'Anga'anga 2

Te 'aere'anga mai o te Vaerua Tapu

1 # Lev 23.15-21; Deut 16.9-11 E tae rava atura ki te rā Penetekote ra, tei te ngā'i 'okota'i te au pipi rava rāi. 2Ē kāre akera i mamia, ko te 'aruru maira nō runga mai i te rangi mei te matangi ririnui ē te viviki ra, ē kua 'akakī rava akera i te 'are i no'o'ia e rātou ra. 3Ē kua mama maira kia rātou ēta'i arero manga mei te a'i ra te tū, ē tō i'ora ki runga a'o i a rātou tātakita'i ra, 4ē kua kī akera rātou rava rāi i te Vaerua Tapu, ē kua 'akamata atura i te tuatua i te au reo kē mei tā te Vaerua i 'ōronga mai ki a rātou kia tuatua.

5Tē no'o ra 'oki i Iērūsalēma te Ngāti Iūda, 'e aronga 'ākono Atua nō te au 'iti tangata rava rāi i raro ake i tēianei rangi. 6I taua 'aruru'anga ra, kua 'uipā maira tēta'i urupū tangata ē kua pō'itirere i'ora, nō te mea, kua 'akarongo rātou tātakita'i i tō rātou 'ua'orāi reo i te tuatua'ia'anga maira. 7Vā 'ua atura rātou ma te ūmeremere, nā kō atura, “Inā, kāre āina rātou e tuatua nei i tō Galilea anake ra? 8'E a'a rā 'oki tātou tātakita'i nei i 'akarongo ei i tō tātou 'ua'orāi reo i 'ānau'ia mai ei ra? 9I tō Paretia, tō Mādai ē tō Ēlama, ē te aronga e no'o i Mēsōpotāmia, i Iūdea ē i Kapadōkia, i Ponoto ē i Āsia; 10i Phērigia ē i Pāmephūlia, i Aiphiti ē i te tu'anga 'enua o Libia tei tōpiri mai ki Kurene, ē te tangata kē 'oki nō Rōma, ko te Ngāti Iūda ē te aronga i 'āriki i te ako'anga a te Ngāti Iūda, 11e pērā katoa tō Kēreta ē tō Ārābia. Tē 'akarongo 'ua nei tātou i tō tātou 'ua'orāi nei au reo i tā te Atua 'anga'anga takakē tā rātou i 'akakite mai.” 12Kua ūmeremere i'ora rātou rava rāi ē kua kō'iri'iriā 'ua i'ora, nā kō akera tēta'i ki tēta'i, “'E a'a rā tēia?”

13Kāreka tēta'i pae ra, nā kō maira i te 'āviri'anga, “Kua kī rātou i te uaina venevene.”

Te tuatua a Pētero

14Kua tū akera a Pētero ki runga ē te tino nga'uru mā ta'i katoa ra, kua 'akateitei 'ua atura i tōna reo ē kua karanga atura ki te urupū tangata ra, “E te au tangata o Iūdea nei ē te aronga katoa e no'o i Iērūsalēma nei, ka 'akarongo mai ana i tāku nei tuatua kia kite mai kōtou i tē tupu nei. 15Kāre tēianei au tangata i kona mei tā kōtou e manako nei, nō te mea, te ora iva 'ua tēia i te pōpongi. 16Kua tupu rā tei 'akakite'ia mai e te peroveta ra ko Ioela ē,

17 # Ioel 2.28-32 ‘Kia tae ki te au rā 'openga ra, tē tuatua maira te Atua,

e riringi atu ei au i taku Vaerua ki runga a'o i te tangata rava rāi.

Ka toto'u mai tā kōtou au tamariki tamāroa ē te au tamā'ine,

ē ka kite 'oki tō kōtou au tangata 'ōu ra i te au 'ōrama,

ē ka moemoeā tō kōtou aronga pakari i te au moemoeā.

18E riringi atu au i taku Vaerua ki runga a'o i tōku au tāvini tāne,

ē ki runga a'o i tōku au tāvini va'ine i te reira au rā,

ē ka toto'u mai rātou.

19E 'akaāri atu au i te au mea ūmeremere i runga roa i te rangi,

ē te au 'akairo i raro nei i te 'enua:

koia 'oki, te toto ē te a'i ē te ko'u au a'i.

20Ka riro te rā 'ei pōiri ē te marama 'ei toto

i mua ake ka tae ei ki te rā ma'ata ē te kakā o te 'Atu ra.

21E riro 'oki ē, ko tēta'i 'ua atu te ka kāpiki i te ingoa o te 'Atu ra, tei aia te rāvenga ora.’

22“E te au tangata o Īserā'ela nei, ka 'akarongo mai ana i tāku nei tuatua. Ko Iēsū o Nāzarēta, 'e tangata ia tei 'akaāri mai ki a kōtou ē, nō kō mai aia i te Atua nā roto i te au 'anga'anga mana ē te au mea ūmeremere ē te au 'akairo tā te Atua i rave mai nā roto i aia i rotopū i a kōtou nei, kua mārama 'oki kōtou 'ua'orāi. 23#Māt 27.35; Mār 15.24; Luk 23.33; Ioa 19.18Ko ia rāi tā te Atua i 'akataka nō tōna 'ua'orāi 'akakoro'anga ē tōna kite ātea'anga kia tuku'ia atu ki a kōtou na. I tāmate'ia atura ia e kōtou nā roto i te 'akasātauro'anga i aia i te rima o te aronga kāre i a rātou te Ture ra. 24#Māt 28.5,6; Mār 16.6; Luk 24.5Nā te Atua rā i 'akatū mai i aia nā roto i te 'akaora'anga mai i aia mei te au mamae mai o te mate, nō te mea, kāre 'oki e rauka i te mate kia mou i aia. 25#Sal 16.8-11Tē nā kō maira 'oki a Dāvida i aia,

‘Kua tuku 'ua au i te 'Atu i mua 'ua rāi i tōku mata,

tei tōku rima katau 'oki aia, kia kore au e ngāueue.

26Nō reira i mareka ai tōku ngākau ē kua rekareka tōku arero,

ē ka no'o katoa tōku kōpapa ma te tatari,

27nō te mea, kāre koe i vao'o i tōku vaerua i te ngā'i o te mate,

ē kāre 'oki koe e 'akatika kia kite tō Mea Tapu ra i te pē.

28Kua 'akaāri mai koe ki āku i te mataara o te ora,

ē ka 'akakī'ia mai au e koe i te rekareka ki mua i tō'ou aroaro.’

29“E tama mā ē te au taeake nei, e tika kia tuatua pū 'ua au ki a kōtou i te tupuna rongonui i a Dāvida ra, kua mate 'oki aia ē kua tanumia, ē tē vai 'ua nei rāi tōna mēnema i ō tātou nei i tēia noa ai. 30#Sal 132.11; 2 Sam 7.12,13'E peroveta rā aia ē kua nakiro 'oki aia ē, kua 'akapāpū te Atua ki aia ma te taputo'u ē, ka 'akano'o'ia tēta'i o tōna 'uānga ki runga i tōna terōno. 31Nō tōna kite ātea'anga i tuatua ai aia nō runga i te tū'aka'ou'anga o te Mesia ē,

‘Kāre aia i vao'o'ia i te ngā'i o te mate,

ē kāre katoa tōna kōpapa i kite i te pē.’

32Ko taua Iēsū nei rāi, nā te Atua i 'akatū mai i aia, ko mātou katoa nei 'oki te au kite. 33Nō te mea, i 'akateitei'ia aia ki te rima katau o te Atua, kua rauka maira i aia nō kō mai i te Metua te Vaerua Tapu i tuatua'ia maira; ē kua riringi mai aia i tā kōtou e 'ākara nei ē e 'akarongo nei. 34#Sal 110.1Kāre 'oki a Dāvida i tae atu ki runga i te rangi, tē nā kō maira 'oki aia 'ua'orāi,

‘Kua tuatua te 'Atu ki taku 'Atu,

ka no'o koe ki taku rima katau nei

35e tae 'ua atu ki te 'ati'anga ka 'akariro ei au i tō au 'enemi 'ei pange vaevae nō'ou.’

36Ē tēianei, kia kite pāpū tikāi te ngutu'are katoa o Īserā'ela ē, kua 'akariro te Atua i aia 'ei 'Atu ē 'ei Mesia, ko Iēsū nei rāi 'oki tā kōtou i 'akasātauro atu ana.”

37I te 'akarongo'anga rātou ra, puta atura tō rātou ngākau, ē kua ui maira ki a Pētero ē te au 'āpōsetolo katoa, “E tama mā ē te au taeake nei, ka 'akapē'ea mātou nei?”

38Kua pa'u atura a Pētero kia rātou, “E tatarā'ara ē kia bāpetīto'ia kōtou rava rāi ma te ingoa o Iēsū Mesia, ē ka 'akakore'ia mai tā kōtou au 'ara, ē ka rauka mai i a kōtou te 'apinga aro'a nā te Vaerua Tapu; 39nō te mea, ko tei tuatua'ia mai e te Atua, nō kōtou 'oki ē nō tā kōtou au tamariki, ē nō te aronga katoa i te ātea kē ra; koia 'oki, nō te kātoatoa tā te 'Atu tō tātou Atua ka kāpiki atu ki aia ra.”

40'E ma'ata 'ua atu rāi tāna 'akakite'anga ki a rātou, ē kua 'akamāro'iro'i atura aia i a rātou, nā kō atura, “E 'akaora i a kōtou 'ua'orāi mei roto mai i tēianei uki tikakore!” 41Ē te aronga tei 'āriki mai i tāna tuatua, kua bāpetīto'ia i'ora, ē kua kāpiti'ia mai ki a rātou mei te toru pa'a tauatini tangata i taua rā ra. 42Kua mou piri tikāi te aronga i bāpetīto'ia i tā te au 'āpōsetolo i 'āpi'i ē te tā'okota'i'anga atu, i te vāvā'i'anga i te varāoa ē te pure'anga 'oki.

Te ora'anga o te aronga 'akarongo

43E vā ma'ata i'ora te tangata kātoatoa, ē 'e mānganui te au mea ūmeremere ē te au 'akairo i rave'ia e te au 'āpōsetolo ra. 44#Anga 4.32-35Kua 'uipā akera te aronga katoa tei 'irinaki ra ki te ngā'i 'okota'i, ē kua kāpiti 'ua akera i tā rātou 'apinga, 45ē kua 'oko atura rātou i tō rātou au kāinga ē te 'apinga, ē tu'a i'ora nā te kātoatoa kia tau ki te tū ngere o te tangata tātakita'i. 46I tērā rā ē i tērā rā, kua 'akatinamou rātou i te pure'anga i roto i te 'iero ma te ngākau 'okota'i, ē i te vāvā'i'anga i te varāoa i tērā 'are ē i tērā 'are, ē kua kai kāpipiti i'ora rātou i te kai ma te rekareka ē te tū tāvaita'i o te ngākau 47i te 'akameitaki'anga i te Atua. Ē kua manako meitaki 'ua te tangata rava rāi i a rātou ra. Ē kua kāpiti'ia atura e te 'Atu ki a rātou te aronga i 'akaora'ia kāre 'e rā i tukua.

Currently Selected:

'Anga'anga 2: CIMRNT

Highlight

Copy