Matiye 17

Zezu akpaŋganək zəni

(Markus 9.2-13 / Luka 9.28-36)

1Dərɓaga wuvoŋ slire, Zezu agəmək Piyer də Zak gəm Zaŋ an məlmən Zak, akek aka gərəm zezeke, ndəɗaŋ katirgiti. 2Gəɓa zən akpaŋgək ama hereti. Haran tay wiɗ va paya, lukut nan akpaŋgək babar kaɗɗak kaɗɗak, uwiɗ va təki babara. 3Yaŋ gewleɗ hoku nek awlanənək Moyis də Eliyas tahəŋ wəpel də Zezu. 4Piyer apsən Zezu na: Ɗəfdaya mogoni məsam gən aŋka. An kəŋgəlka, wanəgəɗ gizlirkeɗe hoku, taka suko, taka sən Moyis, taka sən Eliyas. 5Yaŋ dəɓəl wəbay ma wəpel nan ɓa, yaŋ slay buwən məzu wiɗ adeke, asiritike, ɓaɓəlma adek sədəv slay buwən naka, amna: Aŋki wətu an nəŋgələ, əntatə neken zu dəndən sawɓa. Məpprəm mani. 6Adan gewleɗ apprəməni, geslne armeke, akdukoŋgək ha mirbisit afuŋ ne'i. 7Zezu azarka zeti, arəŋgitke, amna: Məsili, kəgeslne'eŋ ɓa. 8Aslanənək hereti, dulaŋ ɗəf ko taka ɓa. Say Zezu katər gəni.

9Adan adapirkeŋ səka gərma, Zezu abayək meti: Kədawnah sənən ɗəf ɓa say gap an Wətən Ɗəf* asilik səkəti əmta. 10Yaŋ gewleɗ assohonəni. Vi mi məsənaŋ zəga na ma henziŋ adawnahaŋ na say Eliyas dədegən dabəŋ tagay di? 11Azlan sitik na: Gesiŋ Eliyas wade dabəŋ, də zaɓet gin zigeɗ pakə. 12Naw əntatə nah sukum: Eliyas adek səkay, ɗii də sənən ɓa, aɗɗaŋ sənənək an aŋglaŋ, waɗɗaŋ sənən Wətən Ɗəf vaska'a.

13Gewleɗ apprəmanənək na wənna Zaŋ məgəɗ baptem adawpele.

Va Zezu ambəl gən wiyən mətemin

(Markus 9.14-29 / Luka 9.37-43)

14Adan agapaŋ aweleŋgit ɗiiyi, ɗəf adek aza Zezu, akduko abani, 15amna: Aw Ɗəfdaya awlu də wətuwəŋka. Tay də gbəgba' na gamba, tay zəm gən saha sawɓa. 16Nəki sitik gewleɗ noko, amma də ɓapən wəmbəl gənən ɓa. 17Zezu amna: Awlet kana munokum məs wətaf nokum tay diiɗa ɓa, məs mambrayɗe, pay gbəgbari nənzi də munokum kpak di? Məkki su wiyən vani. 18Zezu anahsənək witem də gurom ləŋgə, agil səka winəŋka! Agilke ambələk daska'a ləŋgə.

19Dərɓagani gewleɗ na Zezu azoŋko zan ketirgiti, assohonənka: Vi mi məɓap wəgil gən tuyaŋ ɓa di? 20Zezu azlan sitik na: Vi wətaf nokum gəssi. Gesiŋ nədawnah sukum: Va munokum tat də wətaf suɗike va wəlaŋ sita, wakənahaŋ sənən gərməŋka azar saŋka, dok ada, nəsənka wazarə, zəga tay də daw day kikum ɓa. 21[Amma zev tuya nani awgilyan ɗarɗar ɓa say duzuliya gəm də wəse meme.]

Zezu arbanək əmta nan ma sula'ən də wəsilya sətəki əmta

(Markus 9.30-32 / Luka 9.43-45)

22Pay mbərən gewleɗ na Zezu akalaŋgək pak aka dələv na Galile. Apsit na: Wapsənən Wətən Ɗəf* avet ɗiiyi. 23Wabay nəni, amma pay ma hokoni wasil səki əmta. Adan gewleɗ apprəmnən vaska aɗəkaŋgək sawɓa.

Wən na faɗ zomorgol na dəv gəla metiŋ naw zuliya*

24Yaŋ Zezu dit gewleɗ nan agapaŋ a Kafarnahum, mətafaŋ zomorgol na dəv gəla metiŋ naw zuliya azaraŋka za Piyer, assohonənka: Məsən zəga nokuməŋ afaɗ na zomorgol nadəv gəla metiŋ naw zuliya ɓa sa? 25Piyer azlan sit na: Wafaɗa. Pay Piyer adawtoŋ adəv gəla, Zezu apel sənək dabəŋ amna: Mbari kəɗum di Simoŋ? Mədəŋgaŋ məfaɗaŋ zomorgol di walla deleɗ na mekeleŋ sit milyeŋge na duniyaŋ di? Ɗii na dələv nan sa, walla melekeɗi? 26Piyer azlan sən na: Melekeɗi dədawfaɗaŋ. Zezu amna an vaski na ɗii na dələv afaɗaŋ na ɓa. 27Amma vi mədawdan sit gidivit ɓa, doko pe'e, asgan teklem nok eret iŋkile, kilif an kədarma dabəŋ pak agəma, aha' mani wakəra deleɗ na təbəs amani, agime kəfaɗ gən zomorgol naw də an nok pakə.

Currently Selected:

Matiye 17: GDRNT85

Highlight

Copy