Cenisihs 14
14
Eparam Kiinaatamawaatc Laatan
1I'i tahsh ahpii oko kihciokimaak Amrapel (Amraphel) kihciokimaa Paapilan (Babylon) ahkiink wenciitc, Ariyaahk (Arioch) kihciokimaa wenciitc Elesaar (Ellasar) ahkiink, Kiitarleomar (Chedorlaomer) kihciokimaa wenciitc Iilam (Elam) ahkiink, a'a kaye Taaital (Tidal) kihciokimaa wenciitc Koim (Goiim) 2kii‑ishaawak eanta miikaanaawaatc o'o kihciokimaa' Piira (Bera) kihciokimaan Swaatam (Sodom) ootenaank wenciinitc, Pirsha (Birsha) kihciokimaan wenciinitc Kamwaara (Gomorrah) ootenaank, Shaainap (Shinab) kihciokimaan Aatma (Admah) ootenaank wenciinitc, Shemiipar (Shemeber) kihciokimaan Siipooim (Zeboiim) ootenaank wenciinitc, kihciokimaan kaye Piila (Bela) ootenaank wenciinitc, mii 'iwe Swaar (Zoar) kaa'icikaatenik. 3Oko tahsh naanan kihciokimaak kiimaamawinitiwak ekii wiiciintiwaatc i'imaa eshi pahsatinaanik Sitam (Siddim) eshinihkaatenik, mii hsa 'i Shiiwihtaakaniwi saaka'ikaniink. 4Mitaahshiniishopipoon (12) hsa okiih tetako tipenimikowaan ini kihciokimaan Kiitarleomar kaaishinihkaasonitc. Mitaahshinihsopipoon (13) tahsh eishihsenik mii 'i kaakii maacii miikaanaawaatc. 5Mitaahshiniiwipipoon tahsh eishihsenik, kihciokimaa Kiitarleomar kiihpiishaa ekiih pi wiiciiwaatc kaakii wiiciiwikotc ekiih shaakooci'aawaatc Orehpa'im (Rephaites) kaatinowinitc i'imaa Aashtaraht Kaarneimink (Ashteroth Karnaim) kaa‑ayaanitc, kaye Soosim (Zuzim) kaatinowinitc i'imaa Hemink (Ham) kaa‑ayaanitc, kaye Emim (Emim) kaatinowinitc Shepah Keryahteimink (Shaveh Kiriathaim) kaa‑ayaanitc, 6i'i kaye Korii (Horites) tinowiya'aak imaa kaakii ayaanitc Iitam (Edom) eshi papiihkwatinaanik ekii ahkonisha'waawaatc weti El Peraan (El Paran) kaapi ahkosink i'i pikwatahkamik. 7Kiihpi ashe kiiwewak itahsh ekii ishaawaatc En Mishpat (En Mishpat) mii 'iwe Ketesh (Kadesh) kaa'icikaatenik. Misiwe i'imaa nahke ahkiink kiihshaakoocihtwaawak, ekiih shaakooci'aawaatc Amalehkii (Amalekites) kaatinowinitc, i'i kaye Emorii (Amorites) kaatinowinitc kaakii ishitaanitc i'imaa Hesiison Temaar (Hazezon Tamar).
8Oko tahsh kihciokimaak, Swaatam (Sodom) onci ootenaank, kaye Kamwaara (Gomorrah) ootenaank, Aatma (Admah) ootenaank kaye wenciitc, Siipooim ootenaank kaye, Piila (Bela) kaye ootenaank wenciitc, mii 'iwe Swaar kaa'icikaatek, okiih piinaawaa' oshimaakanihshiimiwaa' i'imaa kaashi pahsatinaanik Sitam (Siddim) eshinihkaatenik, ewii miikaanaawaatc 9o'o kihciokimaa' Kiitarleomarwan (Chedorlaomer) kaakihciokimaawinitc Iilam (Elam) ahkiink, i'i kaye Taaitalwan (Tidal) kihciokimaan wenciinitc Koim (Goiim), Amrapeloon (Amraphel) kihciokimaan Paapilan (Babylon) ahkiink wenciinitc, Ariyaahk (Arioch) kaye kihciokimaan wenciinitc Elesaar (Ellasar) ahkiink, niiwewaan cimiikaanaawaatc naanwewaan. 10I'imaa tahsh Sitam (Siddim) pahsatinaank wiinke kiihpaahtiinatinoon waanihkaanan kaakii ontinimintc pasakocii mahkate pikiihkaanan. Kihciokimaak tahsh ootenawan Swaatam, Kamwaara kaakii onciiwaatc, emaaciipa'iwewaatc kiihpiincihsewak waanihkaanink. Kotak itahsh wiin kaakiih shaapwiiwaatc kiiahpa'iwewak eshi papiihkwatinaanik. 11Iki tahsh niiwin kihciokimaak okii otaahpinaanaawaan kahkina kekoonan kaakii ayaanikin ootenaank Swaatam, Kamwaara kaye, kahkina kaye miicim kiimahkantwewak. Miitahsh kaa‑anishi maacaawaatc. 12Okii maaciinaawaan tahsh kaye Laatan (Lot), Eparaman (Abram) otooshimini, kahkina kaye kekoon kaakii ayaanitc. Swaatam ootenaank iitok kii‑ishitaawan.
13Peshik tahsh awiyan kaakiih shaapwiinitc kiihpi takohshinoon ekiih pi wiintamawintc Eparam Hiiparoo (Hebrew)#14.13 Hiiparoo (Hebrew): Miipeshikwan a'a tino inini Coo kaa'inintc. Ninkotink kaye Isriyal awiya ishinihkaacikaniwi Hiiparoo. kaakiih tinowitc. Eparam tahsh kiiayintaa i'imaa pehsho eshi'ayaanitc mihtikoo' kehtentaakosinitc kaakii ishi tipentaminitc Mamri (Mamre) eshinihkaasonitc Emorii (Amorite) kaatinowinitc. Eparam tahsh okii wiici'ikoon Mamriwan, ini kaye wiicihkiweni Eshkol (Eshcol), Enar (Aner) eishinihkaasonitc. 14Ahpii tahsh Eparam enoontank otinawemaakanan ekii matwe maaciinimintc, okiih kanoonaa' nihswaahk mitaahshinihshwaahso (318) otininiima' kaakii nakaciinitc otaawinink kaakiih tashi nihtaawikinitc. Miitahsh kaakii ishi maacinisha'iketc piinihsh weti waahsa Ten (Dan) ahki ecikaatenik. 15Okii nenaawinaa' itahsh otininiima', ehtipihkaninik tahsh wiin iko otininiima' kaye, kiiotihtiniwewak ekii miikaasowaatc, ekiih shaakoocihtwaatc. Weti tahsh waahsa eyaawinink Hopah (Hobah) ecikaatenik kiiwetinonk inahke Timaaskahs (Damascus) ootenaank kii‑inaamohkiiwak i'i kaakii miikaanaawaatc. 16Kahkina tahsh kekoonan kiihkiiwe mahkantwe kaakii otaahpinikaatenikopanen ekiih pikiiwewitootc. Okiih pikiiwewinaan kaye otinawemaakanan Laatan (Lot), kahkina kaye otaya'iimini, kahkina kaye ihkwewa', pemaatisinitc kaye kaakii maaciicikaniwinikopanen.
Melhkisitehkoon Kii'ikotc Eparam Kishemanitoon Ciminohse'ikotc
17Ahpii tahsh Eparam (Abram) kaahpi takohshink kii‑ishkwaa shaakooci'aatc Kiitarleomarwan (Chedorlaomer), i'i kaye kihciokimaa' kaakii wiiciiwikonitc, kihciokimaan ootenaank Swaatam (Sodom) wenciinitc okiih pi anta nakishkaakoon i'imaa pahsatinaank Shepah (Shaveh), mii hsa 'iwe Kihciokimaa otoopahsatinaam kaa'icikaatenik. 18#Heb 7.1-10. Kihciokimaan tahsh Melhkisitehk (Melchizedek) eshinihkaasonitc wenciinitc ootenaank Selam (Salem) okiih piitamaakoon pahkweshikanan, shoominaapooni kaye. Kiikihci anami'ewikimaawiwan eanohkiihtawaanitc Kishemanitoon Maawac Eshpentaakosinitc. 19Okii'ikoon tahsh ciminohsetc,
“Taka kiin Eparam kiKishemanitoom Maawac Eshpentaakositc
kaaoshihtootc kiishik, ahki kaye, kika minohse'ik!
20Tamiikwehciwentaakosi Kishemanitoo Maawac Eshpentaakositc,
wiin iitok kaamiinihk cishaakooci'imatc kaashiinkenimihkwaa,”
okii'ikoon. Eparam tahsh okii miinaan peshik mitaahso#14.20 Peshik mitaahso: Mii hsa 'iwe kaa'icikaatek awiya kaamiikiwetc peshik kekoon entahso mitaahso kekoon kiiayaatc. kekoon kaakii ayaatc.
21Kihciokimaan tahsh Swaatam (Sodom) wenciinitc Eparam okii'ikoon, “Miishihshin iko pemaatisiwaatc, kanawentan itahsh wiin ini kekoonan,” okii'ikoon.
22Eparam tahsh o'o okii'inaan ini kihciokimaan, “Ninkii ayiici ahshotamawaa ohsha Kishemanitoo Maawac Eshpentaakositc, kaaoshihtootc kiishik, ahki kaye, 23ciotaahpinaahsiwak kashkikwaacikaneyaap, komaa kaye mahkisineyaap, kekoon hsa ko kiin tepentaman, kaawiin tahsh kika kashkihtoohsiin ci‑ihkitoyan, ‘Niin ohsha ninkii wenootisii'aa Eparam.’ 24Kaawiin niin kekoon niwii otaahpinansiin, miiehtako nintininiimak kaakii miiciwaatc, i'i kaye kaakii maamawihcikewaatc kaakii wiiciiwiwaatc. Maano Enar (Aner), Eshkol (Eshcol), a'a kaye Mamri (Mamre) taotaahpinamaasowak kaakii ishi wiitoohkaasowaatc.”
Currently Selected:
Cenisihs 14: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
