Cenisihs 7
7
Ahki Kiinihkipacikaatek
1KaaTipencikenitc tahsh Noowa (Noah) okii'ikoon, “Poosin i'i kihci ciimaan, kahkina ko entahshiyan; kiin ohsha ehta kiwaapamin o'omaa misiwe ahkiink kwayahk eishihcikeyan enaahsamiiyaan. 2Niishwaahswewaan (7) tahsh #7.2 Payehkentaakosiwaatc: Miiwak hsa iki aya'aawihshak pisaan kaakii amontwaa, payehkentaakosihsikwaa tahsh wiin kiimanaa amwaawak. payehkentaakosiwaatc aya'aawihshak kika poosi'aak, ayaapeya'aak, noonsheya'aak itahsh kaye. Pehpeshikwewaan tahsh wiin ehta kika poosi'aak aya'aawihshak kaapehkentaakosihsikwaa, ayaapek, noonsheya'aak kewiinawaa. 3Kika poosi'aak tahsh kaye niishwaahswewaan (7) pinehshiinshak ishpimink kaapapaamihsewaatc, naapeya'aak, noonsheya'aak kaye, maano eyaantahswewaanakisiwaatc cini ayaawaatc cini ayaanihke nihtaawiki'itiwaatc o'omaa misiwe ahkiink. 4Niishwaahsokiishik (7) ishihsek niwii ishihcike cikimiwank ahkiink. Niimitana (40) tahso kiishik tahsh takimiwan, niimitana (40) tahso tipihk kaye. Wiinke hsa piko kahkina kekoon pemaatahk kaakii oshihtooyaan o'omaa ahkiink niwii nihshiwanaacihtoon,” okii'ikoon. 5Noowa tahsh kii‑ishihcike kahkina kekoon kaakii ishi anoonikotc kaaTipencikenitc.
6Noowa tahsh ninkotwaahswaahk (600) kiihtahso pipoonwe ahpii kiinihkipiinik ahki. 7#Mat 24.38,39; Luk 17.27. Kiihpoosi tahsh i'i kihci ciimaan, wiiwan kaye. Okosihsa' tahsh kaye kiihpoosiwa', wiiwini tahsh kaye aaniihsh kiiwii ani nihkipiini ahki. 8Ayaapeya'aa', noonsheya'aa' kaye entahswewaanakisinitc aya'aawihsha', pinehshiinsha', kahkina kaye kaapimootenitc ahkiink peyehkisinitc, peyehkisihsinik iko kaye 9okii wiici poosiimikoo' Noowa kihci ciimaanink, mayaa kaakii inanoohkiitc Kishemanitoo. 10Niishwaahsokiishik tahsh kaaishkwaa ishihsek mii 'i kaakii maacii nihkipiik ahki.
11 #
2Pe 3.6. Noowa (Noah) itahsh ninkotwaahswaahk (600) kiihtahso pipoonwe, niishokiisihsoon mitaahshiniishwaaso kiishik (17) eishihsenik. Mii 'i ahpii ehkiishikahk, nipi anaamahkamik kiionci moohkiciwan, ishpimink kaye kiipaahkishkaa, nipi ekii onci pankihsink. 12Kiihkimiwan tahsh o'omaa ahkiink niimitana (40) tahso kiishik, niimitana tahso tipihk kaye. 13I'i tahsh ahpii ehkiishikaninik Noowa, wiiwan kaye aasha i'imaa kiihpoosiwak kihci ciimaanink. Okosihsa' Shem (Shem), Hem (Ham), Cepat (Japheth), wiiwini kaye kiihpoosiwa' i'imaa. 14Aya'aawihshak kaye kaatahswewaanakisiwaatc, pishihkiwak kaatahswewaanakisiwaatc, kaapapaamootewaatc kaye mihtahkamik kaatahswewaanakisiwaatc. Pinehshiinshak kaye kaatahswewaanakisiwaatc kahkina hsa piko pinehshiinshak. 15Kii‑ishaawak kahkina ekiih poosiwaatc kihci ciimaanink kaakii ishi'ayaanitc Noowawan. Kiineniishiwak aya'aawihshak ekiih poosiwaatc. 16Kaakiih poosiwaatc tahsh kiiayaapewiwak, kiinoonsheya'aawiwak kaye. Kahkina hsa entahshiwaatc kiihpoosiwak Kishemanitoo aaniihsh okii'inaa' cipoosinitc. KaaTipenciketc tahsh akwaciink okii onci kipa'aan ishkwaantem.
17Niimitana tahso kiishik tahsh kiihtashi mooshka'an, piinihsh ekii ani kiishkaayawaak. Miitahsh i'i kihci ciimaan kaaishi aaposhka'akwantek i'imaa wakicipiik, ekiih saamihsihsinok mihtahkamik. 18Nipi tahsh piinihsh kiiani kiishkaayawaa misiwe ahkiink. Miitahsh kihci ciimaan kaakii ishi aaposhka'akwantek wakicipiik. 19Piinihsh itahsh kiiani nihkipii o'o ahki. Maawac hsa kaaishpatinaakin kihci waciin kiinihkipiiwan misiwe ahkiink. 20Wiinke piinihsh kiiani kiishkaayawaa, piinihsh niishtanashinaanomisit (25) ekiih paashicipiikin maawac eshpatinaakin kihci waciin. 21Kahkina tahsh kekoon kaakiih pimaatahk ahkiink kiinipoomakan. Kaatahshiwaatc pinehshiinshak, aya'aawihshak kaye, kahkina kaye pemaatisiwaatc. 22Kahkina tahsh kekoon kaakiih pimaatahk kaashi papaankohkamikaak, kaapakitanaamoomakahk kiinipoomakan. 23KaaTipenciketc kahkina kekoonini okii nihshiwanaacihtoon kaakiih pimaataninik. Pemaatisinitc, aya'aawihsha', kaapapaamootenitc, pinehshiinsha' kaye. Miiyehtako Noowa, i'i tahsh kaakii wiici poosiimikotc kaahpimaatisinitc. 24Ninkotwaahk naanimitana (150) tahso kiishik tahsh kiimooshka'an o'o ahki.
Currently Selected:
Cenisihs 7: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
