Cenisihs 40

Coosap Kiiwiintank Aaniin Enaapantaminitc Tahkonikana'

1Ninkotink itahsh iko e⁠ani ayishihsenik, kaa⁠naakacihtootc shoominaapo, a'a kaye okimaawi ciipaahkwewinini kaakiih kiishitepoonaatc kihciokimaan, okii maanaapamikowaan otookimaamiwaan kaakiih kihciokimaawinitc Iicipahkiink (Egypt). 2Peroo (Pharaoh) hsa wiinke okii nishki'ikoo' o'o niishin aanihkewikimaa', neyaanaakacihtoonitc shoominaapo, okimaawi ciipaahkwewininiwan itahsh kaye. 3Okii ishi pakitinaa' itahsh cishi kipa'omintc owaahkaa'ikaniniink tahkoniwewikimaan kaa⁠tipenimaanitc okanawencike' kipa'otiiwikamikonk. Mii hsa 'iwe peshikwan kaakii ishi kipa'omintc Coosapoon (Joseph). 4Tahkoniwewikimaa tahsh okii miinaan Coosapoon ci⁠naakaci'aanitc. Kinwesh itahsh i'imaa kii⁠ayaawa'.

5Minciniish itahsh i'i ininiwa', kaa⁠naakacihtoonitc shoominaapo, ciipaahkwewininiwan itahsh kaye kihciokimaan kaakiih tipenimikonitc, eh⁠kipa'omintc, kiih⁠pawaacikewa' peshikwan eh⁠tipihkaninik. Otinaapancikanini tahsh eshi pehpeshikonitc pepahkaan kii‑ishi nihsitohtaakwaniniwan. 6Keshepaawakaninik itahsh ahpii Coosap kaa⁠otihsaatc, okii waapamaa' wiinke e⁠mikoshkaatentaminitc. 7Okiih kakwecimaa' itahsh i'i aanihkewikimaa' kaakii anohkiihtawaanihpan Peroon kaakii wiici tahkonikoomaatc otookimaaman owaahkaa'ikaniniink, “Wekonen itahsh wenci maanentamowinaakosiyek?” ekii'inaatc. 8O'o tahsh okii'ikoo', “Minciniish ohsha ninkiih pawaacikemin, kaawiin itahsh awiya ayaahsii ke⁠wiintankipan eshihsininikin,” okii'ikoo'.

Coosap itahsh okii'inaa', “Kishemanitoo iitok ehta okashkihtoon ci⁠wiintank inaapancikanan eshihsininikin. Wiintamawihshik kipawaacikaniwaan,” okii'inaa'.

9Ini tahsh minihkwaakan kaakiih pimiwitoonitc okii wiintamaakoon aaniin kaa⁠inaapantaminitc ekii'ikotc, “Shoominaahtik ninkiih pawaanaa ekii waapamak inaahsamiiyaan. 10Kii⁠nihsinoon (3) iinsan watihkwanan i'imaa shoominaahtikonk. Ahpii tahsh iko iinsan e⁠ani maacii nohkatihkwanesitc, mii 'i kaa⁠ishi kiishipakiitc, shoominak ekiih kiishatihsowaatc. 11Kihciokimaa tahsh iinsan ninkiih tahkonamowaan ominihkwaakan; miitahsh iinsan kaa⁠ishi otaahpinimak shoomina' ekiih piinci siiskoopiikinimak i'imaa minihkwaakanik. Miitahsh kaa⁠ishi miinak i'i minihkwaakan,” okii'ikoon.

12Coosap itahsh okii'inaan, “Mii hsa 'owe eshihsink kitinaapancikan. Ini hsa nihsin watihkwanan kaakiih pawaataman, mii hsa 'i nihsokiishik. 13Nihsokiishik hsa ishihsenik Peroo kika pakitinik, ci⁠kiiwe ahsihk aaniin kaakii inanohkiiwatipan. Miinawaa tahsh kika miinaa kihciokimaa minihkwaakan, taapishkoo kaakii⁠nihtaa ishihcikeyampan kii⁠pimiwitooyan ominihkwaakan. 14Mihkwenimihshiihkan itahsh ahpii ani minohseyan, taka kayehpii minotootawihshiihkan ci⁠maamihkoomiyan ci⁠wiintamawatc Peroo, ci⁠saakisi'itc o'omaa kipa'otiiwikamikonk. 15Aaniihsh niin maano kakaancihc ninkii onci piinikoo Hiiparoowak (Hebrews) otahkiiwaank. O'omaa tahsh kaye kaawiin kekoon ninkii ishihcikehsii ci⁠kashkihtamaasoyaampaan ke⁠onci kipa'okooyaan,” okii'inaan.

16Ahpii tahsh a'a okimaawi ciipaahkwewinini e⁠noontank e⁠mino wiintenik eshihsininik otinaapancikanini ini kaa⁠pimiwitoonitc minihkwaakan, miihsh kaa'inaatc Coosapoon, “Keniin hsa ninkiih pawaacike. Nihtikwaaniink iinsan ninkiih pimiwitoonan nihsin (3) pahkweshikani mahkahkoon. 17I'iwe tahsh wakicaya'ii pahkweshikani mahkahk kaakii ayaak, kii⁠pepahkaanatinoon iinsan iniswehkwaanan Peroo ke⁠miicitc. Pinehshiinshak itahsh iinsan okii miicinaawaa i'i miicim i'imaa pahkweshikani mahkahkonk,” ekii ihkitotc.

18Coosap itahsh okii'inaan, “Mii hsa 'owe eshihsink kipawaacikan. Ini nihsin pahkweshikani mahkahkoon, mii hsa 'i nihsokiishik. 19Nihsokiishik hsa ishihsenik, Peroo kika pakitinik, ci⁠kiishkikweta'ohk. Mihtikonk itahsh oka akootoon kiwiiyawini, pinehshiinshak itahsh oka miicinaawaa kiwiiyawini,” okii'inaan.

20E⁠nihsokiishikwakaanik itahsh Peroo kiih⁠tipishkam. Okii wiihkwamaa' itahsh kahkina otanohkii'aakana'. Okiih pakitinaan itahsh ini minihkwaakan kaa⁠pimiwitoonitc, ini kaye okimaawi ciipaahkwewininiwan enaahsamiinitc kotak aanihkewikimaa'. 21Okiih kiiwe inahsaan itahsh ini kaa⁠pimiwitoonitc minihkwaakan kaakii inanohkiinihpan. Miinawaa tahsh okii miinaani minihkwaakanini Peroon oninciiniink. 22Okii akoonaan itahsh wiin ini okimaawi ciipaahkwewininiwan, taapishkoo Coosapoon kaakii inaanikopanen e⁠wiintamawaanitc eshihsininik opawaacikanini. 23A'a tahsh kaakiih pimiwitootc minihkwaakan, kaawiin kii⁠onci maamihkawihsii Coosapoon; mii 'i kaa⁠ishi waniihketc.

Currently Selected:

Cenisihs 40: OJBR

Highlight

Copy