Cenisihs 38
38
Coota shikwa Temaar
1I'i hsa ahpii Coota (Judah) okii nakanaa' wiicihkiweya' ekii anta wiicitaamaatc ininiwan Haaira (Hirah) eshinihkaasonitc wenciinitc weti ootenaank Aatalam (Adullam) ecikaatenik. 2Miihsh weti okii waapamaan ihkwewan Kenan (Canaan) ahkiink wenciinitc wetetenitc Shooa (Shua) eshinihkaasonitc. Miiwan itahsh ini kaawiiwitc ekii wiihpemaatc. 3Miihsh kaakii oniicaanihsinitc ekii nihtaawikinitc kwiiwisenhsan Ehr (Er) ekii ishinihkaanaawaatc. 4Miinawaa hsa kiihkikishkawaawahsowan ekii nihtaawikinitc kwiiwisenhsan Oonan (Onan) ekii ishinihkaanaawaatc. 5Keyaapi tahsh kiiani nihtaawikiwan kwiiwisenhsan, Shiila (Shelah) hsa okii ishinihkaanaawaan.
6Coota hsa tahsh okii ontinamawaan nihtam okosihsan Ehr eshinihkaasonitc, ihkwewan kewiiwinitc Temaar (Tamar) eshinihkaasonitc. 7A'a tahsh Ehr kiimaci'ishiwepisi. Kaawiin okii minwaapamikohsiin kaaTipencikenitc, miihsh kaakii nihsikotc. 8Miitahsh Coota kaakii'inaatc ini kotak okosihsan Oonan eshinihkaasonitc, “Maacaan awi wiihpemim kiicihkiwensi wiiwan citootawatc a'a ihkwe aaniin kekii ishihcike'ikohpan wiinimoon cini ayaawaatc apinoonciisha' keni nihtaawikinitc, kiicihkiwensi cini ayaanitc opiiwesiima'.” 9Oonan itahsh okii kihkentaan citipinawewisihsik i'i apinoonciisha' keni nihtaawikinitc. Miihsh entahsink ewiihpemaatc ini wiicihkiwensiwan wiiwini mihtahkamik ihsa kii‑ishi miinsii cinihtaawikihsinik wiicihkiwesiwan keni opiiwesiiminihpan. 10Kaawiin itahsh okii minwaapantansiini kaaTipencikenitc i'i kaakiih tootank, miihsh kewiin kaakii onci nihsikotc. 11Miitahsh Coota kaa'inaatc oshiimihsan Temaaran, “Maacaan kitete otaawinink awi ishitaan piinihsh cikiishaapewitc ninkosihs Shiila. Kiiwaacihkwenk ihsa ci‑ishi pimaatisiyan,” okii'inaan. Miihsh i'i Temaaran kaaishihcikenitc otetehkaank cishi kiiwenitc. O'o iitok kii‑inentam Coota, “Kewiin maawiin Shiila tanipo taapishkoo kaakii ishi niponitc wiicihkiweya'.”
12Kinwesh itahsh eani ishihsenik, Coota wiiwan wetetenitc Shooawan (Shua) kii‑ishkwaa pimaatisiwan. Ahpii itahsh kaaishkwaa maanentank weti Timnah (Timnah) ootenaank kii‑ishaa eshi manatoweshomintc maanahcaanihsha'. Ini hsa osaaki wiiciiwaakanan Haaira eshinihkaasonitc wenciinitc weti ootenaank Aatalam ecikaatenik okii wiiciiwikoon. 13Temaar itahsh kiiwiintamawaa, “Kishishehsh iinsan ishaa weti Timnah ootenaank eantawi manatoweshwaatc omaanahcaanihshima'.” 14Temaar ihsa tahsh okii kiihcikoshkaanan kiiwaacihkwewi kikishkikanan ekii meshkocihkonayetc. Miihsh kaaishi pihsihkank aakawiinkwe'on cikihkencikaniwihsik. I'imaahsh kii‑ishi onapi enishi piintikenk ootenaank Iineim (Enaim) ecikaatenik eyaanik enamoninik weti Timnah. Kaawiin iitok mahshi kiimiinaakaniwihsii ciwiitikemikotc Shiilawan.
15Ahpii tahsh Coota wayaapamaatc, “Pihshikwaacihkwe a'awe,” kii‑inentam, aaniihsh kiiaakawiinkwe'owan. 16Miihsh kaaishi anta waapamaatc eshi'ayaanitc pahkehkana ekii'inaatc, “Taka pakitinihshin ciwiihpeminaan.” Kaawiin iitok okii kihkenimaahsiin ini eoshiimihsitc.
Miihsh o'o kaa'ikotc, “Wekonen itahsh kemiishiyampan ciwiihpeminaampaan?”
17Miihsh kaa'inaatc, “Oshki ayaape maanatihk ihsa kika miinin ciontinak eshi ohkwiinowaatc nimaanatihkwak.”
Miihsh kaa'ikotc, “Kekoon ina kitaa miish keonci kehcinaa'entamaan cipwaa piicinisha'watc a'a maanatihk.”
18“Wekonen tahsh kemiininaan keonci kehcinaa'entaman?” okii'inaan.
Miihsh kaaishi nahkwehtaakotc, “I'i kikihkinawaaci'on kaashinootaakanihkantek, i'i kaye kisahka'on kaatahkonaman,” okii'ikoon. Miihsh kaaishi miinaatc ekii wiihpemaatc. Miitahsh kaakiih kikishkawaawahsonitc. 19Miihsh Temaar kaaishi kiiwetc ekii kiihcikoshkank otaakawiinkwe'on ekii pihsihkank itahsh miinawaa kiiwaacihkwewi kikishkikanan.
20Coota hsa okii anoonaan seyaaki wiiciiwaatc Haairawan ci‑ishiwitawaanitc ini ayaape maanatihkwan cimiinaanitc ini ihkwewan cikiiwe miinikotc kaakii miinaahpan okihkinawaaci miikiwaanan. Kaawiin itahsh Haaira okii mihkawaahsiin ini ihkwewan. 21Miihsh kaaishi kakwecimaatc ininiwa' i'imaa eshitaanitc, “Aanti tahsh a'a pihshikwaacihkwe kaa‑ayaahpan pahkehkana weti Iineim ootena.”
Miihsh kaa'ikotc, “Kaawiin wiihkaa pionci ayaahsii pihsikwaacihkwe o'omaa.”
22Miihsh kaaishi anta waapamaatc Cootawan ekii'inaatc, “Kaawiin ohshanaa nimihkawaahsii a'a ihkwe. Ininiwak itahsh kaye weti eshitaawaatc ihkitowak wiihkaa ehpi ayaahsinik weti pihshikwaacihkwewan,” okii'inaan.
23Miihsh o'o Coota kaaihkitotc, “Taka maano oka tashi kanawentaanan ini eyaatc. Kaawiin kinantawentansiimin cipaahpi'ikooyank. Nintaanakii ishinisha'waa iitok wa'a maanatihk, kaawiin itahsh kikii mihkawaahsii,” kii‑ihkito.
24Nihsokiisihs itahsh eani ishihsenik Coota kiiwiintamawaa ekii'inintc, “A'a kishiimihs Temaar kiipihshikwaacihkwe iinsan, miihsh kaaonci kikishkawaawahsotc.”
Miihsh Coota kaaihkitotc, “Saakisi'ihk, cicaakisontc cinipotc,” kii‑ihkito.
25Ehpi saakisi'intc itahsh a'a ihkwe kiianoohkii ciawi wiintamawimintc oshihshenshan ci'inimintc, “Wa'a hsa inini ninkiih kikishkawaawahsoo'ik tepentank onoweniwan. Taka tahsh piwaapantan taka cikihkenimaawatwen awenen tepentank o'o kihkinawaaci'on kaashinootaakanihkantek, o'o kaye sahka'onaahk.”
26Coota hsa okii nihsitawinaan miihsh kaaihkitotc, “Nawac iitok kwayahk wiin kii‑ishihcike ahpiihc niin. Kaawiin iitok ninkii ishihcikehtamawaahsii kekii ishihcikeyaampaan cikii miinakipan ninkosihsan Shiilawan (Shelah) cionaapemitc.” Kaawiin itahsh miinawaa Coota okii onci wiihpemaahsiin ini ihkwewan.
27Wecihcihsenik ihsa ahpii cinihtaawikinaawahsotc, kiikihkenimaa niishoote' iinsan eayaawaatc. 28Mekwaa tahsh enihtaawikinaawahsotc, peshik iinsan kiipahpinihkeniwan. Miihsh ini iinsan wetaahpinaawahsonitc kaakii tahkopinaanitc meskosinitc kashkikwaacikaneyaapiin onihkinink ekii ihkitonitc, “Mii hsa wa'a nihtam nehtaawikitc.” 29Miihsh iinsan kaaishi ocinihkepani'onitc, inihsh iinsan wiicihkiweyan nihtam kiinihtaawikiwan. Miihsh o'o wetaahpinaawahsotc kaaihkitotc, “Mii'iinsan i'i nahke eshi saakicipani'oyan!” Piires#38.29 Piires: I'iwe ishinihkaasowin Piires kaa'icikaatek, saakicipani'owin, mii 'iwe enihtaakwaninik kaaishikiishwewaatc Hiiparoowak. (Perez) itahsh okii ishinihkaanaan. 30Ini tahsh wiicihkiweyan kiinihtaawikiwan tehkopisonitc onihkinink misko kashkikwaacikaneyaapiin. Siira#38.30 Siira: I'iwe ishinihkaasowin Siira kaa'icikaatek, kaapi miskwaahtek, mii 'iwe enihtaakwaninik kaaishikiishwewaatc Hiiparoowak. (Zerah) hsa kii‑ishi wiinsowan.
Currently Selected:
Cenisihs 38: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
