Wəza net Masləŋɗe 22

1Yo ɗii gugiriɗe dit geleŋgiɗwa! Məpprəmma, nənah sukum əntat də mambray ɓa. 2Adan apprəmən wəpel də ma Aramiya asoŋguk sləɓək dayki laŋka. Yaŋ Pol anah na:

3Naw Yahudiyen nani, məwəw a Tarsus dələv na Silikiya. Amma a Zerusalem aŋki nəɓayə, Gamaliyelli dərban su ɗerewel, arban suwək ma henziŋ net migilim kotakə. Nəsbanək Maŋgəlva də sembe va kədasbanən kakaŋka. 4Nəzəm gitik saha net ɗii məzəsbanən tive na Ɗəfdaya ha ɗii meɓɓet amtaŋka dəka wən an məs nəgəɗ siti nərmek zel dit gil pak nəkek a daŋgay. 5Daya net məs dəlveŋge dit ɗii gugiriɗ net Yahudiyenɗe pakə, asənənək an nədawpele goŋgayi. Avayaŋgək ɗerewelɗe məs avereŋ sitin Yahudiyenɗe na Damas. Vi nədawmbat adaka, vi karme ɗii na Maŋgəlva kaɓrukti kamilyaw dənɗaŋ a Zerusalem. Ɗii gugiriɗ dətawən gən kita aketi.

Pol arbanək va ataf Zezu

(Wəza net Masləŋɗe 9.1-19; 26.12-18)

6Adan nədadaw a Damas kana, gu'o nan aza wəgap adaka, tətaŋ payi, go'ləŋ təki babar adek sə disiŋ, akekeɓe wəka, asərət wəka. 7Nəsbərək afuŋ, nəpprəmək wəla ɗəf dawyuwa: Sol, Sol, vi mi kədaw kayan mamaw vaŋ di? 8Yaŋ nəssohoni: Nawa kənan di Ɗəfdaya? Apsu na: Əntə Zezu na Nazaret məs kədaw kayan mamani. 9Ɗii məs dədadoŋ də in awlanək təki babara, amma dəpprəmənən wəla ɗəf dawpel su ɓa. 10Nəssohonəka: Mi nədaɗɗa di Ɗəfdaya? Ɗəfdaya apsu na: Asil doko a Damas, adaki adawnah sukun an məs Maŋgəlva aŋgəl kəgəɗ gən pakə. 11Təki babar nan atipik harawa, ndəni kan ɗii məs dədadoŋ də in akdəwəni akuwən a Damas.

12Ɗəf taya daka iya nan na Ananiyas, ɗəf məzuli sən Maŋgəlvayi, tayəsban ma henziŋ namə. Yahudiyenɗe na Damas pak tahəŋ wəsa'ən wənnan sawɓa. 13Adek azawa, aziwik amaŋga vawa, apsu na: Sol, məlmuwa akolu! Gu'ləŋ haraw akolko. Intatulani. 14Ananiyas apsu na: Maŋgəlva net dəhiŋgiɗmə awelkuko vi kəsən gən wəŋgla nani, akula gawla nan lewlewi, akəpprəm an gawlaŋ tay pele. 15Vi wakərbani, wakənah sit ɗii an məs kuwəl pakə də an məs kəpprəmə. 16Mi kədaw ga kakaŋ di? Asil ataf baptem də iya na Ɗəfdaya mambray nok dəskoɓ gəni.

Ɗəfdaya aslənək Pol azet ɗii məza Yahudiyenɗeŋ ɓa

17Nəmilik a Zerusalem. Adan nədawzuli adəv gəla metiŋ naw zuliya*, Maŋgəlva arban suwək sokene. 18Yaŋ Ɗəfdaya adawpel su vaska, agəm zuk gu'u, agil sə Zerusalem vi ɗiiyiŋ atafən na an məs kədarban aka wənnaw ɓa. 19Nəzlan sənək na: Ɗəfdaya nəsənək gesiŋ nəmbatək adəv gəla nawpel wənnet Yahudiyenɗe, nərmek ɗii noko, nərgeke. 20Pay məbay Etiyen ɗəf məzərban wən noko, naw bo əntatadaka. Wən na əmta nan lewi azawa, əntə nəga lukutɗe net ɗii məs dədawbayəni. 21Ɗəfdaya apsu na: Doko, wanəslənuk faraɗa, azet ɗii məza Yahudiyenɗeŋ ɓa.

Pol taya ba daya net sozeɗi

22Ɗii aɓəsənək wəpel nani ha gap aza wənnet ɗii məza Yahudiyenɗeŋ ɓa. Amma adan apprəmən vaska, aɗɗaŋgək geŋgere, aɓɗaŋ na: Məgəma, məbaya! Kədapanən madaran ɓa. 23Tahəŋ wəɗiyaŋ geŋgere, tahəŋ wəsgetin lukutɗe net a disiŋ, tahəŋ wəndolun hologudum. 24Daya net Sozeɗ aɗi sitik wənnan sit ɗii nani dəkanən gən eŋgili, dəvərən gəni vi dəsənən gən wən məs Yahudiyenɗe aɗɗaŋ geŋgere vaŋkəŋ akanəŋka. 25Amma adan aɓrukun ka vərən, Pol apsən daya net sozeɗ ana dak na: Tive tay kəvər gən ɗəf na Roma məza mətawi kita akan tagay ɓa sa? 26Adan soze nak apprəm vaska, ambatək aza daya net naka, assohonəka: Mi kədaŋgəla wəɗɗaŋ di? Ɗəffəŋ ɗəf na Romayi! 27Yaŋ daya net sozeɗ ambat aza Pol, assohoni: Anah suɗa, ɗəf na Roma kənan gesiŋ sa? Pol azlan sənəka: Vaski ɗəf na Roma nani. 28Daya nak anah sənəka: Naw də deleɗ diiɗa nərah wəkpaŋ ɗəf na Roma. Pol azlan sənəka: Amma naw səza uwa naw məwəw ɗəf na Roma. 29Gu'ləŋ sozeɗ məs dədaŋglaŋ wəvərən vi dəpel gən goŋga nek apanənka. Daya net bo ageslneke, vi asənək na Pol ɗəf na Romayi. Yas bo aɓrukuk dit ngiyamɗe.

Pol tay pel abet ɗii gugiriɗ net Yahudiyenɗe

30Daya net sozeɗ manaka sənən kpak gesiŋ na Yahudiyenɗe awəliyən Pol na aka mi di. Vi wənnani, vit pumpum nani apəl ngiyamɗe səza Pol, anahsit ɗii gugiriɗ net məs dəlveŋge dit ɗii gugiriɗ net Yahudiyenɗe dəkkalaŋ genni, yas kan aki Pol aziw gən abeti.

Currently Selected:

Wəza net Masləŋɗe 22: GDRNT85

Highlight

Copy