Cenisihs 12
12
Kishemanitoo Kiikanoonaatc Eparaman
1 #
Act 7.2,3; Heb 11.8. KaaTipenciketc tahsh okii'inaan Eparaman (Abram), “Nakatan i'i kitahkiim, nakash kaye kitinawemaakanak. Nakatamow kaye kitete otaawin, ci‑ishaayan weti ahkiink kaawii waapanta'inaan. 2Kika ishi'in kaye kipiiwesiimak cipaahtiinowaatc, kika shawenimin kaye. Ninka ishihcike kiwiinsowin cikihci inentaakwahk, awiyak kaye taonci shawentaakosiwak kiin onci.”
3 #
Gal 3.8. “Ninka minohse'aak hsa iki kekwecimiwaatc kiin ciminohseyan, awiya tahsh wiin kemacenimihk, niin ninka macakimaa. Kahkina hsa pemaatisiwaatc kaatahso ayintaawaatc tashawentaakosiwak kiin onci,” okii'inaan.
4Eparam tahsh kiimaacaa ekii ishihciketc kaaTipencikenitc kaakii'ikotc. Niishwaahsomitanashinaanan (75) hsa kiihtahso pipoonwe i'i ahpii kiinakatank i'i ootena Heran (Haran) kaakii ishinihkaatenik. Otooshiman Laat (Lot) kaakii ishinihkaasonitc hsa okii wiiciiwaan. 5Eparam hsa okii maaciinaan wiiwan Seraii (Sarai) kaakii ishinihkaasonitc, ini kaye otooshiman Laatan. Okii maaciitoonaawaan kaye kahkina otaya'iimiwaan, okiih tako maaciinaawaa' kaye opamiihtaake' kaakii ayaawaawaatc i'imaa Heran ootenaank. Kii‑ishaawak tahsh inahke kaaishi'ayaanik i'i Kenan (Canaan) ahki.
6Ahpii tahsh eani takohshinowaatc Eparam kiihpiintikeshkaa i'imaa ahkiink piinihsh ekii ani takohshink weti kaakii ishi'ayaanitc kaakihtentaakosinitc oohk tinowaahtikoon Moore (Moreh) kaakii ishinihkaatenik, kaakii nihtaa tashi anami'aank. Shiihkam (Shechem) tahsh kii‑ishinihkaateni kaakii ishi patahkisotc a'a mihtik. I'i tahsh ahpii Kenan (Canaanite) kaaonciinitc kiiayaawa' i'imaa ahkiink. 7#Act 7.5; Gal 3.16. KaaTipencikenitc tahsh Eparam okii naakosiihtaakoon ekii'ikotc, “Mii hsa o'o ahki kaawii miinakwaa kipiiwesiimak.” Eparam tahsh pakitinaahsowinaapihkoni okii onaapihkinamawaan kaaTipencikenitc kaakii naakosiihtaakotc. 8Miitahsh i'imaa kaaonci maacaatc shaawanonk inahke ekii ishaatc kaakii ishi kihci pihkwatinaanik waapanonk inahke Pehtal (Bethel) ootenaank. Kiihkapehshi tahsh i'imaa ninkaapii'anonk inahke kaakii ishi'ayaanik Pehtal ootena. Waapanonk tahsh inahke kiiayaani ootena Eaai (Ai). Miinawaa tahsh i'imaa kiionaapihkinike ekiih pakitinaahsotc ekii anami'ehtawaatc kaaTipencikenitc. 9Kiihpapaamikosi tahsh i'imaa Kenan (Canaan) ahkiink piinihsh shaawanonk inahke ekii ani ishi kositc.
Eparam Kii'ishaatc Iicipahkiink
10Wiinke tahsh kiihkakwaatakentaakwan i'imaa Kenan (Canaan) ahkiink aaniihsh kaawiin kiiayaahsinoon miicim. Miitahsh Eparam (Abram) kaakii onci ishaatc weti Iicipahkiink (Egypt) acina ekii awi ishitaatc. 11Ahpii tahsh kekaa eani piintikeshkaatc Iicipahki, okii'inaan wiiwan Seraii (Sarai), “Inashke hsa ninkihkentaan wiinke kaaminonaakositc ihkwe ehtinowiyan. 12Ahpii tahsh Iicip eyaawaatc waapamihkwaa taihkitowak maawiin, ‘Miiwanini wiiwan.’ Ninka nihsikook tahsh, kika pakitinikook tahsh kiin cipimaatisiyan. 13#Gen 20.2; 26.7. Ihkiton tahsh eotawemaaminaan, miitahsh i'i ciminohseyaan kiin onci, keniin tahsh inaa ninka pimaatis,” okii'inaan. 14Ahpii tahsh Eparam kaahpi takohshink Iicipahkiink, Iicip eyaanitc okii waapamaani wiiwan eminonaakosinitc. 15Ahpii tahsh Peroo (Pharaoh) otaanihkewikimaa' kaawaapamaawaatc ini ihkwewan okii awi wiintamawaawaan kihciokimaan aaniin ehpiihci onishihshininitc ini ihkwewan; kii‑ishiwicikaniwiwan tahsh ini ihkwewan kihciokimaawikamikonk. 16Kihciokimaa tahsh weweni okiih tootawaan Eparaman Seraiiwan onci. Okii miinaan eayaapewinitc, enoonsheya'aawinitc maanahcaanihsha', pishihkiwa', ayaape pishihkiwa', maanshimihtatimoo', pihkwaawikane mihtatimoo', ininiwanohkii'aakana', ihkwewanohkii'aakana' kaye.
17KaaTipenciketc tahsh okii ishi'aan Peroon ciayaanitc kaasanakaninik aahkosiwin, i'i kaye kahkina eyaanitc otaawininiink aaniihsh okii otaahpinaani Seraiiwan Eparam wiiwan. 18Kihciokimaan tahsh Eparam okii antomikoon ekii'ikotc, “Aaniin tahsh o'o wenci tootawiyan? Wekonen tahsh kaaonci wiintamawihsiwan ewiiwiyan a'a ihkwe? 19Wekonen tahsh kaaonci ihkitoyan, ‘Nintawemaa awe,’ miitahsh kaakii onci otaahpinak niin ciwiiwiyaan? Ina tahsh wa'a kiwiiw, maaciish, mii 'i anishi maacaan,” okii'ikoon. 20Peroo kihciokimaa tahsh okii anoonaa' otininiima', cisaakiciwinaanitc Eparaman i'imaa ahkiink, wiiwini kaye, kahkina kaye kekoon kaakii ayaanitc.
Currently Selected:
Cenisihs 12: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
