Mātaio 7
7
Te 'akavā'anga i ēta'i kē
(Luka 6.37-38,41-42)
1“Auraka e 'akavā atu, kia kore kōtou e 'akavā'ia mai, 2#Mār 4.24nō te mea, ka 'akavā'ia mai kōtou i te tū o tā kōtou e 'akavā atu; ē ko te 'āite tā kōtou e 'āite atu, ko tā kōtou rāi ia e 'aka'āite'ia mai. 3'E a'a koe e 'ākara ai i te tānga iti i te mata o tō taeake ra, ē kāre koe i kite i te rākau ma'ata i roto i tō'ou 'ua'orāi mata? 4E 'akapē'ea koe e tuatua ai ki tō taeake, ‘'Ō mai, nāku e kiriti i te tānga iti mei roto mai i tō mata na’, ē inā, tei roto i tō'ou 'ua'orāi mata te rākau ma'ata? 5E te tangata tāpikipiki ē, e nā mua i te kiriti i te rākau ma'ata mei roto mai i tō'ou 'ua'orāi mata, 'ei reira koe e kite meitaki ei kia kiriti'ia te tānga iti mei roto mai i te mata o tō taeake.
6“Auraka e 'ō ake i te mea tapu nā te au puakaaoa, ka anga mai rāi rātou e 'ae'ae mai ra i a kōtou; auraka e titiri i tā kōtou au poe nā te au puaka, kia kore rātou e takataka'i i te reira ki tō rātou vaevae.”
E pati, e kimi, e tōpāpā atu
(Luka 11.9-13)
7“E pati ē e 'ōronga'ia mai tā kōtou; e kimi ē e kitea ia i a kōtou; e tōpāpā atu, e 'akatu'era'ia mai te pā i a kōtou. 8Nō te mea, ko te aronga katoa e pati ra, kua rauka ia; ē ko tei kimi ra, kua kitea ia; ē tei tōpāpā ra, e 'akatu'era'ia mai te pā i aia. 9Ko 'ai ia tangata i ō kōtou nei, kia pati mai tāna tamaiti i te mānga, e 'apai atu i tēta'i toka nāna? 10Mē kāre, kia pati mai i tēta'i ika, e 'apai atu āinei i tēta'i 'ōvī nāna? 11Ē tē tika na i a kōtou, noa atu tō kōtou kino, kia 'ōronga i te au mea meitaki nā tā kōtou tamariki, ka tanga ai 'oki i tō kōtou Metua i te ao ra i te 'ōronga mai i te au mea meitaki ki te aronga i pati atu ki aia ra.
12 #
Luk 6.31
“Ē te au mea katoa tā kōtou e 'inangaro i te tangata kia rave ki a kōtou ra, ka 'akapērā katoa atu kōtou ki a rātou. Ko tā te Ture ia, ē tā te au peroveta.”
Te ngūtupa 'ōiti
(Luka 13.24)
13“E tomo kōtou nā te ngūtupa 'ōiti, nō te mea, tē ātea nei te ngūtupa ē tē pararauare nei te mataara e tae atu ei ki te mate ē 'e mānganui tei nā reira i te tomo. 14Tē kōkota 'ua nei te ngūtupa ē te piri 'oki te mataara e tae atu ki te ora, ē e tokoiti 'ua tei kite i te reira.”
Tēta'i pū rākau ē tōna 'ua
(Luka 6.43-44)
15“Kia matakite i te au peroveta pikika'a, ko tei 'aere mai ki a kōtou na ma te kāka'u māmoe ra, kāreka i roto ra, 'e au luko tā'ae rātou. 16Ka kite kōtou i a rātou i tō rātou au 'ua. E 'a'aki āinei te tangata i te au vine nō runga mai i te rākau taratara, mē kāre rā, i te au suke nō runga mai i te tātarāmoa? 17Ē pērā katoa, ka 'ua mai te au pū rākau meitaki rava rāi i te au 'ua meitaki, ē te au pū rākau kino ra e 'ua mai i te au 'ua kino. 18Kāre e rauka i te pū rākau meitaki kia 'ua mai i te 'ua kino, kāre katoa te pū rākau kino e 'ua mai i te 'ua meitaki. 19#Māt 3.10; Luk 3.9Te au pū rākau katoa kāre e 'ua mai i te 'ua meitaki ra, e tīpū'ia ia ē ka tīria'ia ki roto i te a'i. 20#Māt 12.33Nō reira, ka kite kōtou i a rātou i tō rātou au 'ua.”
Kāre tākiri au i kite i a kōtou
(Luka 13.25-27)
21“Kāre tēta'i 'ua atu tei tuatua mai ki āku ē, ‘E te 'Atu, e te 'Atu’ e tomo ki roto i te bāsileia o te ao ra, ko tei 'ākono rā i te anoano o taku Metua i te ao ra. 22'E mānganui te ka tuatua mai ki āku i taua rā ra, ‘E te 'Atu, e te 'Atu, kāre āinei mātou i toto'u i roto i tō'ou ingoa, ē kua tuaru atu i te au dēmoni i roto i tō'ou ingoa, ē kua rave i te au 'akairo mana 'e mānganui i roto i tō'ou ingoa?’ 23#Sal 6.8I reira, ko tāku ia e pa'u atu ki a rātou, ‘Kāre tākiri au i kite i a kōtou. Ka 'aere kē atu kōtou mei konei i āku nei, e te aronga rave i te mea kino.’ ”
Ngā tangata patu 'are e rua
(Luka 6.47-49)
24“Ko tēta'i 'ua atu tangata tei 'akarongo mai i tāku nei tuatua ē 'ākono i te reira, ka 'aka'āite'ia aia ki tēta'i tangata pakari ko tei 'akatū i tōna 'are ki runga a'o i te tokapapa. 25E topa i'ora te ua, ē ta'e i'ora te vai puke, ē tē 'arara maira te matangi, ē e pāpā i'ora i taua 'are ra; kāre rava ia e 'inga, nō te mea, kua tāmou'ia ki runga i te tokapapa.
26“Ē tēta'i 'ua atu ko tei 'akarongo 'ua mai i tāku tuatua ē kāre i 'ākono i te reira, ka 'aka'āite'ia aia ki tēta'i tangata nēneva ko tei 'akatū i tōna 'are ki runga i te one. 27E topa i'ora te ua, ē ta'e i'ora te vai puke, ē tē 'arara maira te matangi ē e pāpā i'ora i taua 'are ra; 'inga i'ora ē 'e nga'anga'ā ma'ata 'oki tōna.”
Te manako'anga o te urupū tangata
(Māreko 1.22; Luka 4.32)
28 #
Mār 1.22; Luk 4.32 Ē kia 'akaoti akera a Iēsū i tēianei tuatua'anga, kua vā 'ua i'ora te au urupū tangata i tāna 'āpi'i'anga, 29nō te mea, kua 'āpi'i aia i a rātou ma te mana, ē kāre mei tā te au Pū'āpi'i Ture ra.
Currently Selected:
Mātaio 7: CIMRNT
Highlight
Share
Copy
Want to have your highlights saved across all your devices? Sign up or sign in
Cook Island Maori Revised New Testament © Bible Society of the South Pacific, 2021.