Wəza net Masləŋɗe 24

Yahudiyenɗe awəliyənək Pol

1Wəvoŋ sle dərɓagan ləŋgə, Ananiyas daya net məs dəlveŋge agapək a Kaysariya, adek dit ɗii gugiriɗ meɓɓeti, gəm Tertullus məs dəsən kita na dawka net ɗii na Roma. Yaskan agapaŋ aba governer Felikus, awəliyən Pol. 2Adan ayanəni, Tertullus atəŋgək uwəliyən:

Aw Felikus ɗəf metiŋ, vi wənna gakdak noki məsam zamə, dələv nam pak mogoni vi wəsən noko. 3As pak səzok mərəha, məgəɗ sukuk soko sawɓa. 4Nəgap nawpel suk kpotok kpotok ɓa, amma nəkomokuko də ula saha noko, əŋga apprəm səm wənnan suɗike ɗa. 5Mulak na ɗəffəŋ ɗəf mbrayni sawɓa, tay sil gən wənnaw ɓoŋgit ɗii aweleŋgit Yahudiyenɗe də mamba dələv pakə. Ndeni məlĩ net ɗii məɓoŋgit na Nazaret. 6Yas bo atəŋ kawray gən gəla metiŋ naw zuliya*, yaŋ kan mərma. [Məŋgəl kətana kawtaw kita akan va ma henziŋ namə. 7Amma yas Lisiyas daya net sozeɗ ade mohən səvam də sembe. 8Yas kan Lisiyas van apsit tive sit ɗii məs dəwəliyən dəzoŋ gən aboko.] An kəməsək wəssohon na, wakəsən na, an məs məwəliyən akan na gesiŋgi. 9Yahudiyenɗe pak aɓɗaŋ na: An məs Tertullus anahəs pak gesiŋgi.

Pol apelik wənna koh gən zən aba Felikus

10Governer apsənək tive sən Pol dəpel gəni. Yaŋ Pol amna: Nəsənka wəsva diiɗa istatə taw kita naka dəlvəŋka, ndəni zu annek narban wənnaw aboko. 11Dədayiki wəvoŋ klaw kiyən sula nəmbat a Zerusalem vi kawzuli sən Maŋgəlva ɓa, an kəssohonək wənnan na wakərəh vaska. 12Ɗəf tay dərəhu ɗaah adəv gəla metiŋ na zuli wəbay ma ɓa, walla məzu ɓoŋgit ɗii adivit gəleɗe nawpel wənnet ɓa, walla awalaŋ gəla net ɓa. 13Ɗəf tay səmbet naw ɓap wəkpaŋgan wən məwəliyu akan ka goŋga ɓa. 14Amma apprəm an məs nədawnah sukkana: Intatə zuli sən Maŋgəlva net dəhiŋgiɗwa, də wəsban wənnan məs adawnahaŋ na: Wəɓoŋgit ɗiiyi. Amma naw bo əntatəsban ma henziŋ na Moyis də ɗerewel net məs kleŋɗe pakə. 15Naw bo nətafək gesiŋ Maŋgəlva wasil git ɗii mogeti dit ɗii mbreyit pak sətəki əmta, va net bo atafən wənnani. 16Ndəni naw bo nədawgay nəsaw gən təstəs aba Maŋgəlva də abet ɗii pakə.

17Dərɓaga wəbal naw a Zerusalem wəsva suɗike, nəmilik adaka dawke deleɗ na baah sit ɗii naw məs məbaahsiti, nəgəɗ gən sazlaga aba Maŋgəlva. 18Daga nədaɗɗani, arəh wənka adəv gəla metiŋ naw zuliya, arəh wənək bo dərɓaga nəgrak wənna wəskoɓ ki zuwa, ɗii tahəŋ ɓa, geŋgere bo tay ɓa. 19Amma Yahudiyenɗe meɓɓet daga səka dələv na Asiya tahəŋ adaka. Net bo wazoŋ aboko, an tahəŋ də wənna wəliwa. 20Walla ɗii vetiŋ annəhənək mambray mi nəgəɗ gala akuwən abet ɗii gugiriɗ pay akkalaŋgəŋ kandi! 21Vi wən takayi məs nənah daga məku abeti, nənahək na: Kətawən kita akaw na vi nətaf wənna wəsilyo sətəki əmta sa?

22Yaŋ Felikus bo asənək tive net kretiyenɗe, apsit na: An Lisiyas daya net sozeɗ adek na, wamətaw kita nani, yas kan anah na mətrayə. 23Aɗiyək wənnan sən daya məs dədawga Pol də ga gən lewlewi, amma adawzəm gənən saha ɓa, dəppetin gin bayneŋgiɗin bo dəzoŋ gən azani də wəbaah səni.

Pol apel sitik may Felikus dət Durusilla

24Dərɓagan pay suɗike ləŋgə, Felikus adek dət ɗak nan Durusilla, nat Yahudiyenəktə. Ayak Pol vi kapprəm məs adawpel aka wənna wətaf Zezu Krestu. 25Amma adan Pol atəŋ wəpel aka wəɗɗa mogoni də wərma zuk səza mambraya, də wənna kita pay wəgrak dəlva, geslne adak Felikus, amna: Kakaŋ na məkki kana. An nərahək va na wanəyuk əmpa. 26Azana Pol wapsən deleɗi ndəni adawyan ɗayɗayə, kasga meŋ.

27Səza wəsva sula atoŋgu, Porkiyus Festus adəɗək Felikus. Amma vi Felikus aŋgəl wənneken zit Yahudiyenɗe vini dəppan Pol sə daŋgay ɓa.

Currently Selected:

Wəza net Masləŋɗe 24: GDRNT85

Highlight

Copy