Cenisihs 20
20
Eparahaam shikwa Apimelehk
1Eparahaam (Abraham) hsa Mamri (Mamre) kiionci kosi weti tahsh shaawanonk inahke Kenan (Canaan) ahkiink kii‑ishi kapehshi. I'imaa ishi nahsawi ootenawan Katesh (Kadesh) i'i tahsh kaye Shoor (Shur) eshinihkaatenik. Mekwaa hsa weti Kiiraar (Gerar) ootenaank kii‑ishitaatc, 2#Gen 12.13; 26.7. mii hsa imaa Eparahaam kaakii ishi ihkitotc ini wiiwan Sera (Sarah) eshinihkaasonitc eotawemaatc. Miitahsh a'a kihciokimaa Apimelehk (Abimelech) i'imaa ootenaank Kiiraar kaakii antomaatc ini ihkwewan Serawan. 3Miitahsh ehtipihkaninik Apimelehk kaakiih pawaanaatc Kishemanitoon ehpi naasihkaakotc e'ikotc, “Mii hsa 'i eshinaakosiyan taapishkoo enipoyan a'awe onci ihkwe kaakii antomatc; wiitike iitok a'a ihkwe.”
4Kaawiin tahsh mahshi Apimelehk okiih papaamenimaahsiin ini ihkwewan. Miihsh kaaihkitotc, “Tepencikeyan, kaawiin iitok kekoon nintishi macitootansii. Miinahsh'i cinihshiwanaaci'iyaank kahkina entahshiyaank kekoon eishi mamaashiihsiwaank? 5Wiin iitok iko Eparahaam kii‑ihkito eotawemaatc ini ihkwewan; miihsh kaye wiin peshikwan a'a ihkwe kaaihkitotc. Kaawiin itahsh kekoon nintinentansii kekoon ekii ishi mamaashiiyaan i'i kaakii ishihcikeyaan.”
6Miihsh o'o kaaishi nahkwehtaakotc Kishemanitoon, “Tepwe hsa kikihkenimin ekii inentaman kekoon eishi mamaashiihsiwan i'i kaakii ishihcikeyan, miihsh kaakii onci pakitinihsinowinaan cimacitootawiyan. Miihsh kaye kaakii onci pakitinihsinowinaan cisaaminatc a'a ihkwe. 7Kiiwe miish itahsh a'a inini ini wiiwan. Kaakanootamawaatc Kishemanitoon ohsha tinow a'a inini, kika anami'ehtamaak itahsh kaye miihsh cipimaatisiyan. Kiishpin itahsh wiin kiiwe miinaahsiwatc mii hsa 'i kehcinaac cinipoyan iki kaye kahkina kiwiici pimaatisiimak.”
8Wiipa tahsh kikishep Apimelehk kiiwanishkaa ekii antomaatc kahkina otanohkii'aakana' ekii wiintamawaatc kahkina kekoon kaainahkamikaninik, wiinke tahsh kiihsekisiwa'. 9Miihsh Apimelehk kaaishi antomaatc Eparahaaman ekii'inaatc, “Aaniin itahsh inaa kaahtootawiyaank? Aaniin itahsh kaaishi maanshi tootawinaan ekiih tootawiyan cimikoshkaantentamaan kahkina kaye o'o nintookimaawiwin. Kaawiin iitok awiya i'i taakii ishihcikehsii i'iwe kaakiih tootawiyan.” 10Miihsh Apimelehk kaa'inaatc Eparahaaman, “Aaniin itahsh kaainwaataman o'o kaakii ishihcikeyan?”
11Miihsh o'o Eparahaam kaaishi nahkwehtank, “Miihsha'i kaainentamaan kehcinaac maawiin ehkohtaanenimaahsiwintc Kishemanitoo o'omaa ahkiink. Ekii inentamaan kaye cionci nihsikooyaan a'a niwiiw. 12Tepwe iitok a'a nintawemaa. Ninteten eotaanihsimikotc, nimaamaan itahsh wiin kaawiin otootaanisimikoohsiin, miihsh kaakii wiitikemak. 13Ahpii hsa Kishemanitoo kii'ishihpan cinakatamowak nintete otaawin pahkaan ahkiink ci‑ishaawak, mii hsa 'i kaainakipan Sera (Sarah), ‘Misiwe hsa piko kepapaa ishaayank, nintawemaa a'awe hsa kika'ish. Miihsh'i keonci kihkentamaan ehsaaki'iyan iinsan.’ ”
14Miitahsh Apimelehk kaakiih piinaatc maanahcaanihsha', pishihkiwa' kaye. I'ihsh kaye eniniiwinitc, ehkwewinitc kaye anoohkii'aakana' ekii miinaatc Eparahaaman. Okiih kiiwe miinaan itahsh kaye wiiwini. 15Miihsh kaye Apimelehk kaa'inaatc Eparahaaman, “Inashke niin o'owe nintahkiim kaawaapantaman; aanti hsa piko eshi mihsawentaman ishi kapehshin.” 16O'o tahsh wiin okii'inaan Serawan, “Nimiinaa hsa kitawemaa mitaaswaahk (1,000) waapaapihko shooniyaan. Miihsh i'i cikihkentamowaatc oko kahkina o'omaa eyaawaatc kekoon eishi anaamentaakosihsiwan. Mii hsa 'i wiinke ehpoonenimikooyan.”
17Miitahsh Eparahaam kaaishi anami'ehtawaatc Kishemanitoon, ekii ishi anami'aatc ciaantawi'ikoowisinitc Apimelehkoon, wiiwini kaye, i'i kaye otanohkii'aakanini kaaihkwewinitc ciayaawaanitc apinoonciisha'. 18KaaTipenciketc iitok okiih tootawaa' kahkina cioniicaanihsisinik ihkwewa' i'imaa eyaanitc Apimelehk otookimaawikamikonk. Serawan itahsh i'i kaakii onci ishihciketc.
Currently Selected:
Cenisihs 20: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
