Matiye 13

Wən məkpaŋga na məzəslga

(Markus 4.1-9 / Luka 8.4-8)

1Yaŋ pay nani, Zezu agilik siŋgili, ambat kəsan ama busgum na pe'e' vi kawpel sit ɗiiyi. 2Ɗii diiɗa azoŋko zani. Vi ni atoŋ adəv bəlay, asanka daka, ɗii tam aziweŋke ma busgum na pe'e. 3Arban sitik zəgeɗ diiɗa də wən məkpaŋga. Amna:

Məzənse ambatka gulyo, vi kaw ndol haya. 4Adan adaw ndolni, zemve maɓɓan abətək aka tive, biŋgeɗ azoŋko ayaɗ nənka. 5Zemve maɓɓan abətək aka soyomo, dələv taya kan ɓa. Go'ləŋgə agilke, vi dələv taya mban ɓa. 6Adan pay agili, azlaka, aɓətka, vi dərah təki nampa suwerin ɓa. 7Zemve maɓɓan abətka adəv hogoy, aɓayaŋgək dəndən pakə, azəm gənək saha. 8Amma zemve maɓɓan abətək kəmpa aka ba'arə, atərək wəraya aɗika. Maɓɓan aɗiyək səkatə maɓɓan kaklaw slire maɓɓan kaklaw hoku. 9Yaŋ Zezu anah sit əmpana: Ɗəf an məs də sləman pak dəpprəma.

Vi mi Zezu adawpel də wən məkpaŋga di?

(Markus 4.10-12 / Luka 8.9-10)

10Dərɓaga aska, gewleɗ na Zezu azoŋko zani, assohonənka: Vi mi kədawpel sit ɗii də wən məkpaŋga di? 11Azlan sitik na: Munokum kərəhaŋgək wəsən wən məɗama na məlĩ na Maŋgəlva, amma neti dərəhaŋ ɓa. 12Vi mərah zəga warah diiɗa, amma məs saha wazan an suɗike nani. 13Vi aski nədawpel sit də wən məkpaŋga. Vi tahəŋ wəziyən hereti awlaŋ ɓa. Tahəŋ wəpakən sləmeti, amma apprəmaŋ ɓa awsənən ɓa. 14Vaski an məs kleŋ Ezay anahə, gesiŋgi azeti amna:

Wakəpprəmənən də sləmokum, amma kəsənən na ɓa.

Wakəziyən horokum, amma kulaŋ na zəga ɓa.

15Yaŋ mekret ɗiiyeŋ akpaŋgək dərwa,

asukunək slimeti, atipinik hereti vi adawlaŋ,

ada apprəmaŋ ɓa, adawsənən ɓa,

vi vaski atubiyaŋ na ɓa, naw bo nərah na wəmbəlgit ɓa.

16Amma munokum zəzay azokum vi horokum tay ula, sləmokum tayəpprəma. 17Əntatə nah sukum gesiŋ: Məs kleŋɗe dit ɗii na Maŋgəlva diiɗa, aŋglaŋ ulanən an kədawlaŋ amma dulanən ɓa. Aŋglaŋ wəpprəmənən an kədapprəmaŋ amma dəpprəmnən ɓa.

Zezu agilgənək kotak na wən məkpaŋga naslga naka

(Markus 4.13-20 / Luka 8.11-15)

18Məpprəm an məs wən məkpaŋga nak anahə. 19Ɗii meɓɓet wapprəmnən halabara na məlĩ na Maŋgəlva amma asənən na ɓa. Net tahəŋ va zemve an də bət aka tive, vi ɗəf mbrayen wade wagəm an də bət a mekreti. 20Ɗii meɓɓet tahəŋ va zemve an də bət aka soyomo. Net an apprəmənək wənna Maŋgəlva, wataf nən go'u də zit neki. 21Amma suwerit tay ɓa. Wasoŋ gap suɗike, amma an wən tattuwãh də wərma mama asilke zeti vi wənna Maŋgəlva, wapanən wətaf net go'ləŋgə. 22Ɗii meɓɓet tahəŋ va zemve an də bət awalaŋ hogoy. Net an apprəmənək wənna Maŋgəlva əŋgla na zəga na duniya də wərak na arya wazəm gən saha na wən ana mekreti, wən van anzlər na ɓa. 23Amma ɗii meɓɓet tahəŋ va zemve an də bət aka ba'arə. Net an apprəmənək wənna Maŋgəlva, wasənəni, watər wəriya maɓɓan waɗi səkatə, maɓɓan waɗi kaklaw slire, maɓɓan kaklaw hoku.

Bergezleŋ ara haya

24Yaŋ Zezu apel də wən məkpaŋga maɓɓani, amna: Məlĩ na Maŋgəlva tay va ɗəf dəslga hay agulyo nanda. 25Dəffəɗ nani, ɗii pak aleŋgeŋke məzu zelin adeke, aslgek bergezleŋɗe ambatka. 26Yaŋ hay agili, aɓayka, apokko, bergezleŋɗe bo arbanənək ziti. 27Məɗɗaŋ wəza ana affən guli da azoŋko, anahaŋ sənən affən guli na: Ɗəfdaya: Hayi kəslgə a gulyo nok daŋ kaaka ɓa sa? Ya mədəki bergezleŋɗe aran əmpa di? 28Apsit na: Məzu zelu dəslge. Məɗɗaŋ wəza assohonənka: An vaski na kəŋgələk məptiwi gin sa? 29Azlansitike: Awwo, vi an munokum tatəptiwini akəptuwən hay dənɗaŋ. 30Məpet sulegit pak dəsɓaŋ ha gap pay naw bəla. Pay nani wanənah sit məzu bəlaŋ na: Miinet bergezleŋɗe, məzle də offo. Amma haya məkalan su a maha.

Wən məkpaŋga na zemve na sita

(Markus 3.30-32 / Luka 13.18-19)

31Zezu apel sitik də wən məkpaŋga maɓɓani, amna: Məlĩ na Maŋgəlva tay va zemve na sita naka dələv maɓɓani. Ɗəf agəm tək aslgətək adəv guli nani. 32Tədayək kiyit zemveɗe pak də wəgəsa, amma an təgilke, watəday kiyit gaslembeɗ pak də wəɓaya, watəkpaŋ wəlaŋga, ha biŋgeɗ wazoŋ wazaɓɓaŋ gəla net akani.

Wən məkpaŋga na wuɗo

(Luka 13.20-21)

33Zezu apel sitik də wən məkpaŋga maɓɓan əmpa, amna: Məlĩ na Maŋgəlva agilik va wuɗo guluk təndək gəpa məslan tasaw hoku təslahanək dəndən, gəpa pak ahəska.

Va Zezu agəɗ wəza də wən məkpaŋga

(Markus 4.33-34)

34Yaŋ zigeɗ pak Zezu anah sit ɗii də wən məkpaŋga, dəpel sit ko mi ɓa, say də wən məkpaŋga, 35vi an məs kleŋ Ezay anah dəsan gən gesiŋ. Amna:

Nənah sitik də wən məkpaŋga,

nərbet sitik zigeɗ an məɗemit far far laŋka, daga məɗɗani duniya ɓa.

An wən məkpaŋga net bergezleŋɗe aŋgələ naha

36Adan Zezu apet ɗiiyi, atoŋko eŋgili. Gewleɗ nan azoŋko zani apsənən na: Arban səm wənna bergezleŋɗe ara hayiŋki. 37Anahsitike: Məs dəslga haya, ndəni Wətən Ɗəffa*. 38Duniyayi gulyo, ɗii na məlĩ na Maŋgəlva ndəɗaŋgə haya, bergezleŋɗe ndəɗaŋgə məzəsbanən ɗəf mbrayen. 39Məzu zel dəslge ndəni Satan, pay naw bəla, ndəni pay wəgrak dəlva, məzu bəlaŋ bo maslayɗeŋ. 40Va adaynetin bergezleŋɗe kasgət aka offo vaski adaɗɗa pay wəgrak dəlva. 41Wətən Ɗəf waslən maslayɗe nani, wagilgitin məs mambrayɗe pak sədəv məlĩ na Maŋgəlva, 42wasgetin akoffo. Wahəmmaŋ adaka, wampəranən slayti. 43Amma pay nani məzu ɓe'eŋ sən Maŋgəlva wawiɗeŋ va paya, adəv məlĩ na Affiti. Ɗəf məs də sləman pak dəpprəma.

Wən məkpaŋga na arya məɗamani gəm averzle

44Məlĩ na Maŋgəlva agilik va arya məɗaman adəv gulyo. Ɗəf arəhəka, aɗamanək əmpa, zən annekək diiɗa, ambatka, avələk zəga nan pak vi kalbəh guli nani.

Wən məkpaŋga na averzle

45Məlĩ na Maŋgəlva agilik va məgəɗ terere məkay averzleɗ mogeti. 46Adan arəh averzle mogon diiɗa, ambatkə vəl zəga nan pak vi kalbəhən.

Wən məkpaŋga na zəva

47Əmpa, məlĩ na Maŋgəlva agilik va zəva mərmaŋ kilfi asganənək a pe'e, warma zemvit zigeɗ temtem pakə. 48An aknahka, wakdə nən ama busgum, an agilgitinik kilfi. Kilif mogeti waɗiyən adəv kekel neti, amma kilif an mogetiŋ ɓa, kaw ndolti aret iŋkile. 49Vaski adaɗɗa pay wəgrak dəlva. Maslayɗe wazoŋ wagohotin moget dit mbrayti. 50Kawndol ɗii mambrayɗe akoffo. Wahəmmaŋ adak də wəmpəran slayti.

Zigeɗ məsvet dit meleketeti

51Zezu assohotik gewleɗ nani. Kəpprəmənək zigeɗis pak sa? Azlansənənka məpprəməka. 52Yaŋ Zezu anah sit na: Vi vaski ko naway məsən zəga na ma henziŋ məzu ɓesən məlĩ na Maŋgəlva, agilik va affən gəla, məzu gilgit zigeɗ meleketeti gəm zigeɗ məsvet səki wəzaɓ zəga nani.

Ɗii na Nazaret dətaf nən Zezu ɓa

(Markus 6.1-6 / Luka 4.16-30)

53Adan Zezu agrak wəpel sit ɗii də wən məkpaŋga, asilik səkəti nani, 54ambatka awalaŋ gəla atəki aɓayə. Atəŋgək wərban wən sit ɗii adəv gəla nawpel wənnet Yahudiyenɗe. Ɗii nadak pak agətaŋka, aɓɗaŋ na: Səŋga arəh wəsən an vaŋ di? Mbari adawɓap wəɗɗa sokeneɗ vaŋ di? 55Ndəni wətən məntar wəlaŋga ɓa sa? Mari təman ɓa sa? Ya Zak də Zozef, Simoŋ gəm Zuda əŋgə milmiŋgiɗin ɓa sa? 56Milmiŋgiɗin məguliŋgit təŋhəŋ də mənaməŋ ɓa sa? Səŋga arəh sembe vaŋ di? 57As atakik dətafni. Yaŋ Zezu anah sit na: Wagakdakanən məs kleŋ ko aŋga pakə, amma awalaŋ gəla nani aweleŋgit ɗii nani kaw gakdakani ɓa. 58Zezu agəɗək sokeneɗ adak suɗike kaaka'ə, vi dətafnən ɓa.

Currently Selected:

Matiye 13: GDRNT85

Highlight

Copy