Markus 13

Zezu arbanək va adaɓzluwən gəla metiŋ naw zuliya*

(Matiye 24.1-2 / Luka 21.5-6)

1Adan Zezu agil sədəv gəla metiŋ naw zuliya, ɗəf taka səmbet gewleɗ nan anah sənəka: Mərbə zəga awla mbari gəlaŋ arkə mogon vaŋ dit gərmeŋgeŋ di. 2Zezu azlan sənəka: Kulak gəlaŋ mərkan metiŋgi nəŋ ɓa sa? Apəl na kuwən məzleɓin aka kuwən maɓɓan ɓa, məzu zeleŋ waɓzlunən pakə.

An dədazan dabəŋ ki wəgrak dəlva

(Matiye 24.3-14 / Luka 21.7-19)

3Zezu asanək aka gərəm na hereme aba gəla metiŋ naw zuliya*. Piyer də Zak gəm Zaŋ gəm Andre ndəɗaŋ katirgit asoŋguk də Zezu assohonənka: 4Anah səm ɗa dewɗe zigeɗis adaɗɗaŋ di? Mi narban səm pay nagrak net di?

5Zezu atəŋgək wərbansiti: Amna: Məzi zukum, vi adaw zokuməni. 6Vi ɗii diiɗa wazoŋ də iya nawa, wanəhaŋ na: Əntə Messiya*. Wazetin ɗii diiɗa. 7An kəpprəmənək halabara nawgay gu'o ko faraɗa, kədaw geslne'eŋ ɓa. Aslək dəgəɗgən vaska, amma wəgrak dəlvi tagay ɓa. 8Ɗii meɓɓet wagayaŋ dit ɗii meɓɓeti. Məlĩ maɓɓan wakayaŋ mama məlĩ maɓɓani, dəlva fuŋ waɓəl atəki temtem may bo wagəɗə. Ndəni va daway nawa adasat ɗakə.

9Məsla zukum, vi warmukuməni, wakukumən aba kita wargukuməni adəv gəla nakkal net Yahudiyenɗe. Waziw gukumən abet ɗii gugiriɗ dit məlĩyeŋge vi iya nawa, kəɗɗaŋ gən saydawa abeti. 10Say ɗii namba dələv dəpprəmən gən wəpel Wən Nenek pak tagay. 11Warmukuməni, wakukumən abet mətawaŋ kita, kədaɗumoŋ an məs kədawpeleŋ ɓa. Amma an pay nan agapka. Məpel wəpel an məs kərəhaŋ, wəpel nan agil na sə mokum ɓa, amma səza Əmpəs na Maŋgəlva adazani. 12Ɗii wapsitin milmiŋgiɗit vi kawbayti, affiŋgiɗit kirin bo vas adaɗɗaŋ. Kirin wasilyoŋ aket migilti, vi kawbeyti. 13Ɗii namba dələv pak wazelkuməni viwa. Amma ɗəf an dədawgan ha aza wəgraka wakohu.

Daryaw də mbrayen

(Matiye 24.15-28 / Luka 21.20-24)

14Akulanən an məs adawnahaŋ na mbrayeni daryawi, naw geslne səni, tay ziwe atəki məs dəslə dəziw gən ɓa. (Ɗəf an məs dəŋɗani, say dəpprəman lew lewi.) Asna ɗiiyen naka dələv na Zude say dənzoŋ gən aket gərmeŋge. 15Ɗəffan naka balakə, adawpriken eŋgil vi kawnda zigeɗ nan ɓa. 16Ɗəf məs na guliyo adawmilyan eŋgil kaw gəm lukut nan ɓa. 17Tuwãhi viyit gil dədawayɗe gəm məzuweɗ gitin kirin pay nani. 18Məkaman Maŋgəlva vi pay nan adawsan pay na səmnya ɓa. 19Vi pay nani, wagəɗ tuwãh diiɗa, daga Maŋgəlva aɗɗa təki a disiŋ də dəlva fuŋ dəgəɗ ɗaah vas ɓa ha dəpaŋka, agəɗ na ɗaah sə dəbərən ɓa bo. 20Amma Ɗəfdaya waduduɗukon pay nani viyit ɗii nan məwelti, va vi vaski ɓa, ko ɗəf taka akoh na ɓa.

21Pay nani, an ɗəf anah sukumək na: Messiya* tayaŋka, walla taya da, kəltafnən ɓa. 22Vi Messiyeɗ məwaŋ wənna dit məs kleŋɗe məwaŋ wən wazoŋ, waɗɗaŋ sokeneɗ, vi kawzet ɗiiyen na Maŋgəlva aweli, va waɓapəni. 23Say kəslanən gən zukum vi nənah sukumək dabəŋ.

Wəziya na Wətən Ɗəffa*

(Matiye 24.29-31 / Luka 21.25-28)

24Pay nan dərɓaga bonoyi naka, pay wasərətə, təla akasak na ɓa. 25Ngərzleɗ na disiŋ wabətaŋ, sembeɗ na disiŋ pak waɓlaŋ. 26Asna kawlani Wətən Ɗəf dazan aka slay buwən a disiŋ də sembe diiɗa də gakdaka. 27Asna waslən maslayɗe nan amba tapaslay pay poɗo pak vi kakelet ɗii məs awel səmba tapaslay pay poɗo pakə.

Wən məkpaŋga də sukoyo

(Matiye 24.32-35 / Luka 21.29-33)

28Məpprəman wənna sukoyo adarban sukum: An kiva sukoyo askəka, gaslamba nan bo andəfka, kəsəŋnənək bo mənzi go'oyi. 29Vaski nokum bo, an kulanənək zigeɗis pak tahəŋ wəɗɗaŋ vaska, məsənna, go'oy aza wəzani. 30Gesiŋ nədawnah sukum: Ɗiiyen mederet kakaŋka amtaŋ na zam sa zigeɗis dəɗaŋgən ɓa. 31Disiŋ də dəlva fuŋ pak wagrakaŋ amma wəpel naw agrak na ɓa.

Maŋgəlva kaaka dəsən pay nagrak dəlva

(Matiye 24.36-44)

32Ɗef tay dəsən pay adazan ɓa walla wənziya na pay nan ɓa. Ko maslayɗe na disiŋ, ko Wətən Ɗəffa*, say Affən kaaka dəsəna. 33Məsla zukum, kədawleŋgeŋ ɓa vi kəsənən pay nan adaɗɗa ɓa. 34Wagəɗ va ɗəf adadan malaka, apanək gəla nani, apanək wəza nan avet məɗɗaŋ wəza, ko naway pak apsənək wəza nani, anahsən məzuga memeŋle na aga. 35Vi vaski məga vi kəsənən pay affən gəla adazan ɓa, kuzuŋ moskoyo, kuzuŋ tətaŋ dəfɗa, kuzuŋ aba pumpum, kuzuŋ də mompumi. 36An adek va mamal na adazan wərəhkum məleŋkum ɓa. 37An məs nənah sukumeŋka, wanənah sit ɗii pakə: Məga.

Currently Selected:

Markus 13: GDRNT85

Highlight

Copy