Luka 11

Zezu tayərban wəzuliya

(Matiye 6.9-13; 7.7-11)

1Yaŋ pay maɓɓani Zezu tay zuli atəki maɓɓani. Adan agrak wəzuliya, ɗəf taka səmbet gewleɗ nan apsən na: Ɗəfdaya arban səm wəzuliya va Zaŋ arban sit gewleɗ nani. 2Apsit na: An munokum tatə zuliyaŋ na mənah na:

Aw Affən, salala* kənani,

aɗɗa ko naway pak də gakdakan gən iya noko.

Arban səm məlĩ noko.

3Apsəm zəga nawzəm nawtər səm wəray nam pay pakə.

4Aviyan səm mambray namə,

vi nam van bo mənam tatə viyan mambray net

ɗii məzaɗɗaŋ səmən mbrayen pakə.

Ataɗmə vi Satan ada mbəɗamə, kapan wətaf nam ɓa.

5Zezu apsit əmpa na: An ɗəf səmbokum tay dəbay nani, ambatək azani tətaŋ dəfɗa vi kawnah sən na: Baynawa avay moŋgosokɗe hoku. 6Vi ɗəf taka səmbet bayneŋgiɗu adek səmalaka, taya naw da, zəga tay nədapsən ɓa. 7Yaŋ baynan nak azlan səna: Kədaw yaw kakaŋ kəmpa ɓa, ma giziŋ pak məmpani, mənam dit kirtu pak məvoŋgum mənani, nəɓapna wəsilyaw vi kapsuk moŋgosokɗe ɓa. 8Yaŋ naw əntatə nah sukum, kuzuŋ ko an asilik vi kapsəni na vi baynani ɓa, amma wasili wapsəni gap tər wəray nani vi akiyək man də wəssohoni. 9Intatə nah sukum: Məssohu, wakərəhaŋ. Məkayani wakərəhəni. Məsɗə eŋgili kawkol sukumi. 10Vi ko naway dəssohu, warahə. Ko naway də kayanni warəha. Ko naway dəsɗə eŋgili kakol səni. 11Naway səmbokum an wətən assohonək kilif na wapsən doho di? 12Walla an assohuk ɗeŋzle na wapsən hərziya sa? 13Munokum mbraykum kəsənənək wəpsit zigeɗ moget sit kirtukum. Mbari kan Affukum na disiŋ dərəŋ kan aday na dapsit Əmpəs Salala* sit ɗii məzə sohonən ɓa sa?

Va Zezu azlansit məs kotorokɗe nani

(Matiye 12.22-30 / Markus 3.20-27)

14Zezu agil gənək tuya məs məkpaŋgan ɗəf goryom. Adan tuya nan agili, ɗəf nan apelke, ɗii pak agətaŋka. 15Amma ɗii meɓɓet aɓɗaŋ na: Məlĩ net tuyeŋɗe dədapsən sembe narɓehet tuyeŋɗe. 16Ɗii meɓɓet bo aŋglaŋ wəmbəɗanəni, vi vaski assohonəni. Agəɗ sit sokene vi də sənən gən na Maŋgəlva də slənko. 17Adan Zezu asən wəɗum neti, apsit na: An ɗii nadəv dələv awɗakaŋka, tahəŋ wəgayaŋ awalaŋ ziti, məlĩ na dələv nan wazə, gəla waɓəsl aka gəla. 18An Satan agayək də maɓɓani, mbari məlĩ nan adawsan əmpa di? Munokum tatə nahaŋ na də sembe na Belzebul nədarɓi tuyeŋɗe. 19Ya an əntat wərɓi tuyeŋɗe də sembe na Belzebul, ya də sembe na mi kirtukum tam adarɓihin di? Vi vaski kirtukum arbanənək wən nokum munokum tat də goŋga ɓa? 20Amma an də sembe na Maŋgəlva nədarɓi tuyeŋɗena, asna tayərban na məlĩ na Maŋgəlva adek azokum.

21An ɗəf gurom azaɓanək zən də zəga naw gaya, tay ga gəla nani, zəga nan pak wasan zamə. 22Amma an məday kiyən sembe adeke waday kiyən, wataf zəga naw gay nani məs adawsan viyən naka, wawɗakan arya nan məs ataf də guroməŋka.

23Ɗəf məs tay də inɓa məzuzel wi. Ɗəffan məza abaah su wəkkal ɓa watərayə.

Wəmilyo na tuya

(Matiye 12.43-45)

24An tuya agilik səka ɗəffa, wabbal awra wəkay təki naffete*, an dərah ɓa, asna wanah na: Wanəmil adəv gəla naw məs nəgil sədəvən naka. 25An amilik adəvən, warəh məfaɗəni, məzaɓani. 26Asna wambatə, waki tuyeŋɗe meɓɓet buhul, mbreyit dayki an madabəŋ, wasoŋ adəv gəla nani. Wəsuwa na ɗəf nan wasan tuwãh dayki an dabəŋ.

Zəzay an təstəssə

27Adan Zezu adawpel vaska, guluk təslanək wəlat aweleŋgit ɗiiyi təmna: Zəzay azat guluk akən tuwəko də bide nat an kəwaɗə. 28Amma nan amna: Zəzay azet məzəpprəmaŋ wənna Maŋgəlva, məzər manən wənnani.

Məssohoŋ sokene

(Matiye 12.38-42)

29Yaŋ ɗii diiɗa akkalaŋ amaŋgava Zezu, atəŋgək wəpele: Ɗiiyen kakaŋ kiŋki, mbreyitiŋ, tahəŋ wəssohoŋ sokene. Amma arəhaŋ na ɓa, say sokene na məs kleŋ Zonas. 30Vi va Zonas asan sokene azet ɗii na Niniwe, vaski Wətən Ɗəf* ada kpaŋ azet ɗiiyen kakaŋka. 31Məlyaŋgək naka dələv na dohoŋ, watəsil də kita bet ɗiiyen kakaŋka kawtaw kita aketi pay nagrak dəlva, tədek sə faraɗa vi kapprəm wən səma Salmoŋ məs məzu gilyan də wəsən diiɗa. Yaŋ məs dədayki Salmoŋ tayaŋka. 32Pay wəgrak dəlva ɗii na Niniwe wasilyoŋ abet ɗiiyen kakaŋka kawtaw kita keti, vi ɗii na Niniwe atubiyaŋgək adan apprəmən wənna Zonas. Yaŋ məs dədayki Zonas də daya bo tayaŋka.

Təki babar gəba zə ɗəffa

(Matiye 5.15; 6.22-23)

33Ɗəf tay nasɗa offo adəv pitirla, kaw məsa uɗamani walla kaw ɗup hiliw akan ɓa, amma waɗi atəki naw kekeɓe na pitirla, vi ɗii nawtoŋgoŋ pak dulaŋ gən təki abeti. 34Horok tay va pitirla na zuko. An horok tay mogoni, zuk pak wasan va naw kekeɓe'e. Amma an horok tay mogon ɓa, zuk pak wasan ara guzliyo. 35Ya ataɗ zuko vi zukuŋ adakpaŋ ara guzli ɓa. 36An zuk pak tay vana kekeɓe'e, an zuk tay dəpəl ara guzli ɓa, zuk pak taya kəti naw kekeɓe'e, asna tay va pitirla adaw kekeɓe təki nani.

Zezu tay hayet Farisiyenɗe* dit məsənaŋ zəga na ma henziŋ

(Matiye 23.1-36 / Markus 12.38-40)

37Adan Zezu agrak wəpele, Farisiyen maɓɓan ayak Zezu dəzəm gən annanda, Zezu atoŋko, atəŋgək wəzəma. 38Adan Farisiyen nak awla Zezu dawzəm məzawɗa van ɓa, agətka. 39Ɗəfdaya apsəna: Munokum Farisiyenɗe, munokum tatə ɗanən zəga naw saa zəga nokum də hiliw nawzəm zəga, amma amokrokum aknahək də wəkay mama gəm də mambraya. 40Ɗii Məza maɗulet tay ɓa, Maŋgəlva məs dəɗɗa gəɓani aɗɗana gədəvən ɓa sa? 41Məpsit məzurayɗe ana dəv zəga naw saa zəga nokum də na dəv hiliw nokum, asna zigeɗ pak wasoŋ sukumən mogeti.

42Amma wakpaŋ sukum bonoy munokum Farisiyenɗe, vi munokum tatə gəmnən məklaw net teɓ na minti dit teɓ naguli nawzəm nokum pakə, munokum tatə panən təstəssə gəm wəŋgla na Maŋgəlva ndəni an dəslə narma, amma kəl zeletin meɓɓet ɓa.

43Wakpaŋ azokum bonoy, munokum Farisiyenɗe, vi kəŋglaŋgək təki nasso ana bet ɗiiyi adəv gəla nawpel wənnet Yahudiyenɗe, kəŋglaŋgək bo dəsɗo kumən gən a lumiɗi. 44Wakpaŋ azokum bonoy, vi munokum tat va magamasɗe məza awlaŋ ɓa tahəŋ wədawaŋ dəketi məza aw sənaŋ ɓa.

45Yaŋ ɗəf taka səmbet məsənaŋ zəga na ma henziŋ apeli, apsəna: Mərbə zəga, məs kədawnahəŋ na annam kədawra.

46Zezu azlanka: Wakpaŋ azokum bonoy munokum mərbaŋ zəga na ma henziŋ. Munokum tatə slanən zəga gakdak sit ɗiiyi nokum kabaahaŋ sitin wəslan ko də mətəl va ɗəf ɓa. 47Wakpaŋ azokum bonoy, vi munokum tat ərkanən magamas net məs kleŋɗe məs dəhiŋgiɗkum abayaŋ. 48Vaski bo, saydawa nokum tayərban zən na kə slereŋgək də wəza net dəhiŋgiɗkum abeyinək məs kleŋɗe, munokum tatərkanən magamas neti. 49Wəsən na Maŋgəlva amna: Waməslin məs kleŋɗe dit masləŋɗe, wabeyin meɓɓeti, wazəm gitin saha a net meɓɓeti. 50Bonoy adawgəɗsit ɗiiyen kakaŋka, vi abayinik məs kleŋɗe daga wətəŋ na dəlva fuŋ. 51Daga wəbay na məs kleŋ Abel, ha məs kleŋ Zakari məbayən akawalaŋ təki salala də təki nawtaw wəla zəga. Vaski nədaw nah sukum, ɗiiyen kakaŋ kiŋki, kita armeke vi gəbayɗe abayaŋgiŋki.

52Wakpaŋ bonoy azokum munokum məsənaŋ zəga na ma henziŋ, vi kəgəmənək lakle naw səna, munokum sən kikum bo kətoŋgoŋ ɓa ɗiiyen dəŋglaŋ wətoŋgoŋ bo ya kəppetin dətoŋgoŋ gən ɓa.

53Yaŋ agil sədaka, məsənaŋ zəga na ma henziŋ dit Farisiyenɗe*, asbanənək də wənna, assohonənək aka wənnet zigeɗ diiɗa. 54Aziyənək zit azani vi kapprəm wənɗe mbreyit səmani vi ka wəliyən dəka wəneti.

Currently Selected:

Luka 11: GDRNT85

Highlight

Copy