.” Kua tū akera a Mātaio ki runga, ē kua āru maira i aia.
10 #
Luk 15.1,2 Ē tē kaikai ra a Iēsū i te ngutu'are o Mātaio, 'e mānganui te aronga ko'i tero ē te aronga rave 'ara i 'aere mai ē kua kaikai ma ia katoa ē tāna au pipi ra. 11I te kite'anga te au Phārīsea i tēia, kua ui atura rātou ki tāna au pipi, “'E a'a tō kōtou pū'āpi'i i kai katoa ai ē te aronga ko'i tero ē te aronga rave 'ara nei?”
12I te 'akarongo'anga a Iēsū i tēia, kua tuatua maira aia, “Kāre ē nō te aronga e meitaki te ora'anga te ta'unga, nō te aronga maki rā. 13#a: Māt 12.7; b: Hos 6.6E 'aere rā e 'āpi'i i te 'āite'anga o tēianei tuatua, ‘Ko te aro'a tāku e anoano, kāre ē ko te 'ātinga.’ Kāre 'oki au i 'aere mai e kāpiki i te aronga tuatua tika, māri rā i te aronga 'ara ra.”
Te tūranga nō runga i te 'akakore'angā kai
(Māreko 2.18-22; Luka 5.33-39)
14I reira, kua 'aere maira te au pipi a Ioane ra ē kua ui maira ki a Iēsū, “'E a'a mātou nei ē te au Phārīsea e 'akakore ei i te kai, ē kāre tā'au au pipi e 'akakore ana i te kai?”
15Kua pa'u atura a Iēsū, “E auē āina te au manu'iri o te 'akaipoipo'anga i te tāne 'ōu e no'o ki ō rātou ra? Tē vai atura te tuātau e rave'ia atu ei te tāne 'ōu mei kō mai i a rātou; 'ei reira rātou e 'akakore ei i te kai.
16“Kāre 'e tangata e pānanaki i te potonga kāka'u 'ōu ki runga i te kāka'u piro, nō te mea, ka emi mai te pānanaki mei taua kāka'u piro ra, ma'ata kino atura te nga'ae. 17Kāre katoa 'e tangata e riringi i te uaina 'ōu ki roto i te au 'āriki ta'ito. Mē pērā 'oki rātou ra, ka nga'ae te au 'āriki, ta'e atura te uaina ki va'o, ē e kino rava atura te au 'āriki. Inārā, e riringi rātou i te uaina 'ōu ki roto i te au 'āriki 'ōu ra, e meitaki kāpipiti i a rāua.”
Te tamā'ine a te tūtara ē te va'ine tei 'āmiri atu i te kāka'u o Iēsū
(Māreko 5.21-43; Luka 8.40-56)
18I a Iēsū e tuatua atura i aua tuatua nei, kua 'aere maira tēta'i tūtara ē kua tīpapa maira ki mua i aia, nā kō maira, “Koi mate tākiri rava ake nei taku tamā'ine; e 'aere mai rā koe e tuku i tō rima ki runga a'o i aia, ka ora'ia aia i reira.” 19Kua tū akera a Iēsū ki runga, kua āru atura i aia, ē kua pērā katoa tāna au pipi.
20Ē inā, tēta'i va'ine maira, e rau nga'uru mā rua ōna mata'iti i te riu 'ua'anga, kua nā muri maira i aia, ē kua 'āmiri maira i tō Iēsū tapa kāka'u. 21I tuatua 'oki aia ki aia 'ua'orāi ē, “Kia 'āmiri 'ua atu au i tōna kāka'u, ka ora'ia au.”
22Kua 'āriu akera a Iēsū, ē i te kite'anga i taua va'ine ra kua karanga atura, “E 'akamāro'iro'i, e mā'ine, kua ora koe i tō'ou 'irinaki'anga.” Ora rava atura'ia taua va'ine ra i taua 'ati'anga rāi.
23I te tae'anga atu a Iēsū ki roto i te 'are o taua tūtara ra, ē i te kite'anga atura i te aronga 'akatangi vivo ko'e ē te urupū aueuē ra, 24kua karanga atura aia, “'Akaātea atu, nō te mea, kāre te tamā'ine ra i mate, kua moe rā.” Kua tā'ito'ito maira rā rātou i aia. 25E 'ope akera taua urupū ra i te tuku'ia ki va'o, kua tomo atura aia ki roto, ē kua rave atura aia i tōna rima, ē kua tū 'ua maira te tamā'ine ra ki runga. 26Tutuki atura te rongo o tēianei mea e kako rava akera taua 'enua ra.
Tē 'akaora nei a Iēsū i ngā tangata matapō e rua ra
27Ē tē 'aere atura a Iēsū mei reira atu, kua āru maira e rua tangata matapō i aia ē te kāpiki'anga mai, “E te tamaiti a Dāvida ē, e aro'a mai koe i a māua.”
28E tae atura aia ki roto i te 'are, kua 'aere maira ngā tangata matapō ra ki aia, ē kua ui atura a Iēsū ki a rāua, “Tē 'irinaki nei kōrua ē e rauka i āku tēia i te rave?”
Kua pa'u maira rāua, “Āe, e te 'Atu.”
29Kua 'akatūkia atura aia i tō rāua mata, ē kua nā kō atura, “Kia tau ki tō kōrua 'irinaki'anga ra, kia pērā'ia mai rāi kōrua.” 30Ē kua pu'era akera tō rāua mata i reira ra. Kua ako pakari atura a Iēsū i a rāua, nā kō atura, “Ka matakite, 'eia'a rava atu tēta'i tangata e kite i tēianei mea!”
31I te 'aere'anga atu rā rāua, kua toto'a 'aere atura i te rongo nōna, e kako rava akera taua tu'anga 'enua ra.
Tē 'akaora nei a Iēsū i tēta'i tangata mūrare
32Ē tē 'aere atura ngā matapō ki va'o, inā, tē 'apaina'ia maira tēta'i tangata mūrare tei uru'ia e te dēmoni ki a Iēsū. 33Ē kia tuaru'ia te dēmoni ra ki va'o, kua tuatua i'ora te tangata tei mūrare'ia ra. Ē kua vā 'ua i'ora te au urupū ra, nā kō akera, “Kāre ake rāi tēia tū i kitea ake i Īserā'ela nei!”
34 #
Māt 10.25; 12.24; Mār 3.22; Luk 11.15 Kua nā kō akera rā te au Phārīsea ra, “Tē tuaru nei aia i te au dēmoni ki va'o ki te mana o te dēmoni ma'ata ra.”
Tē tangi nei a Iēsū i te tangata 'e mānganui
35 #
Māt 4.23; Mār 1.39; Luk 4.44 'Aere atura a Iēsū nā roto i te au 'ōire mama'ata ē te au 'ōire rikiriki katoa ra i te 'āpi'i'anga ki roto i tō rātou au sūnago ē te tūtū 'aere'anga i te 'ēvangelia o te bāsileia, ē te 'akaora'anga i te au tū maki ē te au tū mate rava rāi. 36#Num 27.17; 1 Arik 22.17; 2 Par 18.16; Ezek 34.5; Mār 6.34Ē i te kite'anga atura aia i te au urupū ra, kua tangi i'ora aia i a rātou, nō te mea, kua tāmanamanatā'ia rātou ē kua pue'urikiriki kē rātou mei te au māmoe tiakikore ra. 37#Luk 10.2Kua karanga atura aia ki tāna au pipi, “Tē ma'ata 'ua nei te mou, tē iti nei rā te au rave 'anga'anga. 38Ē tēianei, e pati kōtou ki te 'Atu o te mou kia unga mai aia i te au rave 'anga'anga ki tāna kokoti'anga mou ra.”
Currently Selected:
Mātaio 9: CIMRNT
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Cook Island Maori Revised New Testament © Bible Society of the South Pacific, 2021.