Markus 12

Wən məkpaŋga net məzən seŋ mbreyiti

(Matiye 21.33-46 / Luka 20.9-19)

1Yaŋ Zezu apel sit ɗii də wən məkpaŋga. Amna: Ɗəf adiyək guli net wileŋɗe abasək man də mambara, akuhuk katafay nawɗot uwa net wileŋɗe, arkak gəla metiŋgin naw ga gulyo. Appanək guli van avet məɗɗaŋ wəza, ambatək malaka. 2Yaŋ mawala agapə naw ɓu uwa net wileŋɗe, aslənək məgəɗ wəza nan azet məzən seŋ neki vi dəpsənən gən haran nan səzet wileŋɗe. 3Armanənək masləŋ naka, arganənka, apanənək van mekeleŋ. 4Yaŋ affən guli aslən məgəɗ wəza nan maɓɓani. Məzən seŋ nek armanənka, arganənək aka kini aranənka. 5Affən guli nak aslənək məgəɗ wəza maɓɓan əmpa, amma abaynənka. Vaski aɗɗaŋ sitin ɗii diiɗa, argeninik ɗii meɓɓeti, ɗii meɓɓet bo abeyinke. 6Say apəl sənək affən guli wiyən tətaka tabuwa nani. Aza wəgrak nani, aslənək wətən nak azet məzən seŋ neki, aɗumək na wagakdakanən wətuwəŋka. 7Amma apeleŋgək awalaŋ ziti. Ndəni dədawzəm gəla nani, say mabay səmə, asna guli net wileŋɗe dəsan gən kanamə. 8Armanənka abaynənka, asganənək gəbay nan sə gulyo.

9Vas na mbar affən guli net wileŋɗe adaɗɗa di? Wade wabey məzən seŋ neki, wapsit guli net wileŋɗe sit ɗii meɓɓeti. 10Kəŋɗanən məs məverin ɓa sa?

Kunəŋ məs mərkaŋ gəla asgaŋgə naka,

awla ndəni dəkpaŋ kuwən na sləma.

11Vaski an məs Ɗəfdaya agəɗə,

as sokeneyi amaramə.

12Ɗii gugiriɗ net Yahudiyenɗe akayaŋgək tive narmani, asənənka aketi apel wən məkpaŋgaŋka. Amma ageslne'eŋgək viyit ɗiiyi apanənka, ambataŋka.

Wən nafaɗ garama sən məlĩya

(Matiye 22.15-22 / Luka 20.20-26)

13Yaŋ ɗii gugiriɗ net Yahudiyenɗe aslinin ɗii meɓɓeti Farisiyenɗe* dit ɗii na Herodə aza Zezu vi karman də wəpel na mani. 14Azoŋguk azani apsənən na: Mərbə zəga, məsənka əstə təstəssə, kaw geslne sən wəpel net ɗii ɓa, kaɗum aka ɗəf məzə gakdakan zən ɓa, istat wərban tive na Maŋgəlva də goŋga. Anah səmə: Ma henziŋ atakək əpsən zomorgol sən məlĩ na Roma sa walla də tak ɓa? 15Məpsən sa walla məpsən ɓa sa? Amma Zezu asənək matakataka neti, apsit na: Vi mi kəda əzaɗən mazat abaw di? Məkisu suley van nula ɗa. 16Akisənənka: Assohotike: Aŋ foto na naway də iya na zanəŋ məvernəŋ di? Azlan sənənka na Sazarri. 17Zezu apsit na: Məmndagan sən an dəslə sən məlĩ na Roma, məpsən Maŋgəlva bo an dəslə səni. Agətaŋgək aka wəzlan nan sawɓa.

Wəssoh aka wənna wəsilye net ɗii mimtiti

(Matiye 22.23-33 / Luka 20.27-40)

18Ɗii məs adawyaŋ na Sadusiyenɗe azoŋguk aza Zezu. (Net tahəŋ wənahaŋ na wəsilya tay səka əmta ɓa.) Assohonənək Zezu: 19Mərbə zəga, Moyis aver səmək na: An ɗəf amtəka, apatək guluk nani tuwə ɓa, say məlmən dəzəm gəla zata, vi dəɗisən gən zev məlməni. 20Kirin tahəŋ də məlma zit buhul, an daya akayək gulku, yaŋ amtə məza duwaŋ ɓa. 21Mabərkiyən azəmək gəla zata, nan bo amtəka duwə ɓa. Maɓɓan bo azəmək gəla zata, vasaka'a. 22Ha ndəɗaŋ buhul pak azəmaŋgək gəla zata, amtaŋka duwaŋ ɓa. Dərbeget pak guluk bo təmtəka. 23Vasna pay wəsilya sətəki əmta na kawsat kana nawa kandi? Vi ndəɗaŋ buhul pak aɗitənka.

24Zezu azlansitik na: Munokum tatə zlaɓaŋ sawɓa. Vi kəsənən məs məverin ɓa, kəsənən gakdak na Maŋgəlva ɓa'a. 25Pay wəsilyo net ɗii mimtiti, akayaŋ na guluk ɓa, wakpaŋgaŋ va maslayɗe na Maŋgəlva a disiŋ. 26Amma wənna silyo net ɗii mimtiti, kəŋɗanən ɗaah adəv ɗerewel na Moyis wənna offo adəv dezeze ɓa sa? Va Maŋgəlva anahsən Moyis: Əntə Maŋgəlva na Abraham, Maŋgəlva na Isak, Maŋgəlva na Zakubu. 27Maŋgəlva net ɗii mimtiti ɓa, amma Maŋgəlva net ɗii medereti. Vini munokum tatə Zaŋ sawɓa.

Ma henziŋ an dəday pakə

(Matiye 22.34-40 / Luka 10.25-28)

28Adak na mərbə zəga na ma henziŋ tayi, apprəmək wəbay ma nani, awlak Zezu azlan sitik Sadusiyenɗe lelew sawɓa. Vi vaski azar azan assohoni amna: Ma henziŋ na Maŋgəlva awani day di? 29Zezu azlan sənəka: Aŋki ma henziŋ an dəday pakə: Apprəma Israyel. Maŋgəlva Ɗəfdaya takayi. 30Aŋglu Maŋgəlva Ɗəfdaya nok də makrok pakə, də ma genegenok pakə, də əmpəs nok pak də gurom nok pakə. 31Apprəm ma henziŋ an ma sula'ən: Aŋglu megok va kəŋglu zuko. Ma henziŋ na Maŋgəlva tay dəday kiyit es ɓa. 32Məsəŋ zəga na ma henziŋ apsən Zezu na: Lewi. Mərbə zəga gesiŋgi kənahə. Ndəni Maŋgəlva taka maɓɓan tay ɓa, ndəni Maŋgəlva katər gən kaaka'ə. 33Say dəŋglu də makrani də maɗulani də gurom nan pakə, də wəpəs nan pakə, dəŋglu meggeni. Va aŋglu ki zəni. Ndən mogon dayki wətaw wəla zəga mamaya atəki nawtawsən zəga də wəɗɗa sən sazlaga də an ɗəf adapsən Maŋgəlva pakə. 34Zezu awlak ɗəf nak azlanək mogoni, anah sənəka: Faraɗɗa kənan də məlĩ na Maŋgəlva ɓa. Dərɓagani ko naway geslne armak də wəssohon wəssoh maɓɓani.

Messiya* gəm Davit

(Matiye 22.41-46 / Luka 20.41-44)

35Pay Zezu adarban wən adəv gəla metiŋ naw zuliya*, assohko: Mbarmbari məsənaŋ zəga na ma henziŋ adawnəhaŋ na Messiya na Wətən Davitti* di? 36Yaŋ Davit sən kiyən anahək də Əmpəs Salala* na:

Ɗəfdaya anahsən Ɗəfdaya naw na:

Asok aka va dəzəŋ nawa,

nəvoŋgitigən məzuzelkun amba tulko.

37Yaŋ Davit dəvan aya na Ɗəfdaya: Ya mbarmbari Messiya adaw san wətən əmpa di?

Məsla zukum azet məsənaŋ zəga na ma henziŋ

(Matiye 23.1-36 / Luka 20.45-47)

Ɗii məkkelit diiɗa apprəmənək wəpel na Zezu də zit neki. 38Yaŋ anah sit ɗii məs adarbansiti: Məga zukum səzet məsənaŋ zəga na ma henziŋ. Aŋglaŋgək wəbalaŋ dit lukutɗe zezekɗe. Aŋglaŋ ɗii disɗetin gən agilet lumiɗi. 39Tay weleŋ təki naso mogon day pak adəv gəla nawpel wənnet Yahudiyenɗe, atəki nawzəma, tahəŋ wəkayaŋ təki mogon naso. 40Tayəɗɗaŋ kuket aket gil net gəbayɗe, taŋ zəmən gəla neti, tayənziyaŋ diiɗa aka wəzuli neti vi ɗii dulenin gən va ɗii na Maŋgəlva. Warəhaŋ kita an tattuwãha.

Va guluk na gəbay məs sahaŋ təpsən zəga sən Maŋgəlva

(Luka 21.1-4)

41Yaŋ Zezu asan amaŋgava akoti napsən suleyɗe sən Maŋgəlva adəv gəla metiŋ naw zuliya*. Awlek ɗii dawɗiyaŋ suleyɗe adəv akoti. Məs aryeɗ diiɗa aɗiyaŋgək suleyɗe diiɗa. 42Yaŋ guluk məs sahaŋ ga gəbay tədeke təɗiyək koɓeɗ sula, ndəɗaŋgəŋ avat kaaka'ə. 43Zezu ayek gewleɗ nani, apsit na: Əntatə nah sukum, guluk na gəbay məs sahaŋ kəŋkə, təɗiyək suleyɗe adəv akoti daykiyit ɗii pakə. 44Vi net aɗiyaŋgək suɗike səza arya metiŋgin neti, amma guluk kəŋkə ko məs sahaŋtə təpsənək Maŋgəlva pak ana zəm gən kita.

Currently Selected:

Markus 12: GDRNT85

Highlight

Copy