Markus 5

Zezu ambəl gənək ɗəf də tuya akani

(Matiye 8.28-34 / Luka 8.26-39)

1Yaŋ Zezu ade dit gewleɗ nan bal sən pe'e na Galile, aka dələv net Geresiyenɗe. 2Adan Zezu agil sədəv bəlay, ɗəf mitemin agilik sədəvət magamasɗe. 3Təki naswa nani adəvit magamasɗe, ɗəf tay nawɓapən wərman kaynan ɓa ko də dit ngiyamɗe ɓa. 4Təl ɓəɓɓay ɗii adaynanən dit ngiyamɗe gəm dit salalawɗe aza vani, amma aɓuhuk salalawɗe, anzletik ngiyamɗe sə za təlni. Ko ɗəf taka tay dədawɓap wəziwgən ɓa. 5Dəfəɗ də kapay pak taya əbbal a divit magamasɗe, də aket gərmeŋge, tay ɗi giŋgere də wəntar zən dit ɗoroɗi.

6Amma adan awla Zezu səka faraɗa, adek də wənzuwa akdukuk aba Zezu, 7aŋgəzlək vamvəl dayadaya: Is Zezu Wətən Maŋgəlva* an də gakdaka, məsok də in di? Əntatə komoko, də wiya na Maŋgəlva, kədawzəm gəm saha ɓa. 8Anah vas na vi Zezu anahsəna: Witeme agil səka ɗəffəŋka. 9Yaŋ Zezu assohon ɗəf naka: Mbarmbari iya nok di? Azlan sən Zezu na iya naw na ɗii məkkelit gboŋgu, vi diiɗa mənani. 10Akamanək Zezu, vi adarɓəh witemɗe səka dələv nan ɓa.

11Amaŋgavet gərmeŋge vani ngaɓa net vedemɗe ta taɗɗa daka. 12Yaŋ witemɗe nek akamanən Zezu: Aslənəm azet vedemɗe vi məgul gən aketi. 13Zezu ambər sitik tive. Agulyoŋko, ambataŋgək azet vedemɗe aguloŋguk aketi. Ngaɓa arɓəslka, alotoŋguk sə mabusgum kpukpumo, abətaŋgək aret iŋkile a pe'e, vedemɗe pak azaŋgək aret iŋkile, vedemɗe vet waɗɗaŋ uzinere sula.

14Məzuteɗeŋɗe net vedemɗe, anzoŋko wəmbataŋ awalaŋ gəla, anahənək halabara nan pak sit ɗii dit ɗii na mapoho nani. Yaŋ ɗii agulyoŋ ambataŋ kawla zəga məs dəgəɗə. 15Adan agapaŋ aza Zezu, awlanənək ɗəf mitemin nak aguluk lukut azani, tay ɗewwe, maɗulan asəkika. Ageslne'eŋke. 16Ɗii məs dulanən pak anahsitinik an məs dəgəɗ aza ɗəf mitemin, də an məs dəgəɗ azet vedemɗe pakə. 17Yaŋ akamanən Zezu dəmbat gən səka dələv neti. 18Adan Zezu adawpeŋ adəv bəlay, ɗəf məs də witemɗe nak assohonək Zezu kambat dəndən. 19Zezu dəŋgəm ɓa, amma yaŋ Zezu apsən na: Amndok eŋgil anok da abay halabara nan pak azet ɗii nok pak an məs Ɗəfdaya awəl saha akoko. 20Ɗəffəŋ ambatka atoŋguk aka dələv məs adawyaŋ na walaŋ gəleɗe klaw, anah sitik ɗii pak zəga an məs Zezu agəɗ səni ha ɗii pak agətaŋka.

Wətən Zayrus dət guluk tərəŋ gən lukut na Zezu

(Matiye 9.18-26 / Luka 8.40-56)

21Zezu ateŋke adəv bəlay, agarək ki pe'e. Ɗii diiɗa akkalaŋka zani. Yaŋ Zezu aziw amet iŋkile. 22Zayrus daya na gəla nakkal net Yahudiyenɗe. Adan awla Zezu akdukuk abani. 23Akamanək Zezu diiɗa amna: Wətu tat də gbəgba'a gu'otə də əmta. Kamə ade aɗi vok akata atəmbələ, təsat gən madarata.

24Zezu ambatək dənɗaŋ. Ɗii diiɗa asbanənək Zezu, tahəŋ wəhaslanənni. 25Guluk tat də gbəgba' na zəlaha wəsva klaw kiyən sula. 26Təmbatək azet ɗii məkayaŋ miha təzanək arya nat pakə. Amma ko dəɗaah tay səka gbəgba' nan ɓa, say wənzləra akani. 27Adan təpprəm wənna Zezu: Təguluk aweleŋgit ɗiiyi, təziwik dərɓaga Zezu. 28Vi təɗumək na: An nərahək wərəŋ gən lukut nan kaaka'ə, wənəmbələ. 29Tərəŋ gənək lukut na Zezu, kakaŋkani wəzəlah nat appatəka, təsənək aza gəɓa zət na təmbələk səka gbəgba' nata. 30Amma Zezu asənək ləŋ na sembe agilyoŋko səzani. Akpaŋganək haran aweleŋgit ɗiiyi amna: Naway dərəŋ gən lukut naw di? 31Gewleɗ nan azlananka: Istatə ule ɗii tahəŋ wəhaslakuni, vi mi kəda sohon na: Naway dərəŋgu di di?

32Amma Zezu tayula amaŋgavani vi kawsən ɗəf dərəŋ gəni. 33Guluk nak tətəŋgək wəkere sən geslne vi təsənək an məs dəgəɗ azata, təsənək na Zezu wasənta, tədeke təkdukuk amba təl Zezu tənahsənək goŋga na mat pakə. 34Zezu apsət na: Wətuwa wətaf nok ambəl gukuko. Dok zamə, ambəl səka gbəgba' noko.

35Daga Zezu dəɓəl wəgrak wəpel nan tagay ɓa, ɗii azoŋguk siŋgil anna Zayrus da. Apsənən na: Wətuk təmtəka, apan mərbə zəga kədayan ɓa. 36Amma Zezu dəɗum aka wəpel məs adawpeleŋ ɓa. Apsən Zayrus na: Kədaw geslne ɓa, nok ataf kaaka'ə. 37Zezu dəpəl ko ɗəf taka wəsban ɓa, say Piyer də Zak gəm Zaŋ, məlmən Zak. 38Adan agapaŋ eŋgil ana daya na gəla nakkal net Yahudiyenɗe da, Zezu tayəpprəm geŋgere, ɗii tahəŋ wəhəmaŋ, də vamvəl daya daya. 39Zezu atoŋguk eŋgili, apsit na: Vi mi kədaskaŋ morkoyo də wəhəm di? Waŋ təmtə ɓa, wəleŋ tədawleŋ ɗarə. 40Ndəɗaŋ pak amasaŋgək akani. Vini Zezu agilgiti, yaŋ agəm affəta dət mata gəm gewleɗ nan hoku neki, atoŋgoŋguk atəki waŋ təsata. 41Armak vata, apsət na: Talita kumi, (va wənah na wakə əntatə nah suko asili). 42Kakaŋkani waŋ təsilke, wəsva nat klaw kiyən sulayi, agətaŋgək sawɓa. 43Zezu abayək meti adawnahaŋ sənən ko nawa ɓa. Yaŋ anahsiti: Məpsət zəga nawzəm suɗike.

Currently Selected:

Markus 5: GDRNT85

Highlight

Copy