Markus 14

Kuket narma zuzu

(Matiye 26.1-5 / Luka 22.1-2 / Zaŋ 11.45-53)

1Appələk uvoŋ sula wəzləra na Paska* wagəɗə, də dupeŋ wəza wuɗo aran ɓa: Ɗii net məs dəlveŋge na Maŋgəlva dit məsənaŋ zəga na ma henziŋ akayaŋgək tive karma Zezu də məɗama, vi kawbayni. 2Aɓɗaŋ mədarman də wəzləraŋ ɓa, vi ɗii adaw gayaŋ ɓa.

Guluk təmanək mel aka Zezu

(Matiye 26.6-13 / Zaŋ 12.1-8)

3Yaŋ Zezu asan a Baytaniya, eŋgil ana Simoŋ da məskokolo. Pay asan kawzəma, ɗak tədek də bəbər na mel avata, iya na mel van na tursan (nard) wərəh nan tuwãhi, guluk nak təkoluk ma bəbəra, tmanək mel nak aka Zezu. 4Ɗii meɓɓet sə waleŋgit gədivit adəka, vi mi təray gən mel nat mekeleŋ vaŋdi? 5Va təvələk mel nan tərah gən suleyɗe səkat hoku na ɗəɗaah ɓasa, təpsit gin məs saheŋɗe, watər wəray kəta. Vaski aɗɗaŋ wərwər akata. 6Zezu apsit na: Məppata! Vi mi kədawtakən kiyit di? Təgəɗswək wəza mogoni. 7Məsaheŋɗe tahəŋ də munokum ɗayɗayə, wa kəɓapən wəɗɗa sit mogon ko dewɗe kəŋglaŋ pakə. Amma nawa, nəsaw na də munokum pay pak ɓa. 8Nat təgəɗək məs təŋgələ. Daga pay dəɓəl ɓa təpayək mel sən gəɓa zu vi kawndəkwa. 9Gesiŋ nədawnah sukum: Atəki adawpelin Wən Nenek a duniya pakə, kawpelin ni an məs ɗak kəŋ təgəɗəŋ ka, vi kaɗumon wənnata.

Zudas azəmək ki Zezu

(Matiye 26.14-16 / Luka 22.3-6)

10Yaŋ Zudas Iskariyot məs taka suweleŋgit gewleɗ klaw kiyit sula, ambatək azet ɗii net məs dəlveŋge na Maŋgəlva, vi kawzəm ki Zezu azeti. 11Adan apprəmənən wənnani, annekik zit sawɓa. Apsənənək suleyɗe. Daga dəpaska Zudas atəŋ wəkayan kuket narma Zezu məza tuwã ɓa.

Zezu tay zəm way na Paska* dit gewleɗ nani

(Matiye 26.17-25 / Luka 22.7-23 / Zaŋ 13.21-30)

12Pay dabəŋ na wəzləra net dupeŋɗe məza wuɗo ɓa, məs adawtawaŋ botol na Paska, gewleɗ na Zezu assohonənka: Aŋgay kəŋgəl məmbat gən wəzaɓan təki nawazəm way na Paska vi yuk di? 13Zezu andək sula suweleŋgit gewleɗ nani, apsit na: Mugul awalaŋ gəla. Wakəlmaŋ sənən ɗəf də hinziwe. 14Məsbani adəv gəla an agulu, mə nah sən affən gəla vana: Mərbə zəga amna: Aŋgay gəla naw məs nawzəm way na Paska dit gewleɗ naw di? 15Warban sukum gəla an məɓayin, metiŋgini, dit zigeɗ pak məzaɓet adaka, adaki kədawzaɓanən waya. 16Gewleɗ nan adoŋko aguloŋguk awalaŋ gəla, arəhənək zəga pak va anahsiti. Azaɓanənək way na Paska.

17Adan moskoy agəɗə Zezu adek dit gewleɗ nan klaw kiyit sula neki. 18Pay adasoŋ atəki wəzəm waya, Zezu anahsitike: Nəsənək fəkatə, ɗəf taka suwaloŋkum məs dədawzəm way də ina wazəm kiwa. 19Assanək makret gewleɗ nani, atəŋgaŋgək wəssohoŋ taka taka: Əntə soko?

20Zezu azlansitike: Ɗəf taka səmbokum klaw kikum suləŋki: Ɗəf məs dədawgul van sap də in adəv hiluwəŋki. 21Fəkatə Wətən Ɗəf*, wamtə va məver wənnani. Amma bonoy warəh ɗəffan dədawzəm ki Wətən Ɗəffa. Ɗəf nan ɗəɗaah va muwani ɓa.

Way an Salala*

(Matiye 26.26-30 / Luka 22.15-20 / 1 Korintiyen 11.23-25)

22Adan adawzəmaŋ, Zezu agəmək dupeŋ, agəɗək soko sən Maŋgəlva, arɗanəka, apsitik gewleɗ nani, apsit na: Aŋka gəba zuwi. 23Agəmtək həloŋ na biya net wəleŋɗe, agəɗək soko sən Maŋgəlva, apsitike, asanənək pak sədəvət həloŋku. 24Zezu anahsitike: Eŋki mbel zuwəŋ ndəɗaŋgəŋ tive nawsleret ɗii də Maŋgəlva azoŋguk viyit ɗii diiɗa. 25Gesiŋ nədawnah sukum nəsəna ɗaah biya net wəleŋɗe ɓa, say pay nədawsaa meleketen adəv məlĩ na Maŋgəlva. 26Yaŋ ayaŋ gəlya nawzləra ambataŋ aka gərəm na hereme.

Zezu də Piyer

(Matiye 26.31-35 / Luka 22.31-34 / Zaŋ 13.36-38)

27Zezu anah sitik gewleɗ nani: Munokum pak wakəpawəni, wakənzoŋgu, wənnan məverni na: Wanəbay məzutaɗɗa, timeŋgiɗ watrayaŋ atəki pakə. 28Amma pay nədawsilyaw sətəki əmta wanəmbat dabəŋ kikum a Galile. 29Piyer apsən na: Ko ɗii pak dəpokuni, naw kam nəpok na ɓa sam. 30Zezu azlan sənək na: Apprəma gesiŋ nədawnah suko: Ɗəfɗəŋka, pay bazlay adawhəm təl sula, wakənah na kəsənu ɓa təl hoku. 31Amma Piyer anahək də sembe: Ko də dewle wanəmtə di'isi, nənah na vas ɓa. Vaski gewleɗ annahaŋ pakə.

Zezu tay zuli a Getsemane

(Matiye 26.36-46 / Luka 22.39-46)

32Agapaŋgək atəki məs adawyaŋ na Getsemane, Zezu anah sitik gewleɗ nan na: Məssoŋ aŋka nəmbat wəzuliya. 33Yaŋ agəm Piyer də Zak gəm Zaŋ dəndəni. Atəŋgək wəsən geslne də wəkere. 34Anah sitik gewleɗ nani: Makraw asawəka ha tayəŋgəla wəbaywa. Məssoŋ aŋka məga. 35Ambatək abe suɗike, akduko fuŋ, azuli sənək Maŋgəlva vi pay na bonoy nan dətoŋ gəni, an va wagəɗə. 36Amna aw Affu nawa azok na ko mi pak tay tuwãh ɓa. Azargət həloŋ na bonoy kəŋ səzawa. Amma agəɗ va an nəŋgəl ɓa, say va an kəŋglə.

37Amilik əmpa azet gewleɗ hoku neki, arihik məleŋti. Apsən Piyer na: Simoŋ, əstatə leŋ sa? Kəɓapənna wəgan ko ler taka ɓa sa? 38Munokum pakə, məga məzuliyə vi kədawguloŋ adəv wərak ɓa. Əmpəs na ɗəf aŋgələk vaska, amma gəɓa zən mədakni.

39Ambatək əmpa, azuliyək də wən an madabəŋ naka. 40Adan amili arihik tahəŋ wəleŋgeŋ, sin armeninke. Dəsənən va adawzlan sənən ɓa. 41Adan ade azet ma hoko'ən, apsit na: Məzuleŋgeŋ, munokum tatə fet sa? Məkki kana pay agapka. Kakaŋ na ɗii mbreyit warmanən Wətən Ɗəffa*. 42Misili, mədamə. Awla ɗəf nawzəm kiyu yaŋ agapka.

Va armanən Zezu

(Matiye 26.47-56 / Luka 22.47-53 / Zaŋ 18.3-12)

43Daga Zezu dəɓəl wagrak wəpel nan ɓa, Zudas an taka səmbet gewleɗ klaw kiyit sula adeke. Ɗii diiɗa azoŋguk dəndən, dit kafahiɗi dit zleŋɗe, dayeɗe net məs dəlveŋge na Maŋgəlva dit məsənaŋ zəga na ma henziŋ dit ɗii gugiriɗ net məzaɓaŋ wən disliŋgini. 44Ɗəffan dəŋgəl wəzzan Zezu arban sitik kukete apsit na: Ɗəffan nədasɗan va baynawa, ndəni kərmanən gəni kəkanən gəni kəganən gən lewlewi. 45Adan Zudas agapə, ambatək aza Zezu dabəŋ, apsəna: Mərbə zəga yaŋ aklak van awlani, arəŋ gənək baran də mani. 46Ɗii aɗiyənək vet akani armanənka. 47Amma ɗəf taka suweleŋgit gewleɗ na Zezu aptuwək kafahi nani, abələk məgəɗ wəza na daya net məs dəlveŋge na Maŋgəlva, abələk sləmani. 48Zezu anah sitik ɗiiyi, vi mi kəzoŋ dit kafahiɗ maay zleŋɗe vi karmuwən va kəmna məvoŋ tive nani di? 49Pay pak əntat də munokum əntat wərban sukum zəga adəv gəla metiŋ naw zuliya* ya kərmuwən ɗaah ɓa. Amma agəɗ vas na vi an məverin dəknah gəni. 50Yaŋ gewleɗ pak apanəni anzoŋ.

51Gawla maɓɓan asbanək Zezu, tay də godo azan kaaka kəlakə. Yaŋ aŋglaŋ wərmanənni. 52Amma asganək godo, anzanək zən mekeleŋ.

Zezu taya ba kita

(Matiye 26.57-68 / Luka 22.54-55,63-71 / Zaŋ 18.13-14,19-24)

53Yaŋ akanən Zezu ana Ɗəfdaya net mətawaŋ wəla zəga sən Maŋgəlva da, akkalaŋgək adaka dit ɗii net məs dəlveŋge na Maŋgəlva dit məsənaŋ zəga na ma henziŋ gəm məzaɓaŋ wənna dəlva. 54Piyer tayəsbet daga sə faraɗa, aguluk aŋgil anna Ɗəfdaya da net mətawaŋ wəla zəga sən Maŋgəlva, asanək dit gewleɗi, taylu offo.

55Yaŋ ɗii gugiriɗ net məs dəlveŋge, dit məzu slereŋ na dələv pakə, akayaŋgək saydawa aka Zezu, vi kaslban də kita namta. Amma dərəhaŋ ɓa. 56Ɗii diiɗa aɗɗaŋgək saydawa na tepelke aka Zezu, amma met dəsler ɓa. 57Yaŋ ɗii meɓɓet asilyoŋ, aɗɗaŋ saydawa na tepelke, annəhaŋ na: 58Məpprəmək anahək na: Wanəɓzlu gəla metiŋ naw zuliya* məs ɗii arkaŋ də veti, pay hoku wanərka maɓɓani məza də vet ɗii ɓa. 59Amma saydawa net dəsler ɓa'a.

60Ɗəfdaya net mətawaŋ wəla zəga sən Maŋgəlva asilke, aziwik aweleŋgit ɗiiyi, assohonək Zezu. Kəzlan sit na ɗii məzəɗɗaŋ saydawa akokəŋ ɓa sa? 61Amma Zezu ɓatɓatə, dəzlan ɓa sam. Yaŋ Ɗəfdaya net mətawaŋ wəla zəga sən Maŋgəlva assohonək əmpa: Is na Messiya* kənan sa, walla Wətən Maŋgəlva* məs də zəzaya? 62Zezu amna əntə, nokum bo wakulanən Wətən Ɗəf* dawsan aka va dəzəŋ na Maŋgəlva, məs dəsən zəga pakə, wakulanən dazan aka slay buwən a disiŋ. 63Yaŋ daya net məs dəlveŋge angar lukut nani, amna: Wəray tay naw kay saydaweɗ meɓɓet ɓa. 64Kəpprəmənək mbrayen nani. Mbar kənahaŋ kandi? Atawənək kita akani say wəbayən.

65Ɗii meɓɓet atəŋgaŋgək wətuf mifɗe aka Zezu. Asərətənək harani, aslkərənka, yaŋ anahaŋ na: Asəna naway dəslkuruk di? Məzugaŋ agəmənək Zezu arganənək atapaslayən.

Va Piyer anah na dəsən Zezu ɓa

(Matiye 26.69-75 / Luka 22.56-62 / Zaŋ 18.15-18,25-27)

66Ya Piyer taya daŋgla tagay, yaŋ balamək səmbet balemɗe na daya net məs dəlveŋge na Maŋgəlva təde. 67Tulak Piyer taylu offo, təsəŋlanəka, təmna: Nok bo istat də Zezu na Nazaret. 68Amma Piyer azelenək wənnata, amna: Nəsən ɓa, nawsən gabban va kədaŋgəla wənah ɓa. Yaŋ agil appaka. Pay nan bo bazlay ahəmka. 69Balamək tulak əmpa, tənah sitik ɗii məs də ziweŋ adaka: Ɗəffəŋka nan bo səmbeti. 70Piyer azelenək əmpa. Ya dənzi ɓa sam, ɗii məs nadak nek anah sənənək Piyer: Kəɓapna wəbay mana aweleŋgit nan ɓaɓa, vi nok bo ɗəf na Galile kənani. 71Yaŋ Piyer atəŋ wənah na: Maŋgəlva dəzawa an wən nədawa. Naw nəsən ɗəf van ɓa. 72Yaŋ ləŋ bazlay ahəmək ma sula'ən. Piyer aɗumonək wən məs Zezu anahsən na: Pay bazlay adawhəm təl sula ni wakənah təl hoku na kəsənu ɓa. Yaŋ agili ahəmka.

Currently Selected:

Markus 14: GDRNT85

Highlight

Copy