Cenisihs 22

Eparahaam Kiikanoonintc Cipakitinaatc Aaisikoon

1 # Heb 11.17-19. Naanaake tahsh e⁠ani ishihsenik, Eparahaam (Abraham) okii kakweci'ikoon Kishemanitoon. Miitahsh o'o kaa'ikotc, “Eparahaam.”

O'o tahsh okii ishi nahkwehtawaan, “O'omaa nintayaa.”

2 # 2Ch 3.1. O'o tahsh Kishemanitoon okii'ikoon, “Taka noonkom maaciish kikosihs kaa⁠mihci peshikotc Aaisik (Isaac), aahpici kaa⁠shawenimatc. Weti ishiwihsh Moraayaa (Moriah) ahkiink. Ke⁠waapata'inaan tahsh peshik kihci waciw, mii hsa 'iwe keshi pakitinatc a'a kikosihs ci⁠pakitinaahsowaakeyan, niin ci⁠miishiyan,” okii'ikoon.

3Wiipakishep tahsh Eparahaam kii⁠wanishkaa, okiih kwayaanci oshihtoonan waah⁠pakitinank ahpii wiih⁠pakitinaahsotc, ekii onahpinaatc omaanshimihtatimooman. Niishin tahsh kaye otanohkii'aakana' okiih tako wiiciiwaa', kii⁠maaciinaatc okosihsan Aaisikoon (Isaac). Miitahsh kaa⁠ishi pasikwiitc ekii ishaatc aanti Kishemanitoon kaakii'ikotc ci‑ishaatc. 4E⁠ani nihsokonakaanik tahsh Eparahaam okiih tepaapantaan kaakii'inintc ci‑ishaatc. 5Eparahaam tahsh okii'inaa' otanohkii'aakana', “Mii 'omaa ayaak, a'a kaye maanshimihtatim. Niinawint tahsh wiin a'a kwiiwisenhs weti nawac waahsa niwii ishaamin, ewii awi anami'aayaank, ninka pi ashe kiiwemin tahsh ahpii,” okii'inaa'.

6Eparahaam tahsh okii otaahpinaanan mihsan ke⁠aapacihtoowaatc pootawewaatc wiih⁠pakitinaahsowaatc, ekii miinaatc Aaisikoon ci⁠pimiwitoonitc. Wiin tahsh kaakiih kishaanshenik kaa⁠ishkwaahkishenik, moohkomaan kaye okiih pimiwitoon. Miitahsh kaa⁠ishi maacaawaatc ekii ani niishoo'ohsewaatc. 7Aaisikoon tahsh okii'ikoon, “Nintete.”

Miihsh kaa⁠ishi nahkwehtaawaatc, “O'omaa nintayaa ninkosihs,” okii'inaan.

Aaisikoon tahsh okii'ikoon, “Inashke kitayaan ishkwahkinshe waah⁠pootawaakeyan, mihsan kaye kitayaanan, aanti tahsh a'a maanahcaanihshenhs ke⁠pakitinaahsowaakeyank,” okii'ikoon.

8Eparahaam tahsh kii‑ihkito, “Kishemanitoo hsa ta⁠ontinamaaso maanahcaanihshenhsan ke⁠aapatisinitc wiih⁠pakitinaahsowintc,” kii‑ihkito. Miihsh kaa‑anishi niishoo'ohsewaatc ini okosihsan.

9 # Jas 2.21. Ahpii tahsh ekii ani takohshinowaatc Kishemanitoon kaakii'ikowaatc ci‑ishaawaatc, Eparahaam kii⁠onaapihkinike, mihsan kaye okii onaahkohsitoonan i'imaa wakicaya'ii. Miitahsh kaa⁠ishi mamaancikwahpinaatc okosihsan ekiih pimihshimaatc i'imaa onaapihkinikanink, wakici mihshi kaye. 10Eparahaam tahsh okii otaahpinaan moohkomaan ewii nihsaatc ini okosihsan. 11KaaTipencikenitc otencalimini (angel) tahsh okiih kanoonikoon ekii'ikotc, “Eparahaam Eparahaam.”

Miihsh kaa⁠ishi nahkwehtank, “O'omaa nintayaa.”

12Miitahsh kaa'ikotc, “Keko kekoon tootawaahken ke⁠onci wiihsakentank a'a kikosihs. Noonkom tahsh ninkihkentaan e⁠kihtenimatc, e⁠na'ihtawatc kaye Kishemanitoo, aaniihsh kaawiin awaac pankii kisaakihtamawihsii a'a kaa⁠mihci peshikotc kikosihs.”

13Eparahaam tahsh kii⁠ayinaapi, tepwe iitok okii waapamaan ayaape maanahcaanihshan e⁠kihciwaahkwacinitc oteshkaniniink kaakii ishi pihkwahkopaanik. Miitahsh kaa⁠ishi naasihkawaatc ini ayaape maanahcaanihshan ekiih pakitinaahsowaaketc, kaawiin tahsh memwehc okosihsan okiih pakitinaahsiin. 14Miitahsh o'o kaa⁠ishinihkaatank i'imaa kaakii ishi'ayaawaatc, “KaaTipenciketc kaashi ontinamaaketc.” Noonkom tahsh keyaapi kaa⁠kiishikahk ishinihkaate, “KaaTipenciketc okihci waciimink ishi ontinamaake.”

15KaaTipencikenitc otencalimini tahsh miinawaa okiih kanoonikoon Eparahaam, 16#Heb 6.13,14. “Niin hsa piko niwiinsowin nintaapacihtoon o'o kaashi ahpimoyaan. Ke'ininaan hsa aahpici kika wenooci shawenimikoon aaniihsh kikii ishihcike kaakii'ininaan. Kaawiin kaye kikiih saakihtamawihsii kaa⁠mihci peshikotc kikosihs. 17#Heb 11.12. Kekeht tahsh kika kihci shawenimin, aahpici hsa ninka ishi'aak kipiwesiimak ci⁠tahshiwaatc taapishkoo wanankohshak kaa⁠tahshiwaatc ishpimink kiishikonk, kaa⁠tahswewaawankahk kaye mihtaawank naanew kihcikamiink. Kipiiwesiimak hsa kaye oka shaakooci'aawaa' ke⁠miikaanikowaatc. 18#Act 3.25. I'imaa hsa kipiiwesiimink kaa⁠tahswewaanakisiwaatc pemaatisiwaatc o'omaa ahkiink eyaawaatc ta⁠onci shawentaakosiwak aaniihsh kiin kikii na'ihtaw kaakii ishi kanooninaan,” okii'ikoon. 19Eparahaam tahsh kiih⁠kiiwe ishaa kaakii ishi nakanaatc otanohkii'aakana'. Miitahsh kaa‑ani ishaawaatc ootenaank Piiarshiipa (Beersheba) kaakii ishinihkaatenik. Miitahsh i'imaa Eparahaam kaa⁠ishi kapehshitc.

Nehor Opiiwesiima' Ehtashimimintc

20Naanaake tahsh Eparahaam (Abraham) okiih kihkentaan, Milhkawan (Milcah) nihshwaahso (8) apinoonciisha' ekii nihtaawiki'aahtamawaanitc ini wiicihkiweyan Nehor (Nahor) kaa⁠ishinihkaasonitc. 21Miihsh o'o kaa⁠ishinihkaasonitc, As (Uz) nihtam kaa⁠nihtaawikinitc, Paas (Buz), Kemyowel (Kemuel) kaakii okosihsinitc Eraman (Aram), 22Kesaht (Chesed), Heso (Hazo), Piltaash (Pildash), Citlap (Jidlaph), kaye Pehtyoel (Bethuel). 23Pehtyoel hsa kii⁠ani otaanihsi Oripehkawan (Rebekah). Miiwa' o'o nihshwaahso (8) kwiiwisenhsa' kaakii nihtaawiki'aanitc ini Milhkawan Nehoran (Nahor) kaakii onaapeminitc. Eparahaam iitok tipinawe kii⁠owiicihkiwe ini Nehoran. 24Ini tahsh wiin otaanihke wiiwini Oroomah (Reumah) kaa⁠ishinihkaasonitc, okii nihtaawiki'aani o'o kaakii ishinihkaasonitc Tiipa (Tebah), Keham (Gaham), Tehash (Tahash), ini kaye Meaka (Maacah) kaakii ishinihkaasonitc.

Currently Selected:

Cenisihs 22: OJBR

Highlight

Copy