Matiye 28

Wəsilya na Zezu sətəki əmta

(Markus 16.1-10 / Luka 24.1-12 / Zaŋ 20.1-10)

1Dərɓaga pay naffete*, təki biŋbiŋgi, Mari na Magdala gəm Mari maɓata azoŋko ula magamasə. 2Go'ləŋgə dələv aɓələk diiɗa, maslay na Ɗəfdaya aprikik daga sə disiŋ, akəɗəŋgələk gərəm sə magamasə, asanka kani. 3Zən awiɗɗik va uwiɗ na buna, bəbar na lukut nan bo va ɓeɓɓrezle. 4Geslne armek məzugaŋ magamas sawɓa akereŋke, tahəŋ va mimtiti. 5Yaŋ maslay anah sit gil neki: Nokum kədaw geslne'eŋ ɓa, nəsənək pakə Zezu məs məkpa'ən kədaw kayanəni. 6Tayaŋ ɓa, asilik va anahə. Məde mula təki an Ɗəfdaya a voŋgu. 7Mədoŋ də kakara, məne sit gewleɗ nani asilik səzet ɗii mimtiti. Nan bo wambat dabəŋ kikum aka dələv na Galile, adak kədawlanəni. Aski naw nənah sukum.

8Agilyoŋguk də kakara sədəv magamas ləŋgə də geslne də wəneken zit diiɗa, anzuwaŋka vi kawnah sit gewleɗ nan meɓɓeti. 9Yaŋ Zezu aləm dənɗaŋ, apsit na: Nəsɗokumko, zəzay dəsan də munokum. Azoŋko zani, armanənək tələn azuliyaŋ sənənka. 10Yaŋ Zezu anahsiti: Kədaw geslne'eŋ ɓa, mədoŋ mənesit milmiŋgiɗu meɓɓeti dədoŋ a Galile, adak adawluwəni.

Məpsiti deleɗ sit məgaŋ magamasə

11Adan adadoŋ, ɗii səmbet məgaŋ magamas adoŋko awalaŋ gəla, anahsitinik memilyeŋge net məs dəlveŋge pak an məs dəgəɗə. 12Memilyeŋge net məs dəlveŋge dit ɗii gugiriɗ pak akalaŋka aslereŋke, apsitinik deleɗ diiɗa sit sozeɗi. 13Apsitin na: Kənəhaŋ gən na: Gewleɗ nan azoŋguk dəfɗa mənam tat wəleŋge ahalnənka. 14An ngomna apprəməka waməpel səni, waməgilgukum sədəv tattuwãh nani. 15Sozeɗ agiminik deleɗi, aɗɗanənək va mənahsiti. Halabara nan atərayək aweleŋgit Yahudiyenɗe ha gap pay dəpaŋka.

Zezu arbanək zən azet gewleɗ nani

(Markus 16.14-18 / Luka 24.36-49 / Zaŋ 20.19-23 / Wəza net Masləŋɗe 1.6-8)

16Gewleɗ klaw kiyit taka ambataŋgək a Galile, aka mosorgo va Zezu anahsiti. 17Adan awlanəni, azuliyaŋ sənənka, ɗii meɓɓet aɗɗaŋgək kuzuŋ. 18Zezu adeke, apelsitke, amna: Gakdak pak məpsuwi disiŋ də dəlva fuŋ pakə. 19Vi vaski məduwaŋ, azet ɗii pak məkpaŋget dəsoŋ gən gewleɗ nawa məɗɗe sit baptem də iya na Affən də iya na Wətən də iya na Əmpəs Salala. 20Mərban sit dərmanən gən an məs nərban sukum pakə. Wanəsaw də munokum pay pak ha wəgrak na dəlva.

Currently Selected:

Matiye 28: GDRNT85

Highlight

Copy