Cenisihs 32

Cekap Kiinakishkawaatc Iihswaan

1Cekap (Jacob) tahsh e⁠ani pimi ayaatc, Kishemanitoon otencalimini okii nakishkaakoon. 2O'o tahsh kii‑ihkito ahpii wayaapamaatc, “Kishemanitoo hsa oweni otashiihkewin,” kii‑ihkito. Niisho kapehshiwin (Mahanaim) tahsh okii ishinihkaataan.

3Cekap tahsh okii niikaaninisha'waa' ke⁠niikaani tipaacimonotawaanitc Iihswaan (Esau) wiicihkiweyan kaakii ishi'ayaanitc Siiyar (Seir) ecikaatenik, Iitam (Edom) ahkiink. 4Miihsh o'o kaa'inaatc ci'inaanitc, “Kiin hsa nintookimaam Iihswaa, niin hsa kitanohkii'aakan Cekap, Lepan (Laban) ohsha ninkii wiici ayaamaa piinihsh o'o ishi ahpii, 5pishihkiwak hsa nintayaawaak, maanshimihtatimook, maanahcaanihshak, maanatihkwak, anohkii'aakanak kaye kaa⁠ininiiwiwaatc, kaa⁠ihkwewiwaatc kaye. Miitahsh o'o eshi niikaani wiintamawinaan e⁠otookimaamiminaan ci⁠minwaapamiyan.”

6Ahpii tahsh kaah⁠pi takohshininitc kaakii niikaaninisha'waahpan, o'o okii'ikoo', “Ninkii anta waapamaanaan hsa kiicihkiwe Iihswaa, inashke tahsh piishaa eh⁠pi anta nakishkawihk. Niiwaahk kaye ininiwa' owiiciiwaa',” okii'ikoo'. 7Cekap tahsh ekiih sekisitc, ekii mikoshkaatentank kaye, niishwayek okii ishi nenaawinaa' pemaatisinitc kaakii wiiciiwikotc. I'i kaye pishihkiwa', maanahcaanihsha', maanatihkwa', pihkwaawikane mihtatimoo' kaye. 8Ekii inentank, “Kiishpin Iihswaa piishaatc, miikaanaatc itahsh o'o peshikwewaan, maakishaa kotak iki ta⁠shaapwiiwak.”

9Cekap tahsh kii‑ishi anami'aa, “Oo Kishemanitoo weKishemanitoomitc kaakii omihshoomihsiyaan Epaarahaam (Abraham), weKishemanitoomitc kaye kaa⁠oteteyaan Aaisik (Isaac), oo Tepencikeyan, kiin hsa 'o kaakii'ishiyan, ‘Maacaan kitahkiimink ishi kiiwen, ci⁠anta waapamatwaa kaye kitinawemaakanak, kika ishi'in kaye ci⁠minohseyan,’ iitok kikii'ish. 10Kaawiin hsa ninte ahpiihtentaakosihsii i'i kaashi naakohtooyan kahkina kaashi minotootawiyan, kaashi tepweyentaakosihkantawiyan kaye niin kitanohkii'aakan. Sahka'onaahk hsa ehtako ninkii ayaan o'o Cwaartan (Jordan) siipink kii⁠aashawishkaayaampaan, noonkom tahsh niniishwewaanakis o'o kaa‑aashawishkaayaan. 11Ci⁠naatamawiyan tahsh kitishi anami'ehtawin, ci⁠papaamenimihsik niicihkiwensi Iihswaa. Nisekis aaniihsh ci⁠piishaatc ci⁠miikaashitc, omaamaama' kaye, apinoonciisha' kaye. 12#Gen 22.17. O'owe iitok kikii'ihkit, ‘Tepwe hsa kika minohse'in, ninka ishi'aak kaye kipiiwesiimak ci⁠tahshiwaatc taapishkoo kaa⁠tahsink mihtaawank kihcikamiink kaa⁠kashkihcikaatehsinok ci⁠akincikaatek ehpiihci paahtiinahk,’ ” kii'ihkito.

13Miitahsh i'imaa kaah⁠tashi tipihkishitc. Kaakii ayaatc itahsh okii onci kakiikinaa' awahkaana' ewii miinaatc wiicihkiweyan Iihswaan: 14Niishwaahk (200) noonshe maanatihkwa', niishtana (20) ayaape maanatihkwa', niishwaahk (200) noonshe maanahcaanihsha', niishtana (20) tahsh ayaape maanahcaanihsha'. 15Nihsimitana (30) kaa⁠ocoocoohshaapoominitc pihkwaawikane mihtatimoo', otaya'aansimini tahsh kaye. Niimitana (40) pishihkiwa', mitaahso (10) ayaape pishihkiwa', mitaahso (10) tahsh noonshe maanshimihtatimoo', mitaahso (10) tahsh kaye ayaape maanshimihtatimoo'. 16Okii nenaawi ohkwiino'aa' itahsh i'i awahkaana' ekii miinaatc otanohkii'aakana' pepeshikwewaan ci⁠naanaakaci'aanitc. Miitahsh o'o kaa'inaatc, “Maacaak niikaaniik, kehcinaac iko ishihcikek ci⁠nenaawaapantiwaatc ayotaanaank,” okii'inaa'. 17O'o tahsh okii'inaan ini maawac kaakii niikaaniinitc, “Ahpii hsa niicihkiwe Iihswaa nakishkawihk o'o tahsh ishi kakwecimihk, ‘Aanti wenci tipentaakosiyan, aanti tahsh eshaayan, aanti tahsh kaye wenci tipentaakosiwaatc iki awahkaanak kaa⁠pi niikaaniiwaatc?’ ishikakwecimihk. 18O'o tahsh kika ishi nahkwehtawaa, ‘Cekap kitanohkii'aakan hsa 'o otipenimaa'. Miitahsh o'o kaa⁠miinihk nintookimaam Iihswaa, Cekap otaanaank pimi ayaa,’ ” okii'inaan ci'inaanitc. 19Miitahsh peshikwan kaakii'inaatc niishink otaanaank, nihsink kaye otaanaank kaakii ani pimi ayaanitc ci‑ihkitonitc, “Miitahsh peshikwan kekiinawaa ke'inek nakishkawek Iihswaa. 20‘Otaanaank hsa pipimi'ayaa kitanohkii'aakan Cekap.’ ” Mii hsa 'i kaa⁠ihkitotc, “Ninka onci minwaapamik hsa i'iweni kaa⁠niikaaninisha'amawak kaa⁠miinak. Naanaake tahsh ninka ani waapamaa; maakishaa tahsh ninka otaahpinik,” kii‑ihkito. 21Cekap tahsh omiikiwewinan okii niikaaninisha'aanan, wiin itahsh wiin i'imaa kapehshiwinink kiih⁠tashi tipihkishi.

Cekap Kii'otihtiniwetc Encalan

22Cekap (Jacob) tahsh kii⁠wanishkaa i'i eh⁠tipihkaninik ekii maaciinaatc niishin wiiwa', niishin kaye kaakii ihkwewinitc otanohkii'aakana', i'i kaye miitaahshipeshik okosihsa' ci⁠aashawishkaanitc Capok (Jabbok) siipiini. 23Ahpii tahsh kaa⁠ishkwaa aashawinisha'waatc, kahkina kaye otaya'iiman okii aashawinisha'aanan. 24#Hosea 12.3,4. Wiin itahsh wiin otaanaank kiih⁠papeshiko.

Ininiwan tahsh okii otihsikoon ekii nawatinitiwaatc piinihsh kekaa ekii ani piitaapaninik. 25Ahpii tahsh ekihkentaminitc ini ininiwan ci⁠shaakooci'ikohsik, okiih saaminikoon onookanink. Onookanikekan itahsh Cekap kiih⁠kacishkihseni mekwaa e⁠nawatinitiwaatc. 26Miihsh o'o kaa'ikotc ini ininiwan, “Taka mii 'i ishi pakitinihsin, aasha ohsha piitaapan,” okii'ikoon. Cekap itahsh okii'inaan, “Kaawiin kiwiih pakitinihsinoon, paanimaa kiih⁠shawenimiyan kika pakitinin,” okii'inaan.

27“Aaniin tahsh eshinihkaasoyan?” okii'ikoon ini ininiwan. “Cekap nintishinihkaas,” okii'inaan.

28 # Gen 35.10. O'o tahsh okii'ikoon, “Kaawiin hsa awahshime Cekap kika ishinihkaasohsii. Isriyal (Israel) hsa kika ishinihkaas; aaniihsh kikii otihtinaa Kishemanitoo, inini kaye, kiin tahsh kikiih shaakoocihtwaa,” okii'ikoon.

29 # Jdg 13.17,18. Cekap tahsh okii'inaan, “Taka wiintamawihshin aaniin eshinihkaasoyan.” O'o tahsh okii'ikoon, “Wekonen tahsh wenci kakwecimiyan aaniin eshinihkaasoyaan?” okii'ikoon. Miitahsh kaa⁠ishi shawenimikotc.

30Miitahsh Cekap kaa⁠ihkitotc, “Ninkii waapamaa hsa Kishemanitoo oncishkawiink, shaakooc itahsh nimpimaatis!” Penaayal (Peniel) tahsh okii ishinihkaataan i'imaa kaakii ishi'ayaatc. 31Aasha tahsh kii‑ishpakoocinoon kiisihsoon Penaayalink kii⁠ani onci maacaatc, miihsh kaakii maahkishkaatc onci onookanink. 32Miitahsh o'o ishi ahpii piinihsh noonkom kaa⁠kiishikaninik Isriyal kaatinowiwaatc kaa⁠onci miicihsikwaa ociihtati wiiyaahs kaashi sakihsininik pihkwaahkokanaanink, aaniihsh mii 'imaa inahke Cekapoon ociihtataaniink onookaniniink kaakii ishi saaminimintc.

Currently Selected:

Cenisihs 32: OJBR

Highlight

Copy